Éxodo 19

Israel nunakuna Sinaí chusyaqman chäyanqan

1Egiptupita yarquyanqanpita kima killatam Sinaí chusyaq jirkaman Israel nunakuna chäyarqan. 2Tsëman chäyänanpaqmi Refidimpita yarqayämurqan. Sinaí chusyaq jirkaman chëkurmi jirka chakinchö toldunkuna shäritsiyarqan quedakuyänanpaq. 3Tsëpitanam Teyta Dioswan tinkunanpaq jirkaman Moisés witsarqan. Tsë jirkapita qayëkamurmi Moisésta Teyta Dios kënö nirqan: <<Israel nunakunata willanki: 4<Qamkuna rikäyarqunkim Egipto nunakunata imanö ushakätsinqätapis. Musyayankim noqaman markäkayämänëkipaq qamkunata imanö ëlluyämunqaqtapis. Wawankunata pichak#19.4 Wakin nunakunaqa águila niyanmi. apanqannömi qamkunatapis Egiptupita apayämurquq.

5<< <Tsëmi llapan niyanqaqkunata cäsumar qamkunawan pactu rurashqäta cumpliyaptikiqa wakin nunakunapitapis mas kuyayashqëki. Jinantin patsachö täraq nunakunata kamashqa karpis qamkunatam mas kuyayashqëki.#Deut. 7.6; 14.2; 26.18; Tito 2.14. 6Qamkunataqa nacionninpim churayashqëki sirwimaq sacerdötikunanö kayänëkipaq. Tsëmi santu kar noqallatana sirwiyämanki>.#1Ped. 2.5, 9; Apoc. 1.6; 5.10. Tsënö ninqaqta Israel nunakunata willë>>.

7Tsëmi Moisésqa kutïkur anciänukunata ëllurir willarqan Teyta Dios ninqankunata. 8Willaptinmi Israel nunakuna juk shimilla niyarqan: <<Teyta Dios ninqantaqa llapantam rurayäshaq>>.

Pëkuna tsënö niyanqantam jirkaman kutïkur Teyta Diosta Moisés willarqan.#Éxo. 24.3; Deut. 5.27.

9Tsënö willaptinmi Moisésta Teyta Dios nirqan: <<Israel nunakuna wiyayänanpaqmi yana pukutë rurinpita parlapashqëki. Tsënöpam imëpis creyiyanqa qamta parlapanqaqta>>.

Israel nunakuna änikuyanqanta Teyta Diosta Moisés willaptinmi 10Teyta Dios nirqan: <<Ëwë nunakunata willanki kanan junaqpis waränin junaqpis purificäkuyänanpaq#Éxo. 19.14-15. y ratashninkunatapis taqshakuyänanpaq. 11Kananpita kima junaqtam llapan rikëkäyämaptin Sinaí jirkaman urämushaq. Tsëpaq alistakushqalla shuyarëkäyämätsun.

12<<Nunakuna jirkaman mana witsäyämunanpaq jirka chakinman señalta tumariq churanki. Nïkur willanki tsëman pipis mana witimunanpaq. Mëqanpis tsë señalta pasaq kaqqa wanutsishqam kanqa. 13Nuna o wäta kaptinpis mana yatashllapa tsampipa o flëchëpa wanutsiyanki. Cornëtata tocarkuyaptinran señal kaqyaq nunakuna witsäyämunqa>>.#Heb. 12.18-20.

14 Teyta Dios tsënö niptinmi Sinaí jirkapita Moisés urämurqan nunakuna alistakuyänanpaq. Tsëmi nunakuna alistakur ratashninkunata taqshayarqan. 15Tsëchömi nunakunata Moisés kënö nirqan: <<Waränin junaqpaq llapëki alistakuyë. Tsë paqaskuna warmikikunawan ama punuyankitsu>>.

16Tsëpita kima junaqtanam patsa warëna räyupis tillapyäkur bunrurukurqan#Apoc. 4.5. y yana pukutëmi jirkatapis tsaparirqan. Cornëtata tocamushqanpis feyupam wiyakamurqan. Tsëmi llapan Israel nunakuna mantsakar katatäyarqan. 17Tsëpita Teyta Dioswan tinkuyänanpaq nunakunata Moisés pushaptinmi jirka chakinllachö shäkuriyarqan. 18Sinaí jirkaman nina chöpinchö Teyta Dios urämushqa kaptinmi jornupitanöraq qoyëpis sharkurqan.#Deut. 4.11-12; 5.4. Tsëmi jirkapis alläpa kuyukurqan. 19Cornëtata tocamunqanpis cada vez mas fuertim wiyakämurqan. Tsëchömi Moisés parlapaptin imëka räyunöraq Teyta Dios yaskimurqan. 20Sinaí jirkaman Teyta Dios urämurmi tsëman witsänanpaq Moisésta qayarqan. Tsëmi jirka puntaman Moisés witsarqan.

21Tsëchömi Teyta Dios nirqan: <<Këpita kutikur nunakunata willë rikäyämänan rëkur señalpita mana pasayämunanpaq. Señalta pasamuq kaqqa llapanmi wanuyanqa. 22Nöpäman witimuq sacerdötikunapis purificäkuyätsunraq. Manatsëqa pëkunatapis wanutsishaqmi>>.

23Tsënö niptinmi Teyta Diosta Moisés nirqan: <<Kikikim nimarqunki señalta pipis mana pasayämunanpaq. Tsëmi kë sagrädu Sinaí jirkaman nunakuna witsäyämunqatsu>>.

24Tsënam Teyta Dios nirqan: <<Ëwar wawqiki Aarónta pushamunki. Paqtam sacerdötikuna y nunakunapis señal churanqëkita pasamur noqa kanqäman witsäyämunman. Pasamuq kaqtaqa llapantam ushakätsishaq>>.

25Tsëmi jirkapita urarkur Teyta Dios ninqankunata nunakunata Moisés willarqan.

Currently Selected:

Éxodo 19: qwhB

Highlight

Copy

Compare