Ezequiel 48

Norti läduchö Israel trïbukunapaq chakrankuna mëchö kananpaqpis ninqan

1<<Kanan käyitsishqëki Israel trïbukunapa chakrankuna mëpa kananpaq kashqantapis. Dan trïbu nunakuna chaskiyashqan chakrankunaqa Israel nacionpa norti lädunchömi kanqa. Pëkunapa mojunnin Hetlón markapa ëwaq nänipam pasanqa Hamat partiyaq. Tsëpitam chanqa Hazar-enányaq. Tsë këkan Damascupa y Hamatpa sur kaq mojunnin tinkuqchömi. Dan trïbu nunakuna chaskiyashqan chakrapa largun kanqa Israel nacionpa llapan achunnömi. Tsëmi inti yarqamunan kaq lädu mojunpita hasta inti jeqanan kaq lädu mojunyaq kanqa.

2<<Dan trïbu nunakuna chaskiyashqan chakrapita sur läduchömi Aser trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

3<<Aser trïbu nunakuna chaskiyashqan chakrapita sur läduchömi Neftalí trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

4<<Neftalí trïbu nunakuna chaskiyashqan chakrapita sur läduchömi Manasés trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

5<<Manasés trïbu nunakuna chaskiyashqan chakrapita sur läduchömi Efraín trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

6<<Efraín trïbu nunakuna chaskiyashqan chakrapita sur läduchömi Rubén trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

7<<Rubén trïbu nunakuna chaskiyashqan chakrapita sur läduchömi Judá trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

Judá trïbupa chakranpita sur läduchö këkaq partita imanö rachiyänanpaq ninqan

Ezequiel 45.1-6

8<<Judá trïbu nunakuna chaskiyashqan chakrapita sur kaq läduchö juk partita rachiyanki. Anchun kanqa chunka ishkë lëwa pullanmi. Largunnam kanqa inti yarqamunan kaq lädupita inti jeqanan kaq läduyaq. Tsëmi lädun kaq trïbukuna chaskiyashqan chakrapa largunnölla kanqa. Tsë parti chöpinchömi templu kanqa.

9<<Tsëchö noqapaq rachiyashqëki partipa largun kanqa ishkë lëwa pullanmi y anchunnam kanqa juk lëwa. 10Tsë partiqa sacerdötikunapaqmi kanqa. Norti kaq lädupam largun kanqa ishkë lëwa pullan. Inti jeqanan lädupam anchun kanqa juk lëwa. Tsënöllam inti yarqamunan lädupa anchun kanqa juk lëwa. Sur lädupam largun kanqa ishkë lëwa pullan. Tsë partipa chöpinchömi templü kanqa.

11<<Sacerdötikunapaq rachiyashqëki partiqa kanqa sirwimaq Sadoc sacerdötipita miraq sacerdötikuna täräyänanpaqmi. Israel nunakuna y levitakuna mana wiyayämaptinpis pëkunaqa wiyayämarqanmi. 12Noqapaq rachiyashqëki chakrachö sacerdötikunapaq rachiyashqëki partiqa alläpa sagrädum kanqa. Levitakunapa chakran lädunchömi kanqa.

13<<Sacerdötikunapa chakran lädunchömi levitakunapa chakrankuna kanqa. Largunmi kanqa ishkë lëwa pullan y anchunmi kanqa juk lëwa. 14Tsë chakrata manam rantikuyanqatsu, trocakuyanqatsu ni pitapis qoykuyanqatsu. Tsë chakraqa noqapaq karmi sagrädu këkan.

15<<Sobraq kaq partipa largunnam kanqa ishkë lëwa pullan y anchunnam kanqa pullan lëwa. Tsë partiqa manam sagrädutsu kanqa, sinöqa lluta nunakuna täkuyänanpaq y wätankunata mitsikuyänanpaqmi kanqa.

<<Tsë parti chöpichönam marka kanqa. 16Tsë markapa largunpis anchunpis tsë tamäñullam kanqa. Cada lädupa largunmi kanqa ishkë waranqa ishkë pachak pitsqa chunka (2,250) metru. 17Markapa lädunkunapanam wätëkikunata mitsikuyänëkipaq tumariq qewa kanqa. Tsë qewa kashqanpa anchunpis largunpis juk pachak ishkë chunka pitsqa (125) metrum kanqa.

