Daniel 12

Ushanan junaqkunapaq käyitsikïkuna

1<<Tsëpinmi Israel nunakunata cuidaq y angelkunapa mandakuqnin Miguel Israel nunakunaman qaqanqa. Nunakunam alläpa jipakïchö kar llakikuyanqa. Kë patsachö nacionkuna kashqanpita patsa imëpis manam tsënöqa jipakïkuna y llakikïkunapis kashqatsu.#Mat. 24.21; Mar. 13.19; Apoc. 12.7. Libruchö shutinkuna qellqashqa kaqllam Israel mayikikuna salvakuyanqa.

2<<Tsëpinmi pamparäyashqanpita tsëtsika nunakuna kawariyämunqa. Wakinmi kawariyämunqa wiñëpa kawayänanpaq y wakinnam kawariyämunqa imëyaqpis jipayänanpaq. Jipayänanpaq kawarimuqkunam jutsata rurayashqanpita alläpa penqakushqa kayanqa.#Mat. 25.46; Juan 5.29. 3Yachëyuq nunakunaqa chipapëkaq ciëlunömi atsikyäyanqa. Nunakunata alli kawakuyänanpaq yachatsikuqkunaqa qoyllurkunanöran imëyaqpis chipapäyanqa.

4<<Daniel, willashqaq tiempunkuna chämushqanyaq pitapis ama willëtsu. Qellqarëkaq rölluta cërawan shumaq segurë.#Apoc. 22.10. Nunakunam jinantinpa ëwar puriyanqa yachëyuq këta munar>>.

5Tsëpitanam noqa Daniel rikëkurqä ishkaq nunakunata. Juk kaqmi shëkarqan mayu kë tsimpanchö y juk kaqnam shëkarqan wak tsimpanchö. 6Yaku jananchö shëkaq lïnu ratashllashqa nunatam juk kaq nuna kënö tapukurqan: <<Nishqëkinö mantsëpaq kaqkuna kananpaq ¿ëka junaqnötaq pishikan?>>

7Tsënö tapuptinmi lïnu ratashllashqa nuna mayu jananchö këkashqanpita ishkan makinta pallarirkur wiñëpa kawaq Teyta Diospa shutinchö jurarnin nirqan: <<Llapan tsëkuna cumplinanpaq kima wata pullanmi pishikan. Tsëpinmi Diosman creyikuqkuna pasëpa vencishqa tikrariyanqa>>.

8Tsënö nishqankunata manam shumaqllaqa käyirqätsu. Tsëmi kënö tapurqä: <<Teytallä, tsëpitaqa ¿imataq mas pasakunqa?>>

9Tsëmi kënö nimarqan: <<Daniel, llapanpis tsëkuna sellashqa churaraptinmi pipis musyanqatsu hasta ushanan junaqkuna chämushqanyaq. Qamqa imëpis allita rurar kawakï. 10Atskaq nunakunam käyikuyanqa imanö jiparpis Teyta Diosman markäkur jutsata mana rurashpa kawakuyänanpaq. Jutsa ruraqkunaqa jina jutsata rurar kawayätsun. Pëkuna mana käyikuyaptinpis Dios munashqannö kawaq nunakunaqa käyikuyanqam.

11<<Waran waran sacrificiuta kayayänanta mana permitishqanpita hasta Dios melanashqan kaqta templuman churashqanyaq juk waranqa ishkë pachak isqun chunka (1,290) junaqmi pasanqa.#Mat. 24.15; Mar. 13.14. 12Kushishqam kawayanqa juk waranqa kima pachak kima chunka pitsqa (1,335) junaqyaq mana ajayashpa shuyaraqkunaqa.

13<<Qamqa wanushqëkiyaq Teyta Dios munashqannö kawakï. Ultimu junaqchömi kawarimunki herenciëkita chaskinëkipaq>>.

Currently Selected:

Daniel 12: qwhB

Highlight

Copy

Compare