Ezequiel 47

Templupita pashtamuq yaku imanö kanqan

1Tsëpitanam tsë nuna templu punkuman kutitsimarqan. Tsëchömi rikarqä kikin punkupa marcun chakinpita yaku pashtëkämuqta.#Joel 3.18; Zac. 13.1; 14.8; Juan 7.38; Apoc. 22.1. Altarpa sur lädunpa pasarnin inti yarqamunan lädupa ëwëkaqtam tsë yakuta rikarqä. 2Tsëpitanam ruri kaq patiupita y jatun kaq patiupita norti lädu punkupa waqtayaq jorqaramarnï inti yarqamunan lädu punkuman pushamarqan. Tsëchömi punkupita sur lädunpa yaku yarqëkämuqta rikarqä.

3Tsëpitanam cordelta tsararkur inti yarqamunan kaq lädumanpa ëwëkur pitsqa pachak (500) metruta tsë nuna medirqan. Tsë medishqan kaqpa tsimpatsimaptinmi utsuputüyaqlla yaku chämarqan. 4Yapë pitsqa pachak (500) metruta medirir tsimpatsimaptinmi qonqüyaqna yaku chämarqan. Tsëpita yapë pitsqa pachak (500) metruyaq medirir tsimpatsimaptinnam tseqlläyaqna yaku chämarqan. 5Yapë pitsqa pachak (500) metruta mediptinqa mananam chakillapa tsimpëta puëdirqänatsu, sinöqa tsë mayu alläpa atskayashqa kaptinmi nadëparaq tsimparqä. 6Tsëpitanam kënö nimarqan: <<Llapan rikashqëkita shumaq käyikï>>.

Tsëpitam mayu kuchunllapa kutitsikamarqan. 7Kutirmi mayupa ishkan kuchunkunachö atska montikunata rikarqä. 8Tsëmi kënö nimarqan: <<Kë yaku inti yarqamunan kaq lädupam ëwëkan. Arabá pampapa pasarmi Kachi Lamarman chëkan. Tsëman chärirmi aqayaq yakuta alli yakuman tikratsinqa. 9Mëmanpis kë yaku chashqan kaqchöqa tukïläya animalkunam kawayanqa. Aqayaq yakuta mishkiqman tikraratsiptinmi atska pescädukunapis kanqa. Mëmanpis kë yaku chanqanchöqa llapanmi kawayanqa.

10<<En-gadi partipita En-eglaim partiyaqmi kë mayu kuchunkunachö pescädu tsariqkunapis atarräyankunata tsakitsir majarätsiyanqa. Mediterráneo Lamarchönöran tukïläya pescädukuna atska kanqa. 11Tsënö kaptinpis senigankuna y qochankunaqa kashqannöllam aqayaq kanqa.

12<<Kë mayupa ishkan kuchunkunachömi tukïläya früta wayuq montikuna winayanqa. Raprankuna mana shushuptinmi imëyaqpis wayuyanqa. Templupita yarqamuq yaku kuchunchö karmi wayïninkunapis tiempunchö poqunqa. Tsë wayïninmi mikunapaq kanqa y raprankunanam jampipaq kanqa>>.#Apoc. 22.2.

Israel nacionpa mojunninkuna imanö kanqan

13 Teyta Diosmi nin: <<Kananmi käyitsishqëki chunka ishkë trïbu Israel nunakuna chakrata chaskiyaptin mëpa mëpa mojunninkuna kananpaq kashqanta.#Núm. 34.1-12. Josépita miraqkunaqa ishkë trïbupaq kaqtanömi chakrata chaskiyanqa.#47.13 Josépita miraqkunachömi Efraín trïbupis Manasés trïbupis karqan. 14Wakin trïbukunaqa iwal iwalmi chakrata chaskiyanqa. Unë castëkikunata kë nacionta qoykushqa kaptïmi kë nación qamkunapa kanqa.

15<<Norti lädupam Israel nacionpa mojunnin Mediterráneo jatun lamarpita qallëkur Hetlón markapa ëwaq nänipa pasanqa Zedad partiyaq. 16Tsëpitam pasanqa Hamat, Berota y Sibraim partikunapa. Sibraim parti këkan Damascupita Hamatman ëwaqchömi. Tsëpita pasanqa Hazar-haticón partipa. Tsë parti tinkïkan Haurán partiwanmi. 17Tsëmi norti lädupa tinkuq mojun pasanqa Mediterráneo Lamarpita Hazar-enán partiyaq. Tsë kanqa Damasco norti läduchö y Hamat sur läduchömi.

18<<Inti yarqamunan lädupanam Israel nacionpa mojunnin Haurán partipa y Damasco partipa pasanqa. Tsëpita Jordán mayupa ëwar inti yarqamunan kaq lädu lamar#47.18 Inti yarqamunan kaq lädu lamarqa Kachi Lamarmi këkan. lädun Tamar markayaqmi chanqa. Jordán mayu kë tsimpanchömi Israel nación kanqa y wak tsimpanchönam Galaad kanqa.

19<<Sur lädupanam Israel nacionpa mojunnin kanqa Tamar markapita qallëkur Cadeschö këkaq Meriba yakupa pasar Mediterráneo jatun lamaryaq. Tsënömi sur lädupa mojunnin kanqa.

20<<Inti jeqanan lädupanam Mediterráneo Lamar kuchunllapa Israel nacionpa mojunnin kanqa. Tsë kuchunpam norti lädupa pasanqa Hamat partiman chanqanyaq. Tsënömi inti jeqanan lädupa mojunnin kanqa.

Chakrata rachinakuyanqan

21<<Nacionnikita chunka ishkë Israel trïbupura rachinakuyanki. 22Tsëpitana cada trïbu chaskishqanchö nunakunata chakrata rachir chaskiyänanpaq sortiyayanki. Qamkunachö yurikuq forastëru nunakunapa tsurinkuna kaptinpis tsënö sortiyëpa qoykuyanki. Markëkikunachö yurikuq forastëru nunakunatapis Israel nunatanöna rikäyanki. Tsëmi marka mayikikunata chakrata rachiyashqëkinölla pëkunatapis rachiyanki. 23Mëchöpis täräyashqan trïbuchömi forastëru nunakunapis chakrankuna chaskiyanqa>>. Teyta Diosmi tsënö nin.

Currently Selected:

Ezequiel 47: qwhB

Highlight

Copy

Compare