Éxodo 34

Ankupäkuq kanqanta Teyta Dios willanqan

Deuteronomio 10.1-5

1Moiséstam Teyta Dios nirqan: <<Punta kaqtanölla ishkë llapsha rumikunata rurë. Tsë rumikunamannam pakinqëki rumikunachö qellqanqätanö yapë qellqashaq. 2Alistakï noqa këkanqä Sinaí jirkaman warë qoya witsämunëkipaq. 3Qamwanqa pipis ama shamutsuntsu. Tsënölla Sinaí jirkapa pipis ama puritsuntsu. Tsë jirkachö üshata, chiwata ni wäkata pipis ama mitsiyätsuntsu>>.

4Tsënö niptinmi punta kaqtanö ishkë llapsha rumikunata Moisés rurarqan. Tsëpitanam waränin qoyana Teyta Dios ninqannö ishkan läja rumita aparkur Sinaí jirkaman witsarqan. 5Jirkachö këkaptinnam pukutë rurinchö Teyta Dios urämur shutin Yahweh kanqanta willarqan. 6Shutinta willarmi Moiséspa puntanta pasar nirqan:

<<¡Yahweh! ¡Yahweh!

Ankupäkuq y perdonakuq Diosmi kä.

Imapitapis jukllaqa mana piñakuqmi kä.

Alläpa kuyakuqmi kä.

Äninqätaqa imëpis cumplïmi.

7Waranqa waranqa atskaq nunakuna kaptinpis ankupämi.

Mana cäsumar jutsata ruraptinpis perdonämi.

Jutsa rurëta mana jaqiqkunataqa tëtantapis, tsurintapis, willkantapis y willkanpa tsurintapis castigämi>>.#Éxo. 20.5-6; Núm. 14.18; Deut. 5.9-10; 7.9-10.

8Tsënö niptinmi Moisésqa tsë höra qonqurikurqan urkunpis patsaman chanqanyaq. Tsëpitanam Teyta Diosta adorar 9nirqan: <<Teyta Dios, rasunpa ankupäyämarnïqa mana qonqëta yanaqëkalläyämë. Kë nunakunaqa mana wiyakuq kullu rinri nunakunam kayan. Tsënö kaptinpis llutan rurayanqäkunata y jutsata rurayanqäkunata perdonëkalläyämë. Tsënölla herenciëkitanö chaskikalläyämë>>.#34.9 Nunakunapa herencianqa chakra, wayi, qellë o wätakunam. Diospa herencianqa pëta cäsukuq nunakunam.

Israel nunakunawan Teyta Dios pactuta yapë ruranqan

Deuteronomio 7.1-5

10Moisés tsënö niptinmi Teyta Dios nirqan: <<Mañakamanqëkita änirmi pactuta rurashun. Më nacionchöpis ni më markachöpis mana rikäyanqan milagrukunatam qamkunapa nöpëkikunachö rurashaq. Espantëpaq ruranqä milagrukunata rikarmi wakin nación nunakunapis qamkunata yanapayanqaqta musyayanqa.

11<<Kanan mandayanqaqkunata wiyakur cumpliyë. Nöpëkikunapitam qarqushaq amorreo nunakunata, cananeo nunakunata, heteo nunakunata, ferezeo nunakunata, heveo nunakunata y jebuseo nunakunatapis.

12<<Täränëkipaq kaq nacionman charnin tsëchö täraq nunakunawan ama ima pactutapis rurayankitsu. Pactuta rurarqa mana alli costumbrinkunatam yachakuyanki. 13Tsë nunakunapa sacrificiuta kayayänan altarninkunata juchuratsiyanki y adorayanqan wanka rumikunatapis shalluriyanki. Asera diösata adorayänanpaq jawiyashqan titaq qerukunatapis tseqtariyanki.#Deut. 16.21. 14Tsëchö täraq nunakunapa diosninkunamanqa ama qonqurikuyankitsu ni adorayankitsu. Noqallam Teyta Diosniki kä. Juk dioskunata adorayaptikiqa alläpam piñakü.

15<<Tsëmi tsë nacionchö täraq nunakunawan ama ima pactutapis rurayankitsu. Pëkunawan pactuta rurayaptikiqa diosninkunapaq fiestata rurarmi tsëman pushayäshunki. Tsëman ëwarqa paqtam qamkunapis ofrendayanqan mikïkunata mikur diosninkunatapis adorayankiman 16o warmi tsurinkunawanpis tsurikikunata juntëkuyankiman. Juntëkuyaptikiqa diosninkunata adorayänanpaq niyaptin tsurikikuna adorarpis adorëkuyanmanmi.

17<<Ima metalpitapis fundirir dioskunata ama rurayankitsu.#Éxo. 20.4; Lev. 19.4; Deut. 5.8; 27.15.

Watachö fiestakunata rurayänanpaq käyitsinqan

Éxodo 23.14-19; Deuteronomio 16.1-17

18<<Imanöpis rurayänëkipaq nishqänölla Levadürannaq Tanta Mikuna fiestata imëpis rurayanki.#Éxo. 12.14-20; Lev. 23.6-8; Núm. 28.16-25. Tsëchöqa qanchis junaq levadürannaq tantata mikuyanki. Abib killachö Egiptupita yarqayämunqëkita yarparmi Abib killachö tsë fiestata rurayanki.

