Gálatas 6

Nuna mayintsikwan yanapanakunantsikpaq ninqan

1Espíritu Santu munanqannö kawaq wawqikuna y panikuna, markäkuq mayiki jutsata rurëkashqanta musyarqa mana penqapashllapa käyitsiyanki. Paqtam kikikikunapis jutsata rurayankiman. 2Jukniki juknikipis kallpatsanakur yanapanakuyë. Tsënö yanapanakurqa Jesucristo yachatsimashqantsik mandamientunta cumplikäyankim.#Gál. 5.13-14; Lev. 19.18; Mat. 22.36-40; Juan 13.34; 15.12; 1Juan 3.23.

3Imatapis mana musyëkar yachaq tukurqa kikikikunam engañakïkäyanki. 4Yachaq tukuyashqëkipa rantinqa kikikikuna imanö kawëkäyashqëkitapis käyikuyë. Tsënöpam yachaq tukur kushikuyänëkipa rantin Teyta Dios munashqannö kawayashqëkipita kushikuyanki. 5Llapantsikmi imanö kawashqantsiktapis Teyta Diosta cuentata qoshun.

6Jesucristupa willakïninta yachakuqkunaqa yachatsiqninta imallawanpis yanapëkuyätsun.

7Shumaq käyikushun. Teyta Diosta manam engañëta puëdintsiktsu. Imatapis murushqantsiktaqa tsëtam cosechantsik. 8Tsënöllam jutsa rurëllachö kawarqa wanur ushakäshun. Espíritu Santu munanqannö kawarqa wiñë kawëtam tarishun. 9Tsënö këkaptinqa mana ajayashpa allikunallata rurashun.#2Tes. 3.13. Tsënö kawashqaqa Teyta Diosmi imë karpis premiuta qaramäshun. 10Tsëta musyëkarqa kapamashqantsikmannö pïmëtapis yanapëkushun. Jesucristuman markäkuq mayintsiktanäqa masraq yanapëkushun.

Cartapa ushanan

11Kë cartapa ushanantaqa kikïmi jatusaq letrakunawan qellqamü. 12Señalakuyänëkipaq yachatsiyäshuqnikikunaqa Israel mayinkuna alli rikäyänanta munarmi yachëkätsiyäshunki. Qatikachäyänanta mantsarmi Jesucristo cruzchö wanushqanpita salvakushqantsiktaqa yachatsikuyantsu. 13Pëkunaqa señalakurpis manam Moisés qellqashqan leykunata cumpliyantsu. Tsënö karpis leyta cumplitsiyashqanpita alabakuyänanllapaqmi señalakushqa kayänëkita munayan.

14Noqa manam imapitapis alabakütsu. Alabakunäpa rantinmi Señornintsik Jesucristo noqantsik rëkur cruzchö wanushqanpita kushikü. Cruzchö wanushqa kaptinmi kë mundu#6.14 Kë mundupaq parlarqa nunakuna mana allita rurayashqanpaq y mana alli yarpäyashqanpaqmi parlan. noqapaq crucificashqanö këkan y noqapis kë mundupaq crucificashqanönam këkä. 15Tsëmi [Jesucristuchö karqa] manam señalashqa kanqantsiktsu ni mana señalashqa kashqantsiktsu precisan. Mushuq kamashqan nuna kashqantsikmi rasunpaqa sirwin.#Juan 3.3-7; 2Cor. 5.17. 16Tsëta käyikuqkunataqa Teyta Dios ankupar alli rikëkullätsun. Pëkunaqa Teyta Dios kuyashqan Israel nunakunam kayan.#6.16 Wakin nunakunaqa kë versïculuta kënö ninanpaqmi traduciyan: Tsëta käyikuqkunata y kuyanqan Israel nunakunatapis Teyta Dios ankupar alli rikëkullätsun.

17[Señor] Jesucristupa alli willakïninta willakushqäpita maqayämashqan sirallanam cuerpüpis këkan. Tsëmi yachatsikushqäta pipis manakaqpaq churanmantsu.

18Wawqikuna y panikuna, Señornintsik Jesucristo ankupäyäshurniki imëpis yanapëkulläyäshï. Tsënö katsun.

Currently Selected:

Gálatas 6: qwhB

Highlight

Copy

Compare