Daniel 10

Chipapëkaq nunata revelacionchö Daniel rikanqan

1Kima watana Persia nacionpa reynin Ciro këkaptinmi Beltsasar shutiyuq Danielta Teyta Dios revelarqan. Tsë revelacionchö willashqankuna rasunpa pasananpaqmi këkan. Sasa käyipaq kaptinpis imapaq kashqanta Danielmi käyirqan.

2Tsëpinmi noqa Daniel yarpakachar kima semäna alläpa llakikurqä. 3Tsënö llakikurmi alli mikïkunatapis ni ëtsatapis mikurqätsu ni vïnutapis upurqätsu ni perfümitapis jichakurqätsu.

4Punta kaq killam#10.4 Punta kaq killapa shutinmi karqan Nisán. Nisán killaqa abësis qallëkun marzu ushanan junaqkunachö y abësis qallëkun abril qallanan junaqkunachömi. Tsë killachömi Israel nunakuna Pascua fiestata y Levadürannaq Tanta Mikuna fiestata rurayarqan. Tsë fiestakunapita masta musyanëkipaq leyinki Éxo. 12.1-20. ishkë chunka chusku (24) kaq junaqchö Tigris mayu kuchunchö këkarqä. 5Ñukirkushqächömi rikëkurqä lïnupita alli ratashllashqa nuna shëkaqta. Pëpa wachukunqa alli kaq qoriwan rurashqam karqan. 6Cuerpunpis imëka berilo ruminöran chipaparqan. Qaqllanpis imëka relampagunöran chipapäkurqan. Nawinkunapis imëka aktsinöran atsikyäkurqan. Rikrankuna y chakinkunapis imëka chipapäkïkaq broncinömi karqan. Parlashqanpis imëka atska nunakuna parlëkaqnömi wiyakamurqan.#Apoc. 1.13-15; 19.12.

7Noqa japallämi tsë revelacionta rikarqä. Noqawan këkaq nunakunaqa manam imatapis rikäyarqantsu. Mana rikëkarpis alläpa mantsakarmi ratakuyarqan. 8Tsë revelacionta rikashqä höra pipis manam yanaqämarqantsu. Alläpa llakikïwanmi kallpäpis karqantsu. 9Parlashqanta wiyëkurmi desmayar patsaman lätakëpa ishkirirqä.

10Tsë höram pallarkamaptin qonqurikur katatëkar maki paltällawan tanupukïkurqä. 11Tsënam kënö nimarqan: <<Daniel, sharkï. Teyta Diosmi kuyashurniki qamwan parlanäpaq kachamashqa. Kanan nishqaqta shumaq wiyamë>>.

Tsënö nimaptinmi katatëkar sharkurqä. 12Tsëmi kënö nimarqan: <<Daniel, ama mantsakïtsu. Revelación rikashqëkita käyikunëkipaq mañakïta y ayunëta qallashqëki junaqpitam Teyta Dios wiyashurqunki. Tsëmi shamurqü käyitsinaqpaq.

13<<Ishkë chunka juk (21) junaqmi Persia nacionpa mandakuqnin ángel jarkaräkamashqa. Angelkunapa mandakuqnin Miguel yanapamänanpaq shamuptinmi#Apoc. 12.7. Persia nacionpa mandakuqnin angelwan pelyananpaq tsëchö jaqirqü. 14Revelacionta rikashqëkiqa këkan Israel nunakunata ushanan junaqkunachö pasakunanpaq kaqkunam. Tsëta käyitsinaqpaqmi shamurqü>>.

15Tsënö parlapämaptin imatapis mana parlakushllapam puktiräkurqä. 16Tsënö këkaptïmi juk nuna niraq yurirkamur shimïta yatëkamurqan. Tsëmi parlapëkämaq nunata kënö nirqä: <<Teyta, revelacionta rikashqäpita alläpa llakikuptïmi kallpäpis kannatsu. 17Manam kallpäpis kannatsu parlanäpaq. Wanuriqnönam këkäpis>>.

18Tsënam tsë nuna niraq këkaq yapë yatëkamaptin kallpä yurirkurqan. 19Tsëpitam nimarqan: <<Teyta Dios kuyashunkim. Ama mantsakïtsu. ¡Kallpata tsari!>>

Tsënö parlapëkämaptinmi kallpä yurirkurqan. Tsëmi kënö nirqä: <<Teytallä, kananqa kallpä kannam parlapämashqëkita wiyanäpaq>>.

20Tsëmi kënö nimarqan: <<Imapaq shamushqätapis ¿musyankiku? Kananqa Persia nacionpa cuidaqnin angelwan pelyanäpaqmi kutikushaq. Tsë angelwan pelyar ushariptïmi Grecia nacionpa mandakuqnin ángel shamunqa. 21Tsë mandakuq angelkunawan pelyaptï qamkunata cuidayäshuqniki ángel Miguelmi yanapaman. Yanapamänanpaq manam mas pipis kantsu. Pelyaq manaraq ëwarmi Libru de la Verdadchö ima qellqarëkashqantapis käyitsishqëki>>.

Currently Selected:

Daniel 10: qwhB

Highlight

Copy

Compare