19<<Wamaqshu tsurikikuna ollqu kaqqa noqapam këkan.#Éxo. 13.2. Tsënöllam wäkëkikunapa, üshëkikunapa y chiwëkikunapa punta kaq wawankuna orqu yurirqa noqapam këkan. 20Ashnupa punta kaq wawan orqu yuriptinqa rantin noqa Teyta Diospaq apayämunki juk mallwa üshata o juk mallwa chiwata. Tsëpa rantin mana apamurqa kunkanta pakiriyanki wanukunanpaq.#Éxo. 13.13. Tsënölla wamaqshu tsurikipa rantintapis noqa Teyta Diospaq ofrendata apayämunki.#Núm. 3.39-51. Adorayämänëkipaq shamurqa ama jinëllaqa shayämunkitsu.

21<<Joqta junaq uryayanki. Murukï tiempu kaptinpis y cosëcha tiempu kaptinpis llapanta jaqirir qanchis kaq junaq jamakuyanki.#Éxo. 20.9-10; 23.12; 31.15; 35.2; Lev. 23.3; Deut. 5.13-14.

22<<Semäna fiestatapis#34.22a Semäna fiestapa juk kaq shutinmi Tsaki Mikï Cosëcha fiesta këkan. Tsëta musyanëkipaq leyinki Éxo. 23.16. rurayanki puntata cosechayanqëki trïguta noqa Teyta Diospaq apëkur.#Lev. 23.15-21; Núm. 28.26-31. Tsënölla wata ushananchö cosëchata ëllur usharirna Cosëcha Ushë fiestatapis rurayanki.#34.22b Cosëcha Ushë fiestapa juk kaq shutinmi Ramäda fiesta këkan. Tsëta musyanëkipaq leyinki Deut. 16.13.#Lev. 23.39-43.

23<<Tsë kima fiestata rurarnin watachö kima kuti llapan ollqu kaqkuna noqata adoramaq shayämunqa.#Éxo. 23.14-17. 24Cada watachö kima kuti noqa Teyta Diosta adoramaq shayämunqëkiyaqqa manam pipis chakrëkita duëñu tukunqatsu. Tsënö mana duëñu tukuyänanpaqmi täranqëki kaq nacionpita tsëchö täraq nunakunata qarqushaq.

25<<Wätakunata noqapaq sacrificiuta kayarqa yawartawan levadürayuq tantata takurkur ama kayayankitsu. Tsënölla Pascua fiestapaq#Éxo. 12.10. rurayanqëki mikï katukunataqa ama waränin junaqpaq churayankitsu.

26<<Murukuyashqëkipita primiciata wayïman apayämunki.#Deut. 26.2.

<<Mallwa chiwapa ëtsanta mamanpa lichintawanqa ama aruyankitsu>>.#Deut. 14.21.

27Tsëpitanam Moisésta Teyta Dios nirqan: <<Ninqä leykunata kanan qellqë. Tsë leykunachömi qamwan y Israel mayikikunawanpis pactu rurashqä qellqarëkanqa>>.

28Imatapis mana mikushpa y mana upushpam Moisésqa tsëchö Teyta Dioswan kayarqan chusku chunka (40) junaq chusku chunka (40) paqas. Tsëchömi llapsha rumikunaman qellqarqan Israel nunakunawan Teyta Dios pactu rurashqanta. Tsë qellqanqankunaqa chunka mandamientukunam këkan.

Moiséspa qaqllan chipapanqan

29Nïkurnam Sinaí jirkapita Moisés kutirqan ishkan llapsha rumikunata aparkur. Tsë rumikunachömi Israel nunakunawan Teyta Dios rurashqan pactu qellqashqa karqan.#Éxo. 34.28. Jirkapita kutirnin Moisésqa manam musyarqantsu Teyta Dioswan parlanqanpita qaqllan chipapëkanqanta. 30Moiséspa qaqllan chipapëkaqta rikëkurmi Aarónpis y Israel nunakunapis mantsayarqan y pëman manam witiyarqantsu. 31Tsënam Aarónta y Israelpa mandakuqninkunata qayëkur Moisés parlaparqan. 32Tsëpitanam wakin Israel nunakunapis Moiséspa nöpanman witiyarqan. Witiyaptinmi willarqan Sinaí jirkachö Teyta Dios ninqankunata.

33Willapar usharirnam Moisésqa qepinawan qaqllanta tsapakurqan. 34Teyta Diospa nöpanman parlaq ëwarnam Moisésqa qepina shukutarëkanqanta jorquriq. Parlanqanpita yarqurnam Teyta Dios ninqankunata Israel nunakunata willaq. 35Willaptinmi Israel nunakuna rikäyaq Moiséspa qaqllan alläpa chipapaqta. Tsëmi Moisésqa qaqllanta qepinanwan shukutakushqalla kakuq Teyta Dioswan parlaq kutinqanyaq.#2Cor. 3.7-16.

Currently Selected:

Éxodo 34: qwhB

Highlight

Copy

Compare