Gálatas 3

Pablo llakikunqan

1¡Mana käyikuq Galacia nunakuna! Noqantsik rëkur Jesucristo cruzchö wanushqanta shumaqmi käyiyarqëki. Tsënö këkaptinqa ¿pitaq chaqchapëkuyäshurqunki#3.1 Manam rasunpatsu chaqchapäyarqan, sinöqa mana allikunaman creyiyänanpaqmi pantakätsiyashqa. [llutan yachatsikïta chaskikuyänëkipaq]? 2Kanan mä willayämë. ¿Moisés qellqashqan leykunata cumplirku o Jesucristupa willakïninta wiyar pëman markäkurku Espíritu Santuta chaskikuyarqunki? 3¡Imanö upanataq këkuyanki! Espíritu Santu yanapayäshuptikim Teyta Dios munashqannö kawëta qallëkuyarqunki. Tsënö këkaptinqa ¿imanirtaq Espíritu Santuta mana cäsur Moisés qellqashqan leykunataraq cumplita munëkäyanki? 4Tsënö karqa ¿manakaqllapaqku Jesucristuta chaskikuyashqëkipita jipayarqunki? Manachi manakaqllapaqqa jipayankimantsu karqan.

5¿Tsë leykunata cumpliyashqëkipitatsuraq Espíritu Santuta Teyta Dios qoyäshurqunki? Jina ¿leykunata cumpliyashqëkipitatsuraq qamkunachö milagrukunata ruran? Manam tsëpitatsu, sinöqa Jesucristupa alli willakïninta wiyar pëman markäkuyashqëkipitam.

Abrahamnö markäkur salvashqa kanqantsik

6Markäkuptinmi Abrahamtapis jutsannaqtana Teyta Dios chaskirqan.#Gén. 15.6; Rom. 4.3. 7Shumaq käyikuyë. Teyta Diosman noqantsikpis markäkurqa pï casta karpis Abrahampa castanmi këkantsik.#Rom. 4.16.

8Teyta Diospa palabranmi nikan mana Israel nunakunatapis pëman markäkuyashqanpita Teyta Dios perdonananpaq kashqanta. Tsëmi alli willakïninta Abrahamta Teyta Dios willar kënö nirqan: <<Qam rëkurmi llapan casta nunakunapis bendicionnïta chaskiyanqa>>.#Gén. 12.3.

9Tsëmi Teyta Diosman markäkur Abraham bendicionta chaskishqannö noqantsikpis bendicionta chaskikantsik.#3.9 Tsë bendicionqa salvacionmi këkan (Hech. 3.26).

10 Moisés qellqashqan leykunata cumpliyashqanpita salvashqa kayashqanta yarpaqkunaqa llapanpis maldisishqam këkäyan. Teyta Diospa palabranchöpis kënömi qellqarëkan: <<Qellqarëkaq leykunata llapanta mana cumpliq kaqqa maldisishqam kanqa>> nir.#Deut. 27.26.

11Tsënö këkaptinqa Moisés qellqashqan leykunawanqa manam pipis salvakuyanqatsu. Tsëpaqmi Teyta Diospa palabranchö kënö qellqarëkan: <<Munashqänö kawaq nunaqa noqaman markäkamurmi kawanqa>>.#Hab. 2.4; Rom. 1.17.

12Moisés qellqashqan leykunaqa manam Diosman markäkur salvakunantsikpaqtsu nikan, sinöqa kënömi nikan: <<Leynïkunata cumpliq kaq nunaqa llapantam cumplinman>>.#Lev. 18.5; Rom. 10.5.

13Tsënö kaptinpis tsë leykunata cumplita mana puëdirmi maldisishqa karqantsik. Tsëmi noqantsikpa rantintsik Jesucristo maldisishqa wanur salvamarquntsik. Teyta Diospa palabranchöpis kënömi qellqarëkan: <<Pï nunapa ayanpis qeruchö warkurëkaptin tsë nuna maldisishqam kanqa>>.#Deut. 21.23.

14Jesucristupis tsënömi wanurqan Abrahamta Teyta Dios änishqan bendicionta mana Israel kaq nunakunapis chaskiyänanpaq. Tsëmi Jesucristuman markäkur Teyta Dios änikushqan Espíritu Santuta chaskintsik.

