Daniel 11

Siria nacionpa y Egipto nacionpa reyninkuna pelyayänanpaq willakunqan

1Jina lïnu ratashllashqa nuna kënömi nimarqan: <<Media nacionpita rey Darío juk watana mandakïkaptinmi noqa ángel Miguelta yanapar kallpatsarqä.

2<<Kanan willashqëki imapis pasananpaq kaqkunata. Persia nacionchömi kanqa kima reykuna. Pëkunapa qepanmanpis juk reyran kanqa. Tsë reymi kima kaq reykunapitapis alläpa rïcu kanqa.#11.2 Tsë reypa shutinmi karqan Jerjes. Pëmi 480 wata Jesucristo manaraq yuriptin atska soldädukunawan Grecia nacionta vencita munarpis puëdirqantsu. Rïcuyarnin puëdiq tikrakurirmi llapan mandakushqan nacionkunawan Grecia nacionpa contran shäriyanqa.

3<<Tsëpitanam mas puëdiq rey kanqa.#11.3 Tsë reyqa karqan Grecia nacionpa reynin Alejandro Magnum (336-323 a. C.). Pëmi jinantin nacionkunata vencïkur poderninchö tsararanqa. 4Tsënöpam atska nacionkunata jukllëllana kayänanpaq ëllukurkunqa. Tsëpitanam tsë ëllushqan nacionkuna chuskuman rakikäkurinqa. Jukmi kanqa norti kaq lädupa, jukmi kanqa sur kaq lädupa, juknam kanqa inti yarqamunan kaq lädupa y juk kaqnam kanqa inti jeqanan kaq lädupa.

<<Tsë reypa rantin manam pëpita miraqkunatsu rey kayanqa, sinöqa juk casta nunakunam. Pëkunaqa manam tsë rey puëdiq kashqannönatsu kayanqa. 5Tsënö këkaptinpis Egipto nacionpa reynin#11.5a Egipto nacionpa mandakuqninmi karqan Tolomeo I Sóter (323-285 a. C.). puëdiq tikrakuriptin soldädunkunapa capitanninmi pëpitapis mas puëdiq tikrakurinqa.#11.5b Tsë capitanqa Seleuco I Nicátor shutiyuqmi karqan. Pëmi Siria nacionpa reynin tikrarirqan. Tsënö karmi atska markakunata poderninchö tsaranqa.

6<<Tsëpita watakuna pasariptinnam Egipto nacionpa reynin Siria nacionpa reyninwan alli kawakuyänan rëkur shipash tsurinta casatsinqa. Tsënö casaratsiptinmi tsë warmita wanïkatsiyanqa. Tsënöllam wanutsiyanqa wawanta, qowanta y cuidaq soldädunkunatapis.#11.6 Tsë warmipa shutinmi karqan Berenice. Casakushqan reypa shutinmi karqan Antíoco II Teos. Bereniciwan casakunanpaqmi Antíoco II rakikarqan punta kaq warmin Laodicipita. Tsëmi alläpa piñarkur pëkunata Laodice wanuratsirqan. 7Tsënö wanuratsiyaptinmi tsë wanukuq warmipa turin soldädunkunawan ëwanqa Siria nacionpa reyninwan guërrata rurananpaq. Tumariq perqashqa markaman yëkurninmi vencïkur munashqanta ruranqa. 8Egiptuman kutikurnam apakunqa ïdulukunata, yulaq qellëpita y qoripita rurashqa alhäjakunata. Tsëpitaqa Siria nacionpa reyninwan atska wata manam qallapänakuyanqatsu.

9<<Tsëpitanam Siria nacionpa reynin ëwar Egipto nacionpa reyninta soldädunkunawan atacanqa. Tsënö karpis vencita mana puëdirmi markanman kutikunqa.

10<<Tsëmi tsurinkunana alistakuyanqa Egiptuman kutïkur yapë atacayänanpaq. Tsëtsika soldädukunata aparkurmi imëkatapis ushakätsirllana ëwayanqa imëka atskayashqa mayu imëkatapis apaqnö. Reypa tumariq perqashqa markanman chëkurmi atacayanqa. 11Tsëmi alläpa piñarkur Egipto nacionpa reynin soldädunkunawan yarqamunqa. Tsëtsika soldäduyuq këkäyaptinpis llapantam vencinqa. 12Tsënö vencirirnam tsë reyqa alläpa puëdiq tukurnin contrankunata waranqapayan wanutsir ushakätsinqa. Tsënö këkaptinpis tsë reypa puëdiq këninqa manam duranqatsu.

13<<Watakuna pasariptinnam Siria nacionpa reynin yapë ëllunqa atska soldädukunata. Tsë soldädukunaqa alläpa atska y alli alistakushqam kayanqa. Pëkunawanmi kutinqa Egipto nacionpa reyninta atacananpaq.

