Efesios 1

Apóstol Pablo napakunqan

1Éfeso#Hech. 18.19-21; 19.1. markachö salvashqa kaqkuna:

Noqa Pablo, Jesucristupa apostolnin kanäpaq Teyta Dios akramashqa kaptinmi qamkunaman kë cartata cartakämü. Jesucristo munashqannö kawarmi Teyta Diospana këkäyanki. 2Yayantsik Teyta Dios y Señor Jesucristo ankupäyäshurniki alli kawakuyänëkipaq yanapëkulläyäshï.

Teyta Diosta payllä nikunqan

3¡Señor Jesucristupa Teytan Dios alabashqa këkullätsun! Jesucristuchö kashqam gloriachö këkaq tukïläya bendicionninkunata qomarquntsik. 4Kë patsata manaraq kamarmi Jesucristuman churamarnintsik Teyta Dios akramarqantsik pëpa nöpanchö jutsannaq y santu kanantsikpaq. 5Y kuyamarnintsikmi kikin munashqannö destinamarqantsik Jesucristo rëkur wamran kanantsikpaq. 6Kuyë Tsurin rëkur ankupäkuq këninwan destinamashqantsikpitam imëpis pëta alabashun.

7Ankupäkuq karmi Tsurinpa yawarninwan rantimarnintsik llapan jutsantsikkunapita perdonamarquntsik.#Mar. 10.45; 14.24; Heb. 9.12-14; Col. 1.14. 8Alläpa kuyamarnintsikmi y yachëta qomarnintsikmi 9nunakuna mana musyayashqanta Teyta Dios musyatsimarquntsik. 10Tsëmi musyatsimarquntsik ciëluchö kaqkunatapis y kë patsachö kaqkunatapis pë nishqan junaq Jesucristupa makinman llapanta churananpaq kashqanta.

11Kikin yarpashqannö llapantapis ruraq karmi noqantsiktapis Jesucristuchö këkashqana Teyta Dios destinamarquntsik herenciata#Col. 1.12; 3.24; Tito 3.7; Heb. 10.34; 1Ped. 1.4. chaskir salvashqa kanantsikpaq. 12Pëmi permitishqa Israel nunakuna Jesucristuman puntata markäkur pëta alabayänanpaq. 13Qamkunapis alli willakïninta wiyëkurmi Jesucristuman markäkur salvakuyarqunki. Tsënöpam änikushqan Espíritu Santuwan#Luc. 24.49; Juan 14.26; 16.13-15; Hech. 1.4; 2.33. Teyta Dios shonqïkikunata sellamushqa.#2Cor. 1.22; Efe. 4.30. 14Espíritu Santuta qomarnintsikmi Teyta Dios musyatsimantsik herenciantsikta qomänantsikpaq kashqanta y wamran kanantsikpaq rantimashqantsikta. Tsënö salvamashqantsikpitam imëpis pëta alabashun.

Wawqikunapaq y panikunapaq Teyta Diosta mañakunqan

15Tsëmi Señor Jesucristuman shumaq markäkur wawqikunawan y panikunawan kuyanakuyashqëkita musyar 16Teyta Diosta qamkunapaq mañakurmi imëpis pëta payllä nikä. 17Tsënöllam Señornintsik Jesucristupa Tëtan poderyuq Teyta Diosta mañakü Espíritu Santuwan käyikatsiyäshuptiki pëta reqiyänëkipaq. 18Shonqïkikunachö tsënö käyitsiyäshuptikim musyayanki Teyta Dios qayayäshurniki imapaq salvayäshunqëkita, alläpa alli herenciata chaskiyashqëkita#Éxo. 34.9; Deut. 9.26, 29; 32.9; 1Rey. 8.53; Sal. 74.2; 135.4; Isa. 19.25; Jer. 10.16; 51.19. 19y pëman markäkuqkunata poderninwan shumaq yanapashqanta. 20Tsë poderninwanmi Jesucristuta wanushqanpita kawarirkatsimur gloriachö allawka kaq lädunman tätsishqa.#Sal. 110.1. 21Tsënöpam Jesucristuta Teyta Dios churashqa kë vïdachö y wak vïdachöpis poderyuq kananpaq. Tsëmi angelkunapitapis, supëkunapitapis y llapanpitapis puëdiq këkan.

22Tsënö poderyuq kaptinmi llapantapis pëpa poderninman Teyta Dios churashqa.#Sal. 8.6. Iglesiata kuyarmi pëta churashqa llapanpapis mandakuqnin kar peqan kananpaq. 23Noqantsiknam iglesian kar cuerpun këkantsik.#Col. 1.18, 24. Tsëmi imëpis yanapëkämantsik munashqannö kawanantsikpaq. Pëpa makinchömi llapan imëkapis këkan.

Currently Selected:

Efesios 1: qwhB

Highlight

Copy

Compare