Éxodo 24

Teyta Diosta Israel nunakuna äniyanqan

1Moiséstam Teyta Dios nirqan: <<Aarónta, Nadabta, Abiúta y Israelchö qanchis chunka (70) anciänukunata pusharkur noqa këkanqä jirkaman witsäyämunki. Manaraq chämur karullachö qonqurikuyanqa. 2Tsëpita masqa noqa kaqman ama witiyämutsuntsu. Pëkunata tsëchö jaqirir japallëkilla witsämunki>>.

3Tsënö niptinmi jirkapita Moisés kutïkur Teyta Dios ninqankunata y leyninkunatapis nunakunata willarqan. Tsënam llapan niyarqan: <<Teyta Dios ninqankunataqa llapantam cumpliyäshaq>>.#Éxo. 19.8; Deut. 5.27.

4Äniyaptinmi Teyta Dios ninqankunata Moisés llapanta qellqarqan. Waränin qoya qoyallanam jirka chakinchö altarta perqarqan. Tsëchömi Israel nunakunapa chunka ishkë trïbunkuna kaptin chunka ishkë wanka rumikunata shäritsirqan. 5Tsëpitanam jövinkunata nirqan törukunata pishtarir kayana sacrificiuta y alli päsakï sacrificiuta kayayänanpaq.

6Pishtayanqan törukunapa yawarninta matikunaman Moisés ëllurmi altarman pullanta tsaqtsurqan. 7Tsëpitanam Pactu Libruta nunakunata leyiparqan. Tsëta wiyarmi niyarqan: <<Teyta Dios ninqankunataqa llapantam cäsukuyäshaq>>.

8Tsënö niyaptinmi Moisésqa matikunaman ëllunqan yawarta nunakunapa jananman tsaqtsur nirqan: <<Kë yawarqa noqantsikwan Teyta Dios pactuta rurashqan yawarmi këkan.#Mat. 26.28; Mar. 14.24; Luc. 22.20; 1Cor. 11.25; Heb. 10.29. Mandamientunkunata y leyninkunata qomarnintsikmi noqantsikwan pactuta rurëkan>>.#Heb. 9.19-20.

9Tsëpitanam Sinaí jirkaman witsäyarqan Moisés, Aarón, Nadab, Abiú y Israelchö qanchis chunka (70) anciänukuna. 10Tsëchömi rikäyarqan markäkuyanqan Teyta Diosta. Chakin jaluranqanchömi zafiro rumipita rurashqanö chipapäkur këkarqan. Colorninpis ciëlu niraqmi karqan. 11Teyta Diosta rikäriyaptinpis tsë anciänukunata Teyta Dios manam imanarqantsu. Tsëchömi mikuyarqan y upuyarqan.

Sinaí jirkachö chunka mandamientukunata Moisés chaskinqan

12Moiséstam Teyta Dios nirqan: <<Jirkaman witsämur shuyämë. Tsëchömi llapsha rumichö qellqanqä leykunatawan mandamientukunata qoykushqëki. Tsëtam Israel nunakunata yachatsinki>>.

13Tsënö niptinmi Moisés witsäyarqan yanapaqnin Josuéwan Teyta Dios këkanqan jirkaman. 14Manaraq ëwarmi anciänukunata nirqan: <<Kutiyämunqäyaq këllachö shuyarëkäyämë. Qamkunawanmi Aarónwan Hur quedayanqa. Imapis kaptinqa pëkunaman ëwayanki arreglayäshunëkipaq>>.

15Tsënö käyiratsir jirkaman Moisés witsëkaptinmi jirkata pukutë tsaparirqan. 16Joqta junaqmi Sinaí jirkata pukutë tsapararqan. Tsë pukutëpitam Teyta Diospa chipapëninpis rikakämurqan. Qanchis kaq junaqchönam pukutë rurinpita Moisésta Teyta Dios qayarqan. 17Teyta Diospa chipapënintam nina feyupa rawrakïkaqtanö Israel nunakuna rikäyarqan. 18Moisésta Teyta Dios qayamuptinmi jirkaman witsarnin pukutë rurinman yëkurqan. Tsë jirkachömi chusku chunka (40) junaq y chusku chunka paqas karqan.#Deut. 9.9.

Currently Selected:

Éxodo 24: qwhB

Highlight

Copy

Compare