Éxodo 20

Chunka mandamientukuna

Deuteronomio 5.6-21

1Teyta Diosmi nirqan:

2<<Noqam Teyta Diosniki kä. Egiptuchö esclävu kanqëkipitam jorqamurquq.

3<<Ama juk dioskunamanqa creyinkitsu.

4<<Ama ima ïdulutapis rurankitsu ni ciëluchö këkaq niraqta, ni kë patsachö këkaq niraqta ni lamar rurinchö këkaq niraqtapis. 5Tsëkunamanqa ama qonqurikunkitsu ni adorankitsu.#Éxo. 34.17; Lev. 19.4; 26.1; Deut. 4.15-18; 27.15. Noqallam [puëdiq] Teyta Diosniki kä. Noqallata adoramänëkitam munä. Tsëmi mana cäsumar ïdulukunata adoraqkunataqa castigashaq kikinta, tsurinkunata, willkankunata y willkankunapa tsurinkunatapis. 6Noqata kuyamar mandamientükunata cumpliqkunataqa juk waranqa (1,000) generación kayanqanyaqmi ankupar yanapashaq.#Éxo. 34.6-7; Núm. 14.18; Deut. 7.9-10.

7<<Ama Teyta Diosnikipa shutinta llutallaqa parlankitsu. Shutinta llutalla parlaq kaqtaqa castiganqam.

8<<Ama qonqankitsu jamakï junaq sagrädu kashqanta.#Éxo. 16.23-30; 31.12-14. 9Semänachö joqta junaq uryar llapan ruranëkipaq kaqkunata ruranki. 10Qanchis kaq junaqchöqa Teyta Diosnikita adorar ama uryankitsu.#Éxo. 23.12; 31.15; 34.21; 35.2; Lev. 23.3. Tsënölla ama uryatsinkitsu tsurikikunata ollqutapis warmitapis ni sirwishuqnikikunata ollqutapis warmitapis, ni wätëkikunata ni nacionnikichö forastëru nunakunatapis. 11Teyta Diospis ciëluta, kë patsata, lamarta y llapan imëkatapis joqta junaq kamarirmi qanchis kaq junaq jamakurqan. Tsënö jamanqanpitam tsë junaqta bendisir sagrädu junaq kananpaq churarqan.#Gén. 2.1-3; Éxo. 31.17.

12<<Tëtëkita y mamëkita alli rikanki.#Deut. 27.16; Mat. 15.4; 19.19; Mar. 7.10; 10.19; Luc. 18.20; Efe. 6.2. Tsënöpam Teyta Diosniki qoykushunëkipaq kaq nacionchö atska wata kawanki.#Efe. 6.3.

13<<Ama nuna mayikita wanutsinkitsu.#Gén. 9.6; Lev. 24.17; Mat. 5.21; 19.18; Mar. 10.19; Luc. 18.20; Rom. 13.9; Stg. 2.11.

14<<Ama casakushqa këkar jukwan kakunkitsu.#Lev. 20.10; Mat. 5.27; 19.18; Mar. 10.19; Luc. 18.20; Rom. 13.9; Stg. 2.11.

15<<Ama suwakunkitsu.#Lev. 19.11; Mat. 19.18; Mar. 10.19; Luc. 18.20; Rom. 13.9.

16<<Ama manakaqkunata pitapis tumpankitsu.#Éxo. 23.1; Mat. 19.18; Mar. 10.19; Luc. 18.20.

17<<Ama nuna mayikipa wayinta munapankitsu. Tsënölla ama munapankitsu warminta ni ollqu sirwiqninta ni warmi sirwiqninta ni törunta ni ashnunta ni imëkankunatapis>>.#Rom. 7.7; 13.9.

Israel nunakuna mantsakäyanqan

Deuteronomio 5.22-33

18Tsë höram Israel nunakuna wiyayarqan räyu bunrurunqanta y cornëtata tocamunqanta. Tsënöllam rikäyarqan tillapyämuqta y jirka qoyëkaqta. Tsëmi alläpa mantsakäkur karullapita rikaräyarqan. 19Tsëchömi Moisésta niyarqan: <<Teyta Dioswan parlamunëkipaq qamlla ëwë. Teyta Dios nishunqëkita willayämaptiki llapantam cäsukuyäshaq. Noqakunata Teyta Dios parlapäyämaptinqa wanukuyäshaqchi>>.#Heb. 12.18-19.

20Tsënö niyaptinmi Moisés nirqan: <<Ama mantsakäyëtsu. Teyta Diosqa shamushqa poderyuq kanqanta musyatsiyäshuptiki jutsata mana rurayänëkipaqmi>>.

21Tsëpitanam nunakuna karullachö këkäyaptin yana pukutëchö Teyta Dios këkanqanman Moisés witsarqan.

Altarta imanö rurayänanpaqpis käyitsinqan

22Tsëpitanam Teyta Dios nirqan Moisésta: <<Israel nunakunata kënö ninki: <Teyta Diosmi nin: Ciëlupita parlamunqätam wiyayämarqunki. 23Ama qoripita ni qellëpita ima diostapis rurayankitsu adorakuyänëkipaq.

24<< <Altarta noqapaq allpapita rurayë. Tsëchö kayana sacrificiuta y alli pasakïpaq sacrificiuta kayayanki üshata, chiwata, wäkata o töruta karpis. Mëchöpis adorayämänëkipaq niyanqaqchö tsënö rurayaptikiqa noqa shamurmi bendicionnïta qoyashqëki. 25Noqata adorayämänëkipaq altarta perqarqa mana llaqllashqa rumikunallawan perqayanki.#Deut. 27.5-7; Jos. 8.31. Llaqllashqa rumikunawan perqayaptikiqa manam allitsu kanqa. 26Tsënölla ama rurayankitsu gräda grädataqa. Grädayuqta rurayaptikiqa witsäyaptikim compañonnikikuna rikäkunqa> >>.

Currently Selected:

Éxodo 20: qwhB

Highlight

Copy

Compare