14<<Tsëpinmi Egipto nación reypa contran atskaq shäriyanqa. Jina achäquita ashipäkuq Israel mayikikunapis pëpa contranmi shäriyanqa. Tsënö shärirpis mana venciyaptinmi revelacionchö Teyta Dios käyitsikushqan cumplikanqa.

15<<Siria nacionpa reyninmi soldädunkunawan ëwëkur tumariq perqashqa marka waqtanman allpata qotuyanqa tsëpa yëkïkur atacayänanpaq. Atacayaptinmi Egipto nacionpa soldädunkuna mëläya puëdiq karpis pärapïta puëdiyanqatsu. 16Tsënöpam atacaq ëwashqa soldädukuna tsë markata chipyëpa ushakätsiyanqa. Tsëpitam kuyëllapaq Israel nacionta poderninchö tsaräyanqa.

17<<Tsëpitanam Siria nacionpa reyninqa llapan Egipto nacionta imanöpapis vencita munar tsë nacionpa reyninwan warmi tsurinta casatsinqa. Tsënö casatsinqa warmi tsurin rikapakurir willakuriptin ataquëta yarparmi. Tsënö ruraptinpis manam yarpanqannötsu kanqa.

18<<Tsëmi Siria nacionpa reyninqa juk läduman ëwëkur#11.18a Tsë reyqa Asia provincia lädupam ëwarqan. lamar kuchunchö këkaq atska markakunata vencinqa. Tsënö venciptinpis juk nacionpita shamuq capitanmi#11.18b Tsë capitanqa Romapitam karqan. tsë reyta vencinqa. Tsëmi tsë reyqa pasëpa penqakushqa tikrarinqa. 19Tsënam kutikunqa tumariq perqashqa markanman. Tsëchömi desgracia pasaptin wanunqa.

20<<Tsë reypa rantinnam juk rey yëkunqa. Pëmi mandakushqan nación mas puëdiq kananta munar impuestuta cobrakunanpaq nunata kachanqa. Tsë reypis guërra mana këkaptinmi manaraq höranchö wanunqa.

Siria nacionchö aksë nuna rey kanqan

21<<Tsë reypa rantinmi jitarishqa mana alli nuna ulikïninwan yëkunqa rey kananpaq.#11.21 Tsë nunaqa Antíoco IV Epífanes shutiyuq reymi karqan. Tsënö yëkunqa rey juk yëkunan këkaptinmi. 22Pëmi imëka atskayashqa mayu imëkatapis apaqnö contran shäriq nunakunata llapanta wanutsinqa. Tsënöllam wanutsinqa Teyta Diosta sirwiq sumo sacerdötitapis.#11.22 Tsë nunaqa Onias III sumo sacerdötim karqan. Wata 171 a. C.-chömi pëta wanutsiyänanpaq Antíoco IV mandarqan. 23Tsë reyqa tukïta änirmi nunakunata engañanqa. Tsënöpam wallkaqlla qatiraqnin këkaptinpis mandakuq këman chanqa.

24<<Tsë nunam rïcu nunakuna täräyashqan markakunaman soldädunkunawan pipis mana yarpashqan höra yëkuyanqa imëkankunatapis apakuyänanpaq. Manam awilunkunapis ni tëtankunapis tsë nacionchö pënöqa rurëta puëdishqatsu. Tsënöllam guërrachö vencirir apashqankunata qatiraqnin nunakunata rakinqa. Alläpam yarpakachanqa tumariq perqashqa markakunata imanöpapis atacananpaq. Tsënö këkarpis juk tiempullam tsënö kanqa.

25<<Tsë reyqa kallpanman markäkurmi Egipto nacionpa reyninta atska soldädunkunawan atacanqa. Tsënö atacaptinmi Egipto nacionpa reyninqa atska soldädukunata apëkur pärapuyanqa. Tsënö pärapurpis markäkushqan nunakuna traicionaptinmi vencita puëdiyanqatsu. 26Mikur upur juntaräyashqan yanasankunapis ushakänantam munayanqa. Tsë guërrachömi tsëtsika soldädunkuna wanuyanqa.

27<<Tsëpitanam tsë ishkan reykuna tëkur yanapanakuyänanpaq willanakurpis shonqunkunachöqa mana allita yarpëkäyanqa. Tsënö kaptinpis ushakäyänanta Teyta Dios manaraq munaptinmi tsë reykuna munayashqannöqa kanqatsu.

28<<Siria nacionpa reyninnam guërrachö ganar tarishqan riquëzakunata aparkur markanman kutikunqa. Markanman kutikashqanchömi Teyta Diosta adoraqkunata atacanqa. Tsënö munashqanta rurarirmi markanman kutirinqa.