Abrahamta Teyta Dios äninqan

15Wawqikuna y panikuna, kananqa nunakuna rurayashqan testamentuman iwalatsikïpam käyitsiyashqëki. Musyashqantsiknöpis testamentuta rurar firmaptinqa manam pipis manakaqpaq churanmantsu ni imatapis yapanmantsu. Tsënöllam Teyta Dios änikushqanpis këkan.

16Pë änikushqanqa Abrahampaq y pëpita miraqpaqmi këkan. Teyta Dios manam nishqatsu Abrahampita llapan miraqkunapaq tsë änikushqan kashqanta, sinöqa pëpita miraq jukllëllapaq kashqantam nishqa.#3.16 Tsënömi nin Gén. 12.7 versïculuchö. Hebreo y griego idiömachöqa atska miraqkuna nishqan y jukllëlla miraq nishqanpis tsë palabrallam këkan. Tsënö nir Jesucristupaqmi parlëkarqan.

17Tsëmi niyaq: Abrahamwan pactuta [Cristuchö] rurashqanpita chusku pachak kima chunka (430) wata pasashqanchöran Teyta Dios leyninkunata Moisésta qoykurqan.#Éxo. 12.40. Qepataraq shamushqa karmi Abrahamta änishqanta ushakätsishqatsu. 18Tsënö kaptinmi Moisés qellqashqan leykunata cumplishqantsikpitatsu salvacionta chaskintsik, sinöqa Abrahamta änishqanta Teyta Dios cumpliptinmi. Moisés qellqashqan leykunata cumplishqantsikpita salvacionta chaskishqaqa Teyta Dios änikushqanpis manakaqllapaqchi kanman karqan.#Rom. 4.14.

Moisés qellqanqan leykuna imapaq kanqanpis

19Tsëpinqa ¿imapaqtaq tsë leykuna këkäyan? Tsë leykunataqa Moisésta musyatsirqan nunakuna jutsayuq kayashqanta käyikuyänanpaqmi.#Rom. 3.20; 7.7. Tsënö kaptinpis tsë leykunaqa Jesucristo shamushqanyaqllam karqan. Pëmi Abrahamta Teyta Dios äninqan nuna këkan.

Tsënöllam Teyta Dios leyninkunata angelkunawan Moisésta qoykutsirqan.#Hech. 7.38, 53; Heb. 2.2. Moisésnam tsë leykunata willaparqan nunakunata. 20Abrahamta änirqa jukwan willakatsinanpa rantin kikin Teyta Diosmi parlaparqan.

21Tsënö këkaptinqa ¿Teyta Diospa leyninkuna salvamänantsikpaqtsuraq këkan? ¡Manam! Tsë leykuna salvamänantsikpaq kaptinqa änikushqantam Teyta Dios manakaqpaq churanman karqan. Salvamänantsikpaq kaptinqa leyninkunata cumplirmi salvakushwan karqan. 22Teyta Diospa palabranmi nikan llapantsikpis jutsayuq kashqantsikta. Jesucristuman markäkurninran Teyta Dios änikushqanta chaskikur salvakuntsik.

23Jesucristuman manaraq markäkushqam Moisés qellqashqan leykuna munëninchö katsimarqantsik. Tsënö katsimarqantsik Jesucristo shamushqanyaqmi. 24Tsurinta rïcu nuna wätëninpa munëninman churashqannömi noqantsiktapis Teyta Dios tsë leykunapa munëninman churamarquntsik. Tsënö churamarquntsik Jesucristo shamuptin pëman markäkur salvakunantsikpaqmi. 25Wamra winar wätaqninpa munëninchö manana kashqannömi Jesucristuman markäkur Moisés qellqashqan leykunapa munëninchönatsu këkantsik.

Teyta Diospa wamranna kanqantsik

26Wawqikuna y panikuna, Jesucristuman markäkurmi kananqa Teyta Diospa wamrankunana këkantsik. 27Jina bautizakurmi Jesucristuwan juknölla kar pëpa munëninchöna këkantsik. 28Tsëmi Israel nuna karpis o mana Israel nuna karpis, esclävu karpis o mana esclävu karpis, ollqu karpis o warmi karpis Jesucristuchö karqa Teyta Diospa wamranna këkantsik. 29Tsënöllam Jesucristuta chaskikur Abrahampita miraqna këkantsik. Tsënöpam Abrahamta Teyta Dios änishqanta noqantsikpis chaskintsik.#Rom. 4.13.

Currently Selected:

Gálatas 3: qwhB

Highlight

Copy

Compare