Éxodo 33

Israel nunakuna ëwar sïguiyänanpaq käyitsinqan

1 Teyta Dios Moisésta jina nirqam: <<Kananqa Egiptupita jorqamushqëki nunakunata pusharkur ëwë Abrahamta,#Gén. 12.7. Isaacta#Gén. 26.3. y Jacobta#Gén. 28.13. äninqä nacionman. Tsë naciontam änirqä pëkunapita miraqkunata qoykunäpaq. 2Qamkunata yanapayäshunëkipaqmi angelnïta kachamushaq. Tsëman chäriptikinam cananeo nunakunata, amorreo nunakunata, heteo nunakunata, ferezeo nunakunata, heveo nunakunata y jebuseo nunakunatapis qarqushaq. 3Yakunöraq atska lichipis mielpis kanqan nacionman ëwayë. Tsënö kaptinpis mana wiyakuq kullu rinri kayaptikim qamkunawan ëwashaqtsu. Capaz qamkunawan ëwarqa nänichö ushakäratsiyaqmanpis>>.

4 Teyta Dios tsënö ninqanta Moisés willakuptinmi Israel nunakuna alläpa llakikur alli ratashninkunata ni alhäjakunataqa yakakuyarqannatsu. 5Tsënöqa llakikuyarqan Moisésta Teyta Dios kënö nishqa kaptinmi: <<Qamkunaqa mana wiyakuq kullu rinri nunakunam kayanki. Sitsun qamkunawan rätullapis karïman, paqwëpam ushakäratsiyaqman. Jinallachö qotukuyë alhäjëkikunata y alli ratashnikikuna yakaräyanqëkita. Yarpakachäshaqran imanö castigayänaqpaq kashqantapis>>.

6Tsënö niptinmi Horeb#33.6 Horeb jirka y Sinaí jirka tsëllam këkan. jirkapita ewkunqanpita patsa Israel nunakuna yakakuyarqannatsu alli ratashta ni alhäjankunata.

Tinkuna Tolduchö Moiséswan Teyta Dios parlayanqan

7Israel nunakunapa toldunkunapita mas karullachömi Moisésqa juk tolduta shäritsirqan. Tsëtam shutitsirqan Tinkuna Toldu nir.#33.7 Kë Tinkuna Tolduqa manam Israel nunakuna tärashqan toldukuna chöpinchö Tinkuna Toldutsu, sinöqa jukmi. Pipis Teyta Diosta ashita munarqa tsë toldumanran ëwayaq.

8Moisés tsëman ëwaptinmi Israel nunakunaqa toldu punkunkunapita shëkur rikaräyaq Tinkuna Toldu rurinman Moisés yëkunqanyaq. 9Moisés yëkuriptinnam tsë toldu punkuman pukutë urämuq. Moiséswan Teyta Dios parlanqanyaqnam toldu punkuchö pukutë shëkaq. 10Tsë toldu punkuchö pukutë shëkaqta rikarnam llapan nunakuna toldunkuna punkullapita Teyta Diosta adorayaq. 11Yanasanwan nuna parlaqnömi Diosqa Moiséswan parlayaq. Tsënö parlarirran Moisésqa nunakuna kashqanman kutiq. Moisésta yanapaq jövin Josuéqa Tinkuna Toldupita imëpis manam yarquqtsu. Josuéqa karqan Nunpa tsurinmi.

Teyta Diospa qaqllanta Moisés rikëta munanqan

12Moisésmi Teyta Diosta kënö nirqan: <<Teyta, kë nunakunata pushanäpaqmi nimashqanki. Tsënö kaptinpis manam willamankitsu yanaqämänanpaq pita churanqëkitapis. Tsënöllam nimarqunki allipa rikämanqëkita y ankupämanqëkita. 13Rasunpa ankupäyämarnïqa imanö kawayänäpaq kanqantapis käyïkatsimë. Tsënöpachiri imëpis ankupëkämanqëkita käyishaq. Ama qonqarillëtsu kë nunakunata kikiki akranqëkita>>.

14Tsëmi Teyta Dios nirqan: <<Kikïmi yanaqashqëki. Noqam jamaratsishqëki>>.#Mat. 11.28-29.

15Tsënö niptinnam Moisés nirqan: <<Qam mana yanaqämänëki kaptinqa këpita ama jorqayämëtsu. 16Mana yanaqämaptikiqa ¿imanöraq musyayäshaq noqakunata ankupäyämanqëkita? Jina ¿imanöpataq musyayäshaq wakin casta nunakunapitapis mas noqakunata kuyayämanqëkita?>>

17Teyta Diosnam nirqan: <<Yanasä kaptikim ankuparniki mañakamanqëkinö qamkunata yanaqäyashqëki>>.

18Tsënam Moisésqa nirqan: <<Teyta, rowakullashqëki. Qamtam rikënikita munarilla>>.

19Tsënö niptinmi Moisésta Teyta Dios nirqan: <<Ankupanqätaqa ankupämi. Perdonëta munanqätaqa perdonämi. Tsëmi nöpëkipa pasar ankupäkuq kanqäta musyatsishqëki. Tsënömi shutï Yahweh kanqanta willashqëki. 20Tsënö kaptinpis qaqllätaqa manam rikankimantsu. Pipis qaqlläta rikaq kaqqa wanunqam>>.#Rom. 9.15.

21Jina kënömi Teyta Dios nirqan: <<Këkanqäman witimur qaqa jananman shäkaramï. 22Puntëkita pasarmi qaqa kichakashqaman yëkatsishqëki. Nïkurmi makïwan tsaparkushqëki pasanqäyaq. 23Pasarir makïta jorquptïnam waqtällatana rikanki. Manam qaqllätaqa rikankimantsu>>.

Currently Selected:

Éxodo 33: qwhB

Highlight

Copy

Compare