Éxodo 21
21
Sirwiqkuna imanö kayänanpaq ninqan
Deuteronomio 15.12-18
1<<Kë leykunatam Israel nunakunata yachatsinki: 2Hebreo mayinta sirwiqnin kananpaq pipis rantirqa joqta watayaqllam uryatsinqa. Qanchis kaq watachöqa mana imatapis pagashpam librina yarqukunqa. 3Sirwiqnin kananpaq japallan yëkushqa karqa japallanmi yarqukunqa. Warmiyuq yëkushqa karqa warmintinmi yarqukunqa.
4<<Japallan yëkuptin sirwiqnin shipashwan patronnin juntaptinqa sirwikuq këpita yarqur japallanmi yarqukunqa. Tsë sirwiq warmiqa wawankunawan patronninpa makinchömi quedayanqa. 5Patronninta, warminta y wamrankunata jaqita mana munaptinqa 6patronninmi Teyta Diospa nöpanman apanqa.#21.6 Teyta Diospa nöpanman apananpaq nirqa Tinkuna Tolduchö këkaq altarpa nöpanman apananpaqmi nirqan. Wakin traduccionkunam juezkunapa nöpanman niyan. Tsëchönam punkupa marcunman apëkur rinrinta alesnawan uchkurinqa. Tsënö rurariptinmi imëyaqpis sirwiqnin kanqa.#Lev. 25.39-46.
7<<Pipis sirwiq kananpaq warmi tsurinta rantikurqa ama yarpätsuntsu qanchis wata uryanqanpita ollqu sirwiqnö libri yarqukunanpaq kanqanta. 8Tsë shipashta patronnin warmin kananpaq mana munaptinqa castankuna paguëkur ëllukunqam. Warminpaq mana munarpis manam rantikunmantsu mana Israel nunataqa. 9Tsë shipashta tsurintawan juntarqa kikinpa warmi tsurintanömi rikanqa.
10<<Y tsë shipashta watëkar juk warmita ashirqa tsë shipashpaq manam pishïtsinqatsu mikïnin y ratashnin. Y pëwan punïtapis manam jaqinqatsu. 11Mikïtapis ratashtapis mana qorqa y pëwan manana punurqa sirwiqnin kananpaq rantinqanpita imatapis mana cobrashpam libri ewkunanpaq jaqirinqa.
Imanö castigananpaqpis käyitsinqan
12<<Pipis nuna mayinta maqar wanutsiptinqa kikintapis wanutsiyätsun.#Lev. 24.17. 13Noqa destinashqa kaptï pasapukïkurqa rikätsishqä markaman tsë wanutsikuq nuna safatsun.#Núm. 35.10-34; Deut. 19.1-13; Jos. 20.1-9. 14Jina piñarkur nuna mayinta wanutsiptinqa altarnïman ratakuptinpis wanutsiyätsun.
15<<Pipis tëtanta o mamäninta maqaq kaqtaqa wanutsiyätsun.
16<<Pipis nuna mayinta suwar rantikushqa kaptinqa o makinchö tsararëkaptinqa tsë suwakuq nunata wanutsiyätsun.#Deut. 24.7.
17<<Pipis tëtanta o mamäninta mana respetaq kaqtaqa wanutsiyätsun.#Lev. 20.9; Mat. 15.4; Mar. 7.10.
18<<Tsënölla pipis maqanqanchö tsampipapis o kutëpapis cämaranqanyaq maqaptinqa 19tsë maqakuq nuna manam wanutsishqatsu kanqa. Qopinpita tukrunllawanpis#21.19 Wakin nunakunaqa shukshunllawanpis niyanmi. tsë qeshyaq nuna yarqaramuptinqa llapan jampikur gastanqanpitam y mana uryanqanpitam paganqa.
20<<Pipis sirwiqninta warmitapis ollqutapis wanuqpaq wilïkuptinqa castigashqam kanqa. 21Maqanqanpita juk ishkë junaq kawaptinqa tsë patrón manam castigashqatsu kanqa. Tsënöqa kanqa kikinpa sirwiqnin kaptinmi.
22<<Ishkaq nuna maqanakuyanqanchö qeshyaq warmita maqarkuyaptin tsë achäquilla shulluriptinqa juezmanmi demandakunqa. Tsë warmi mana wanuptinqa dañanqanpita warmipa qowan jaqatsakuptin jueznam alli tantiyëkur pagatsinqa. 23Warmi wanuptinqa maqakuq nunatapis wanutsiyanqam.
24<<Nawinta jorqupuptinqa kikinpa nawintapis jorqayätsun. Kirunta jorqupuptinqa kikinpa kiruntapis jorqayätsun.#Lev. 24.19-20; Deut. 19.21; Mat. 5.38. Makinta pakipuptinqa kikinpa makintapis pakiyätsun. Chakinta pakipuptinqa kikinpa chakintapis pakiyätsun. 25Kayëkuptinqa kikintapis kayayätsun. Yawarta jorqupuptinqa kikinpa yawarnintapis jorquyätsun. Maqakuptinqa kikintapis maqayätsun.
26<<Mëqanpis sirwiqninta maqëkar nawinta pashtarapurqa ollqu o warmi kaptinpis librina ewkunanpaqmi jaqirinqa. 27Tsënöllam sirwiqninta maqëkar kirunta jorqurapurqa librina ewkunanpaq jaqirinqa.
Imapis kaptin imata rurayänanpaq käyitsinqan
28<<Ollquta o warmita karpis töru wishtur wanuratsiptinqa tsë töruta tsampipa wanutsiyätsun. Ëtsantapis ama pipis mikutsuntsu. Duëñuntaqa amana demandayätsunnatsu. 29Wishtukïta mäñashqa kar pitapis wishtur wanutsiptinqa tsë törupa duëñuntapis wanutsiyätsun. Tsënö katsun wishtukuq kanqanta musyëkar wätanqan rëkur. Tsënölla töruntapis tsampipa wanutsiyätsun. 30Törupa duëñun wanïta mana munar paguëta munaptinqa mañanqanta pagatsun.
31<<Tsënö katsun ollqu wamrata o warmi wamrata töru wishtuptinpis. 32Sirwikuqtapis töru wishtïpa wanutsiptinqa tsë töruta tsampipa wanutsiyätsun. Ollqu o warmi sirwiq kaptinpis tsënömi kanqa. Tsënölla törupa duëñun kima chunka (30) siclo qellëta pagatsun wanuq sirwiqpa patronninta.
33<<Sitsun pipis pözu uchkunqanta kichëllata jaqirinqa y yaku pözunta tsapanqatsu tsëman töru o ashnu jeqaptinqa 34pözupa duëñun tsë wätakunapa chaninta pagatsun. Y wanuq wätapa ëtsanwanqa pözuyuq duëñunam quedakunqa.
35<<Pipa törunpis juk nunapa törunta maqar wanutsiptinqa kawëkaq töruta rantikuyätsun. Nïkurna tsë qellëta pullanpura rakinakuyätsun. Tsënölla wanushqa törupa ëtsantapis pullanpura rakinakuyätsun. 36Törun wishtukuq kashqanta musyëkar duëñun mana alli watashqanpita jukpa törunta wanutsiptinqa wanushqa kaq törupa duëñunta juk töruta rantin qotsun. Tsë wanuq törupa ëtsanwannam pagakuq kaqna quedakunqa.
Currently Selected:
Éxodo 21: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.