Efesios 6

Tëtankunawan wamrankuna imanö kawayänanpaq

1Wamrakuna, Señornintsik Jesucristuta chaskikushqa këkarqa mamëkita y tëtëkita imëpis cäsukuyë. Tsënö cäsukuyänëkitam Teyta Dios munan.#Col. 3.20. 2Punta kaq mandamientu promësayuq kaqqa kënömi nin: <<Tëtëkita y mamëkita alli rikanki. 3Tsënöpam kë patsachö atska wata kawanki>>.#Éxo. 20.12; Deut. 5.16.

4Wamrayuqkuna, wamrëkikunata ama piñatsiyëtsu.#Col. 3.21. Tsëpa rantinqa Señornintsik Jesucristo munashqannö kawayänanpaq shumaq käyitsiyë.

Esclävuwan patrón alli kawakuyänanpaq

5Esclävukuna, kë patsachö këkaq patronnikikunata cäsur mandayäshunqëkita llapan voluntänikiwan rurayë. Jesucristuta cäsuyashqëkinölla patronnikikunatapis cäsuyë. 6Patronnikikuna rikarëkäyäshuptikillaqa ama uryaq tukuyëtsu, sinöqa Jesucristupa sirwiqnin kar llapan voluntänikikunawan uryayë. Tsënöpam Teyta Dios munashqannö rurayanki.

7Patronnikikuna mandayäshushqëkita llapan voluntänikikunawan rurayë. Manam nunakunallapaqtsu uryëkäyanki, sinöqa Señor Jesucristupaqmi rurëkäyanki. 8Esclävu o mana esclävu kashqapis allita rurashqantsikpitam Jesucristo gloriachö premiuta qomäshun.#Col. 3.22-25.

9Patronkuna, qamkunapis esclävïkikunata shumaq rikäyë. Qayapäyänëkipa rantin gänas gänaslla uryayänanpaq kallpatsayë. Käyikuyë esclävu karpis o patrón karpis ciëluchö këkaq patronpa makinchö këkashqantsikta.#Col. 4.1. Pëqa llapantsiktapis iwalmi rikämantsik.#Deut. 10.17; Col. 3.25.

Supëkunata pärapunantsikpaq käyitsikï

10Wawqikuna y panikuna, Señornintsik Jesucristo poderninwan yanapëkäyäshuptikiqa pëman alli markäkur kawakuyë. 11Diabluta pärapuyänëkipaq Teyta Dios alistamushqan armadürakunata yakakuyë.#Rom. 13.12-14; 1Tes. 5.8. 12Noqantsikqa manam nuna mayintsikwantsu pelyëkantsik, sinöqa puëdiq supëkunawanmi. Pëkunaqa mana rikakuq karpis jinantin patsachömi mana allikunata rurayan. 13Tsënö këkaptinqa Teyta Dios alistamushqan armadürakunata yakakuyë. Alli alistakuyaptikiqa supëkuna shamurpis manam venciyäshunkitsu.

14Wachukïkiqa rasun kaqllata parlayashqëkim.#Isa. 11.5.

Chalëquïkiqa allikunata rurayashqëkim.#Isa. 59.17.

15Bötasnikiqa Jesucristupa willakïninta willakuyashqëkim.#Isa. 52.7.

16Escüdïkiqa Teyta Diosman llapan shonqïkikunawan markäkuyashqëkim. Tsë escüduwanmi nina rawrëkaq flëchawannö Satanás atacayäshuptikipis tsapäkuyanki.#Sal. 7.13.

17Casquïkiqa Teyta Dios salvayäshushqëkim.#Isa. 59.17.

Espädëkiqa Teyta Diospa palabranmi. Tsëwanmi Espíritu Santu imëpis yanapayäshunki.#Heb. 4.12.

18Imë hörapis Espíritu Santu käyitsiyäshushqëkinö Teyta Diosta mañakuyë. Mana ajayëpa imëpis rowakuyë. Markäkuq mayikikunapaqpis mana qonqëta mañakuyë.

19Noqapaqpis Teyta Diosta mañakïkulläyë willapäkur shumaq parlanäpaq y pitapis mana mantsashpa Jesucristupa alli willakïninta willapänäpaq. 20Teyta Diospa willakuqnin kar willakïninta willakushqäpitam prësu këchö llawirëkä. Ima kaptinpis Teyta Diosta mañakïkuyë mana mantsakushpa pitapis willapänäpaq.#Col. 4.2-4.

Cartapa ushanan

21Kuyë wawqintsik Tíquico#Hech. 20.4; 2Tim. 4.12. chämurmi willayäshunki imanö këkashqäta y imata rurëkashqätapis. Pëpis Señor Jesucristupa willakuqninmi këkan. 22Tsëmi pëta kachëkämü imanö këkashqätapis willayäshunëkipaq. Pëmi kallpatsayäshunki Teyta Diosman shumaq markäkuyänëkipaq.#Col. 4.7-8.

23Teyta Dios y Señor Jesucristo yanapëkulläyäshï pëman markäkur kuyanakur alli kawakuyänëkipaq. 24Señornintsik Jesucristuta llapan shonqunkunawan kuyaqkunata Teyta Dios ankupar imëpis yanapëkullätsun. [Tsënö katsun.]

Currently Selected:

Efesios 6: qwhB

Highlight

Copy

Compare