Éxodo 18
18
Moisésta suegrun Jetro watukanqan
1Madianita nunakunapa sacerdötin Jetrum Moiséspa suegrun karqan. Pëmi musyarirqan Moisésta y Israel nunakunatapis Teyta Dios yanapanqanta. Tsënöllam musyarirqan Egiptupita Israel nunakunata Teyta Dios jorqamunqanta.
2Mas puntatanam Moisésqa warmin Séforata tëtan kaqman kutikunanpaq despacharqan. Chäriptinmi Jetruqa tsurin Séforata 3ishkë wawankunatawan chaskirqan.#Hech. 7.29. Tsë markachö forastëru nuna tarashqanpitam Moisés juknin wamranpa shutin churarqan Gersónta.#18.3 Gersón ninanqa forastëru ninanmi.#Éxo. 2.21-22. 4Tsënöllam Moisésqa: <<Tëtä creyikunqan Teyta Diosmi Faraón wanutsimänanpita safamunäpaq yanapamashqa>> nirmi juknin wamranpa shutin churarqan Eliezerta.#18.4 Eliezer ninanqa Teyta Dios yanapaman ninanmi.
5Tsë witsanmi chusyaq jirkachö Israel nunakunawan Moisés quedakushqa këkäyarqan Teyta Dioswan tinkuna jirka cercanchö#Éxo. 3.1; 19.2.. Tsëmanmi willkankunata y Séforata pusharkur suegrun Jetro charqan. 6Chëkurmi Moisésta nirqan: <<Warmikitawan tsurikikunata pusharkurmi watukaqniki shamurqü, wamra>>.
7Tsënam Moisésqa suegrun Jetruta chaskirnin qonqurikur naparnin mutsarqan. Imanö këkäyanqantapis parlarirnam toldunman yëkuyarqan. 8Tsëchömi suegrunta Moisés willarqan Israel nunakunaman qaqar shärir Faraóntawan qatipaq Egipto nunakunata Teyta Dios ushakätsinqanta. Tsënöllam willarqan Egiptupita yarqamur nänichö jipayanqanta y imanö Teyta Dios yanapanqantapis.
9Egiptupita Israel nunakunata Teyta Dios jorqamunqanta willaptinmi Jetruqa alläpa kushikur 10nirqan: <<Teyta Dios alabashqa këkullätsun. Pëmi Faraónpa makinchö kar Egipto nunakuna jipatsiyäshunqëkipita jorqayämushurqunki. 11Egipto nunakuna contrëkikuna këkaqta vencishqa kaptinmi kanan käyikü llapan dioskunapitapis Teyta Dios mas poderyuq kanqanta>>.
12Tsëpitanam Jetruqa wätata pishtarir Teyta Diospaq sacrificiuta rawratsirqan. Wakin wätakunatapis Teyta Diospa nöpanchö#18.12 Teyta Diospa nöpanchö nirqa Tinkuna Tolduchö këkaq altarpa nöpanchömi nin. pishtarmi Aarónwan y precisaq Israel nunakunawan ëtsata mikuyarqan.
Juezkunata Moisés churanqan
Deuteronomio 1.9-18
13Tsëpita waränin junaqnam Israel nunakuna quejakuyanqanta arreglananpaqmi Moisés täkurirqan. Tsëmanmi qoyapita tardiyaq quejakuq ëwayarqan.
14Moisés imanöpis Israel nunakunata arreglaqta rikarmi suegrun nirqan: <<Qoyapita tardiyaq ¿imanirtaq japallëki quejakayämuptin arreglëkanki?>>
15Tsënö niptinnam Moisés nirqan: <<Teyta Diosta mañakur arreglanäpaqmi noqamanqa pëkuna shayämun. 16Kikinpura liryarirmi shayämun mëqanpis jutsayuq kanqanta arreglanäpaq. Nïkurnam pëkunata käyitsï Teyta Diospa estatütunkunata y leyninkunata>>.
17Tsënam suegrun Jetro nirqan: <<Noqapa käyïkïnïpitaqa llapanta japallëki manam rurankimantsu. 18Tsënölla rurarqa pasëpam utirinki. Tsënömi nunakunapis utiriyanqa. Tsëtsika nunakunataqa manam japallëki arreglëta puëdinkitsu. 19Kanan käyitsinqaqta shumaq wiyamë. Käyitsinqaqnö ruranëkipaq Teyta Dios yanapëkulläshï. Teyta Diosta mañakur nunakunata arreglanqëkiqa allim këkan. 20Tsënöllam Teyta Diospa estatütunkunata y leyninkunata yachatsinqëkipis alli këkan. Teyta Dios munanqannö kawayänanpaq yachatsinqëkipis allim këkan. 21Tsënö kaptinpis yanapayäshunëkipaq cabal nunakunata akrë. Pëkuna kayätsun Teyta Diosta mantsakuq, mana ulikuq y sënita mana chaskiq. Pëkunapita wakinta churanki juk waranqa (1,000) nunakunapa jueznin kananpaq, wakintana churanki juk pachak (100) nunakunapa jueznin kananpaq, wakintana churanki pitsqa chunka (50) nunakunapa jueznin kananpaq y wakintana churanki chunka nunakunapa jueznin kananpaq. 22Tsë juezkunanam ima quejakïkuna kaptinpis arreglayanqa. Arreglëta mana puëdiyanqallantanam qamman apayämunqa. Tsënö yanapayäshuptikiqa manam alläpa utikankinatsu. 23Teyta Dios munaptin y käyitsinqaqnö ruraptikiqa kallpëkï kanqaran. Quejakïninkunata shumaq arreglaptikim llapan nunakunapis kushishqa wayinkunaman kutikuyanqa>>.
24Moisésqa suegrun käyitsinqannöllam llapanta rurarqan. 25Tsëmi cabal nunakunata akrarir wakinta churarqan juk waranqa (1,000) nunakunapa jueznin kananpaq, wakintanam churarqan juk pachak (100) nunakunapa jueznin kananpaq, wakintanam churarqan pitsqa chunka (50) nunakunapa jueznin kananpaq y wakintanam churarqan chunka nunakunapa jueznin kananpaq. 26Tsë juezkunanam nunakuna quejakuyanqanta waran waran arreglayaq. Arreglëta mana puëdiyanqantanam pasatsiyaq Moisés arreglananpaq.
27Tsëpitanam suegrunqa Moisésta ëwallä nirir markanman kutikurqan.
Currently Selected:
Éxodo 18: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.