Miqueas 3
3
Mana alli autoridäkunata castigananpaq ninqan
1Tsëpitam kënö nirqä:
¡Jacobpita miraq nunakunapa autoridäninkuna!
¡Israel nunakunapa mandakuqninkuna!
¡Shumaq wiyayämë!
¿Manaku käyikuyanki alli kaqta rurayänëkipaq kashqanta?
2Qamkunaqa allikunata rurayänëkipa rantinmi mana allikunata rurëkäyanki.
Tsëmi nuna mayikipa qaranta sipraqnö y tullupita ëtsanta jorquqnö këkäyanki.
3Teyta Dios kuyashqan nunakunata mikuqnömi këkäyanki.
Qaranta siprarir tullunta pakiqnömi këkäyanki.
Imëka calduyänëkipaq ëtsata roquqnömi maltratëkäyanki.
4Tsënö kayashqëki rëkurmi mañakuyaptikipis Teyta Dios yanapayäshunkinatsu.
Piñatsir jutsata rurayashqëki rëkurmi rikëtapis mana munayäshunkitsu.
Uli profëtakunata castigananpaq ninqan
5Uli profëtakunam Teyta Dios kuyashqan nunakunata engañëkäyan.
Pëkunaqa imanpis aptapaq kaqpaqqa bendición kananpaq kashqantam niyan.
Mana imanpis apapaq kaqpaqqa maldisishqa kananpaqmi niyan.
Tsë uli profëtakunatam Teyta Dios kënö nin:
6<<Qamkunataqa imata ruranäpaq kaqtapis manam musyatsiyashqëkinatsu.
Imanö kananpaq kaqtapis manam willapäyashqëkinatsu
Tsëmi paqaschönö kar imata willakuyänëkipaqpis musyayankinatsu>>.
7Tsë uli profëtakunaqa alläpa penqakushqam kayanqa.
Teyta Dios mana käyitsiptinmi imata willakuyänanpaqpis shimin pashtanqatsu.
8Noqataqa Teyta Diospa Espïritunmi yanapëkäman pë munashqannö willakunäpaq.
Tsëmi kallpä këkan Israel nunakuna mana cäsukuq kayashqanta y jutsayuq kayashqanta mana mantsakushpa willakunäpaq.
Jerusalén marka ushakänanpaq ninqan
9¡Jacobpita miraq nunakunapa autoridäninkuna!
¡Israel nunakunapa mandakuqninkuna!
¡Shumaq wiyayämë!
¿Imanirtaq demandukunata shumaq arreglayankitsu?
¿Imanirtaq leykunatapis cumpliyankitsu?#Amós 5.7.
10Tsënö kayaptikim Jerusalénchöqa mana alli rurëkunalla y wanutsinakïlla kakïkan.
11Autoridäkunapis sënita apaq kaqmanmi qaqan.
Sacerdötikunapis qellëpaq rëkurllam yachatsikuyan.
Profëtakunapis qellëpaq rëkurllam willapäkuyan.
Tsënö këkarpis kënöran niyan: <<Teyta Dios yanapëkämantsikmi.
Manam ima desgraciapis pasamäshuntsu>>.
12Tsënö kayashqëki rëkurmi Sión jirka#3.12 Sión jirkachöqa templum karqan. imëka barbichashqa chakranö quedarinqa.
Jerusalén markata ushakäratsiyaptinmi raqällana quedarinqa.
Templutapis juchuratsiyaptinmi qorakunallana tsëchö winanqa.#Jer. 26.18.
Currently Selected:
Miqueas 3: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
