Marcos 5

Juk nunapita supëkunata Jesús qarqunqan

Mateo 8.28-34; Lucas 8.26-39

1Qochata tsimparirnam Gerasa#5.1 Wakin griego copiakunachömi Gadara niyan. Wakinnam Gergesa niyan. niyashqan partiman discïpulunkunawan Jesús chäriyarqan. 2Barcupita Jesús yarquriptinmi supëkuna löcuyätsishqan nuna panteonpita yarqamurqan. 3Tsë nunaqa panteonllachömi täkuq. Cadënawan watarpis manam watarätsita puëdiyaqtsu. 4Chakipita makipita watäyaptinpis cadënata rachikacharquqmi. Tsëmi pipis ima rurëtapis puëdiqtsu. 5Tsë nunaqa paqaspapis junaqpapis panteonchömi y jirkakunachömi qaparir qayarir rumikunawan tsaktakur purikuq.

6Pëmi Jesústa rikärir ëqillapa ëwarnin nöpanman qonqurikur 7qaparipa nirqan: <<¡Puëdiq Diospa Tsurin Jesús! ¡Imatataq noqawan munanki! ¡Diospa shutinchömi rowakuq! ¡Ama jipatsillämëtsu!>>

8Tsënö nirqan <<¡supë, kë nunapita yarqï!>> Jesús nishqa kaptinmi.

9Tsëpitanam Jesús tapurqan: <<¿Imataq shutiki?>> nir.

Niptinmi nirqan: <<Noqapa shutïqa Legiónmi.#5.9 Legión ninanqa atska waranqa ninanmi. Noqakunaqa atskaqmi kayä>>.

10Tsënö nirirmi karuman mana qarqunanpaq supëkuna alläpa rowakuyarqan. 11Tsë jirkachömi atska kuchikunata mitsikäyarqan. 12Tsëmi supëkuna Jesústa rowakur niyarqan: <<Kuchikunallaman yëkuyänäpaq kachëkalläyämë>>.

13Rowakuyashqanta Jesús äniptinmi nunapita yarqurir tsë kuchikunaman supëkuna yëkukïkuyarqan. Tsë kuchikunaqa ishkë waranqanömi (2,000) kayarqan. Tsëmi kuchikuna ladërapa ëqir qochaman jeqar shenqakëpa wanuyarqan.

14Tsëta rikëkurmi kuchi mitsiqkuna ëqillapa ëwar jinan markachö y estanciankunapa willakuyarqan. Willayaptinmi nunakuna ima pasashqantapis rikäyänanpaq ëwayarqan. 15Jesús kaqman chärirmi tsë löcuyashqa nunata tariyarqan ratashnin yakashqa juiciunchöna tëkaqta. Tsëta rikëkurmi alläpa mantsakäkuyarqan.

16Jesús kachakätsishqanta rikaqkunam willayarqan tsë nuna imanö kachakashqanta y kuchikuna shenqakëpa wanuyashqanta. 17Tsëmi nunakuna Jesústa rowayarqan tsëpita ewkunanpaq.

18 Barcuman Jesús lloqariptinnam kachakaq nuna Jesústa rowarqan pëwan ewkunanpaq. 19Rowakuptinpis mana änirmi Jesús kënö nirqan: <<Wayikipa kutir castëkikunata willapë Teyta Dios ankupäshurniki kachakätsishushqëkita>>.

20Tsënam ëwar jinan Decápolis provinciachö willakurqan Jesús kachakätsishqanta. Tsënö willakuptinmi llapan wiyaqkuna kushikuyarqan.

Jairupa tsurinta kawaritsinqan y warmita kachakätsinqan

Mateo 9.18-26; Lucas 8.40-56

21Tsëpitanam qocha wak tsimpanman barcuwan Jesús yapë kutirqan. Qocha kuchunchö këkaptinnam atska nunakuna ëllukäyarqan. 22Tsëmanmi sinagögachö mandakuq Jairo shutiyuq nuna chärirqan. Pëmi Jesúspa nöpanman qonqurikur 23rowakur nirqan: <<Tëtë, warmi tsurïmi wanïkanna. Ëwëkulläshun. Yatëkuptikiqa kachakanqam>>.

24Tsënö rowakuptinmi Jesúsqa Jairuwan ëwarqan. Ëwëkaptinmi atskaq nunakuna kichkinakurraq qatiyarqan. 25Tsë nunakunawanmi chunka ishkë watana yawar ëwëwan qeshyëkaq warmipis ëwëkarqan. 26Tsë qeshyawan alläpa jiparmi mëdicukunata pagananpaq imëkantapis rantikur usharqan. Imëkawan jampiyaptinpis mas peormi antsarqan.

27Jesús puëdiq kashqanta musyarirmi atskaq nunakuna kaptinpis tsë warmi qepanllapa yëkurir Jesúspa mantunta yatëkurqan. 28Tsënö rurarqan: <<Jesúspa mantunllatapis yatëkur kachakärishaqmi>> nirmi. 29Yatëkuptinmi tsë höra yawar ëwënin pärarirqan. Tsëmi mäkurirqan kachakärishqanta.

30Poderninwan pipis kachakashqanta musyarirmi tumëkur Jesús kënö nirqan: <<¿Pitaq ratashnïta yatamushqa?>>

31Discïpulunkunanam niyarqan: <<Tëtë, kënö kichki ëwëkarqa ¿imanöparaq musyayäman mëqan yatëkushushqëkitapis?>>

32Tsënö niyaptinpis Jesúsqa wakpa këpam rikachakurqan pï yatashqantapis musyananpaq. 33Tsëmi tsë warmi mantsakashqa karkaryëkar Jesúspa nöpanman qonqurikïkurqan. Tsëpitanam willarqan mantunta yatëkur kachakashqanta. 34Jesúsnam nirqan: <<Markäkamushqëkipitam kachakärirqunki. Kananqa kushishqana ewkï>>.

35Jesús tsënö parlëkaptinmi Jairupa wayinpita willakuq taripëkur Jairuta nirqan: <<Tëtë, tsurikiqa wanurishqanam. Amana Jesústa afanënatsu>>.

36Tsënö niqta wiyëkurmi Jesús kënö nirqan: <<Ama llakikïtsu. Teyta Diosman markäkï>>.

37Tsënö nirmi Pedruta, Santiaguta y Santiagupa wawqin Juanta pusharkur Jairupa wayinman Jesús ëwarqan. Wakin ëwanantaqa manam munarqantsu. 38Chärirnam tarirqan nunakuna alläpa llakikur waqëkäyaqta. 39Tsëmi Jesús yëkurir nirqan: <<¿Imanirtaq tsënö waqëkäyanki? Wamraqa manam wanushqatsu. Punïkanllam>>.

40Tsënö niptinmi asipäyarqan. Tsëpitanam llapan nunakunata waqtaman qarqurir Jairuta, Jairupa warminta y pëwan këkaq discïpulunkunata pusharkur wamra sutarëkashqanman Jesús yëkurirqan. 41Tsëchömi makipita tsarirkur wamrata nirqan: <<Talita, cumi>>.

Tsë nishqanqa <<wamra, sharkï>> ninanmi.

42Tsëmi tsë höra kawarimur purir qallëkurqan. Pëqa chunka ishkë watayuqmi karqan. Kawarimushqanta rikëkurmi nunakuna alläpa kushikuyarqan. 43Tsënö kaptinpis kachakätsishqanta pitapis mana willayänanpaqmi Jesús nirqan. Tsëpitanam wamrata pachan qarayänanpaq nirqan.

Currently Selected:

Marcos 5: qwhB

Highlight

Copy

Compare