18<<Markapa ishkan lädunpa sobraq kaqnam rakiyashqëki sagrädu partipa lädunchö kanqa. Inti yarqamunan lädupa largunmi juk lëwa kanqa y inti jeqanan kaq lädupapis largun juk lëwam kanqa. Markachö täraq nunakuna mikuyänanpaqmi tsë ishkan läduchö murukuyanqa. 19Markachö täraq Israel nunakuna mëqan trïbu karpis tsë chakrakunachömi murukuyanqa.

20<<Sacerdötikunapaq, levitakunapaq, markakunata shäritsiyänanpaq y murukuyänanpaq rakiyashqëki partiqa anchunpis largunpis llapanran ishkë lëwa pullan kanqa.

Mandakuq autoridäpaq rachiyanqan imanö kananpaq ninqan

Ezequiel 45.7-8

21<<Mandakuq autoridäpa chakranpis kanqam. Pëpa chakranpa chöpinchömi sagrädu partikuna y markata shäritsiyänanpaq rachiyashqëki partikuna kanqa. Tsëmi mandakuq autoridäpa chakranpa anchun ishkë lëwa pullan kanqa. Largunnam kanqa Israel nacionpa juk kaq mojunnin kuchunpita hasta juk kaq mojunnin kuchunyaq.

<<Tsë chakrapa chöpinchö këkaq partiqa sagrädum kanqa. Tsëchömi templupis kanqa. 22Tsë chöpi kaq partichömi Leví trïbu nunakunapa chakranpis y markata shäritsiyänanpaq rachiyashqëki partipis kanqa. Norti läduchömi Judá trïbu nunakunapa chakran kanqa. Sur läduchönam Benjamín trïbu nunakunapa chakran kanqa.

Sur läduchö Israel trïbukunapaq chakrankuna mëchö kananpaqpis ninqan

23<<Tsëpita sur lädupam wakin trïbukunapa chakrankunapis kanqa. Benjamín trïbu nunakunapa chakranpa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

24<<Benjamín trïbu nunakuna chaskiyashqan chakrapita sur läduchömi Simeón trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

25<<Simeón trïbu nunakuna chaskiyashqan chakrapita sur läduchömi Isacar trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

26<<Isacar trïbu nunakuna chaskiyashqan chakrapita sur läduchömi Zabulón trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi.

27<<Zabulón trïbu nunakuna chaskiyashqan chakrapita sur läduchömi Gad trïbu nunakunapa chakran kanqa. Tsë chakrapa mojunnin kanqa inti yarqamunan lädupapis y inti jeqanan lädupapis nacionninpa mojunnin kashqannömi. 28Gad trïbu nunakuna chaskiyashqan chakrankunapa sur kaq mojunnin Tamarpita qallëkur Meriba-cadeschö yaku këkaqpam pasakunqa. Tsëpita Egipto uranyaq pasarmi jatun Mediterráneo Lamaryaq chanqa.

29<<Tsënöpam Israel nunakunata trïbunpa trïbunpa chakrankuna rakiyanki>>. Teyta Diosmi tsënö nin.

Markapa sawan punkunkuna imanö kananpaq ninqan

30<<Kanan käyitsishqëki markapa sawan punkunkuna imanö kayänanpaq kashqantapis. Norti lädunpam largun ishkë waranqa ishkë pachak pitsqa chunka (2,250) metru kanqa. 31Cada punkupa shutinmi kanqa Israel trïbukunapa shutin. Norti kaq lädupam kanqa Rubén punku, Judá punku y Leví punku.

32<<Inti yarqamunan lädupapis markapa largun ishkë waranqa ishkë pachak pitsqa chunka (2,250) metrum kanqa. Tsë läduchömi kanqa José punku, Benjamín punku y Dan punku.

33<<Sur lädupapis markapa largun ishkë waranqa ishkë pachak pitsqa chunka (2,250) metrum kanqa. Tsë läduchömi kanqa Simeón punku, Isacar punku y Zabulón punku.

34<<Inti jeqanan lädupapis markapa largun ishkë waranqa ishkë pachak pitsqa chunka (2,250) metrum kanqa. Tsë läduchömi kanqa Gad punku, Aser punku y Neftalí punku. 35Markapa tumariq murällanqa isqun waranqa (9,000) metrum kanqa. Tsë markapam shutin imëyaqpis kanqa Teyta Dios Täkunan#48.35 Hebreo idiömachömi shutin këkan Yahweh Shammah.>>.

Currently Selected:

Ezequiel 48: qwhB

Highlight

Copy

Compare