29<<Desgracia pasananpaq höra chäramuptinmi tsë reyqa Egipto nacionta yapë atacanqa. Puntata vencishqa karpis manam yapëqa vencinqanatsu. 30Tsënö vencinqatsu Quitimpita#11.30 Kë textuchö Quitimpaq parlarqa Roma nacionpaqmi parlarqan. soldädukuna barcunkunawan shamurnin pärapuptinmi.

<<Tsëmi mana imanöpis këta puëdir alläpa piñarkur markanman kutirnin Diosta adoraqkunata yapë atacanqa. Y Diosta mana adoraqkunawanmi kuyanakunqa. 31Soldädunkunam Jerusalén templuman yëkïkur impüruyätsiyanqa.#11.31 Templuta impüruyätsin Teyta Dios prohibishqanta tsëchö rurarmi. Tsëpita masta musyanëkipaq leyinki Lev. 20.3; 21.12; Núm. 19.13, 20. Sacrificiuta Teyta Diospaq sacerdötikuna waran waran kayayänantapis manam jaqiyanqanatsu, sinöqa Teyta Dios melanashqan kaqtam templuman churanqa.#Mat. 24.15; Mar. 13.14.

32<<Tsë reymi yanapayänanta munar Dios Yayata manana cäsuqkunata tukïta änir engañanqa. Teyta Diosman markäkuqkunaqa mana mantsakushpam pëta pärapuyanqa. 33Tsëmi yachëyuq nunakuna atska nunakunata käyitsiyanqa Teyta Diosta imëpis sirwiyänanpaq. Tsënö këkaptinpis wakintaqa espädawanmi wanutsiyanqa, wakintam kayayanqa, wakintam prësu apakuyanqa y wakinpatanam imëkantapis qochir apakuyanqa. 34Tsënö jipatsiyaptinmi wakin nunakunaqa tsë yachëyuq nunakunata yanapayanqa. Wakinqa janan shonqullam pëkunawan ëllukäyanqa.

35<<Wakin käyikuq nunakunata jipatsiyaptinmi käyikuriyanqa imanö jiparpis Teyta Diosman markäkur jutsata mana rurashpa kawakuyänanpaq. Käyikuqkuna tsënö jipayanqa hasta tiempun cumplikanqanyaqmi.

36<<Tsë reyqa munashqantam ruranqa. Tsëmi nuna tukurnin llapan dioskunapita mas puëdiq kashqanta yarpar#2Tes. 2.3-4. puëdiq Teyta Diospa contran mantsakëpaq kaqkunata parlanqa.#Apoc. 13.5-6. Tsënö këkarpis Teyta Dios castiganan hörayaqllam puëdiq kanqa. Pasananpaq kaqkunaqa pasanqam.

37<<Tsë reyqa ima diostapis mana respetarmi cäsunqatsu unë castankuna adorayashqan dioskunata ni warmikuna adorayashqan dioskunatapis, sinöqa yarpanqa llapan dioskunapitapis mas puëdiq kashqantam. 38Imanö kaptinpis unë castankuna mana adorayashqan diostam adoranqa. Tsë diosqa tumariq perqashqa markakunata täpaq diosmi këkan. Pëta adorananpaqmi apanqa qorita, qellëta, kuyëllapaq rumikunata y kuyëllapaq adornukunata.

39<<Unë castankuna mana adorayashqan diosman creyikurmi tumariq perqashqa puëdiq markata atacanqa. Vencirirmi pëman qaqaqkunata churanqa atska markakunachö gobernador kayänanpaq. Tsënöllam yanapayashqan rëkur kushikur chakrankunapis qoykunqa.

40<<Höra chäramuptinnam tsë reyta Egipto nacionpa reynin atacanqa. Atacaptinmi atskayashqa mayu imëkatapis apaqnöraq carrëtankunawan, cawallun montashqa soldädunkunawan y atska barcunkunawan pärapur jinantin nacionta vencinqa.

41<<Tsënöllam Israel nacionman yëkïkur tsëtsika nunakunata wanïkatsinqa. Edomchö y Moabchö täraq nunakunaqa Amónchö täraq atska nunakunawan juntum makinpita safayanqa.

42<<Tsënöllam tsë reyqa munëninman churanqa atska nacionkunata. Egipto nacionpis manam safanqatsu. 43Tsëpitanam apakunqa Egiptupita qorita, qellëta y llapan riquëzankunatapis. Munëninmanmi churanqa Libia nacionta y Etiopía naciontapis.

44<<Tsëpitanam inti yarqamunan kaq läduchö y norti kaq läduchö contran shäriyashqanta willayanqa. Tsëmi alläpa piñar contran shäriqkunata pïmëtapis wanutsita munar soldädunkunawan ëwanqa. 45Lamarpita kuyëllapaq sagrädu jirkaman ëwaq nänichömi toldunkuna sharkatsinqa. Tsëchö këkaptinmi pipis mana yanapaptin pëta wanuratsiyanqa>>.

Currently Selected:

Daniel 11: qwhB

Highlight

Copy

Compare