Popular Bible Verses from Marcos 6

Share

Tsëchö atskaq nunakuna kayaptinmi mikuyänanpaqpis tiempun karqantsu. Tsëmi apostolninkunata Jesús kënö nirqan: <<Aku ëwashun chusyaqman tsëchö jamakurinantsikpaq>>.

Jesúsnam nirqan: <<Wakin markakunachö profëtata chaskiyaptinpis castankunaqa y marka mayinkunaqa manam chaskiyantsu>>.

Barcupita yarpurirnam Jesús tarirqan atskaq nunakuna shuyëkäyaqta. Mitsiqninnaq üshakunanö këkaqta rikarmi ankuparnin tukïnöpa yachatsirqan.

Tsënö mana chaskiyaptinmi ima milagrutapis tsë markachö rurarqantsu, sinöqa juk ishkë qeshyaqkunallatam yatëkur kachakätsirqan. Marka mayinkuna pëman mana markäkuyaptinmi Jesús alläpa llakirqan. Tsëpitanam markakunapapis estanciankunapapis nunakunata yachatsir Jesús purirqan.

Tsëpitanam pitsqa tantatawan ishkë pescäduta tsarirkur ciëluman rikarkur Teyta Diosta Jesús payllä nirqan. Tantata pakirirnam discïpulunkunata makyarqan nunakunata qarayänanpaq. Tsënöllam llapan mikuyänanpaq ishkë pescädutapis makyarqan. Pacha junta mikuriyaptinnam katu tantakunata y pescädukunata chunka ishkë canasta juntata ëlluriyarqan.