Efesios 5

Teyta Diospa wamrankuna imanö kawayänanpaq ninqan

1Teyta Dios kuyashqan wamrankuna këkarqa pë jutsannaq kashqannö qamkunapis jutsannaq kayë. 2Jesucristo kuyakuq kashqannö qamkunapis kuyakuq kayë. Kuyakuq karmi noqantsik rëkur wanur Teyta Diospaq shumaq pukutaq sacrificiunö kashqa.#Éxo. 29.18.

3Qamkunaqa Teyta Dios kuyashqan santu nunankuna këkarqa fornicación jutsata ama rurayëtsu, codiciösu ama kayëtsu, ni ima jutsatapis ama rurayëtsu. Tsëkunapaqqa parlëllapis ama parlayëtsu. 4Llutankunata, manakaqkunata ni llutan yarpëman apakuq brömakunatapis ama parlayëtsu. Tsëpa rantinqa Teyta Diosta imëkapitapis payllä niyë.

5Këkunata shumaq käyikuyë: fornicación jutsata ruraqkuna y ambiciösu kaqkunaqa Teyta Diospa y Jesucristupa mandakïninman manam yëkuyanqatsu. (Ambiciösu kaqkunaqa ïduluta adoraqnömi këkäyan.) 6Mana cäsukur jutsa ruraqkunataqa Teyta Diosmi piñar castiganqa. Tsënö kaptin jutsata rurayänëkipaq pipis kallpatsayäshuptiki ama cäsuyankitsu. 7Wakin nunakuna jutsata rurayaptinpis qamkunaqa ama rurayankitsu.

8Nöpataqa qamkunapis jutsata rurar paqaschö këkaqnömi kawayarqëki. Kananqa Jesucristuta chaskikurmi aktsichöna kawëkäyanki. Tsënö këkarqa Teyta Dios munashqannö waran waran kawakuyë. 9Aktsichöna kawakurqa#5.9 Wakin griego copiakunachömi aktsichöna kawakur ninanpa rantin Espíritu munashqannö kawakur nin. ankupäkuqmi kayanki, allillatanam rurayanki y rasun kaqllatanam parlayankipis. 10Teyta Diospa shonqunpaqnö kawayänëkipaq imëpis yarpakachäyë.

11Teyta Diosta mana cäsukuq nunakuna llutankunata rurayaptinpis qamkunaqa ama rurayëtsu. Tsëpa rantinqa llutan rurëkunata jaqiriyänanpaq käyitsiyanki. 12Pëkuna pakëllapa jutsata rurayashqanqa alläpa penqakïpaqmi këkan. Tsëkunataqa ama ni parlëllapis parlayëtsu. 13Atsikyaptin imapis rikakushqannömi pëkuna jutsata rurakuyashqanpis musyakanqa.

14Jutsata ruraqkuna käyikuyänanpaq juk parlapis kënömi nin:

<<Punï siki, riyakï.

Wanushqëkipita kawarimï.

Jesucristum aktsishunki>>.

15Tsënö këkaptinqa imanö kawëkäyashqëkitapis shumaq käyikuyë. Mana käyikuq nunanö kawayänëkipa rantin shumaq käyïkuq nunanö kawakuyë. 16Nunakuna mana allita rurar kawayaptinpis qamkunaqa allikunallata imëpis rurayë. 17Mana käyikuq nunanöqa ama kawayëtsu. Tsëpa rantinqa Señornintsik munashqannö kawayänëkipaq shumaq käyikuyë.

18Ama machakuyëtsu. Machashqa nunaqa llutankunatam ruran. Tsëpa rantinqa Espíritu Santupa poderninchö kawakuyë. 19Salmukunata, himnukunata y qotsukunata llapan shonqïkikunawan qotsur Teyta Diosta alabayë. 20Ima kaptinpis Señornintsik Jesucristupa shutinchö Teyta Diosta payllä nikuyë.#Col. 3.16-17.

Casädukuna imanö kawayänanpaqpis

21Jesucristuta mantsakurqa juknintsik juknintsik respetanakur kawakushun.

22Warmikuna, Señor Jesucristuta cäsukuyashqëkinölla qowëkikunatapis cäsukuyë.#Col. 3.18; 1Ped. 3.1. 23Warmiqa qowanpa munëninchömi këkan. Tsënöllam iglesiapis Jesucristupa munëninchö këkan. Iglesiam pëpa cuerpun y pëmi iglesiapa salvaqnin.#Col. 1.18. 24Tsëmi Jesucristuta iglesian cäsukushqannö warmipis qowanta cäsukunan.

25Ollqukuna, iglesiata Jesucristo kuyanqannö warmikikunata kuyayë.#Col. 3.19; 1Ped. 3.7. Iglesiata kuyarmi wanïmanpis Jesucristo charqan. 26Tsënö wanurqan pëman markäkuqkuna Teyta Diospa palabranwan paqashqa kar santu kayänanpaqmi. 27Tsëmi kikinpa nöpanman pushanqa chipapäkïkaqta, mana jutsayuqta, santuta y pë munashqannö këkäyaqta.#2Cor. 11.2; Apoc. 21.2, 9.

28Pipis warminta kuyaqqa kikinpa cuerpuntapis kuyanmi. Tsëmi cuerpunta kuyashqannölla warmintapis kuyanan. 29Manam pipis cuerpunta maltratantsu, sinöqa alli mikurmi cuidan. Tsënöllam Jesucristupis iglesianta cuidan. 30Noqantsikmi Jesucristupa cuerpun, [ëtsan y tullun] këkantsik.#Col. 1.18.

31Teyta Diospa palabranpis kënömi nikan: <<Mamäninpita tëtanpita ollqu yarqukun warminwan mana rakikëpa täkuyänanpaqmi. Tsënö täkurmi ishkanpis jukllëllanö kayanqa>>.#Gén. 2.24.

32Tsë qellqarëkaqqa noqantsikwan Jesucristupis juknölla kashqantsiktam käyitsimantsik. Tsënö käyitsimashqantsikqa alläpa espantakïpaqmi. 33Tsëmi yapëpis niyaq: Cuerpïkikunata kuyayashqëkinölla warmikikunatapis kuyayë. Warmikunapis qowankunata respetayätsun.

Currently Selected:

Efesios 5: qwhB

Highlight

Copy

Compare