Daniel 1

Yanasankunawan Babiloniachö Daniel kayanqan

1Judá nacionchö kima watana Joacim rey këkaptinmi Babilonia nacionpa reynin Nabucodonosor soldädunkunawan Jerusalénman chëkur tumariq jarkaräyarqan. 2Teyta Diosmi permitirqan rey Joacimta Nabucodonosor prësu tsarinanpaq y Diospa templunpita wakin inshinakunata apakunanpaq. Tsëkunatam Babiloniaman apëkur diosninkunapa templunchö këkaq almacén cuartuman churarqan.#2Rey. 24.1; 2Crón. 36.6-7.

3Tsënöllam eunucukunapa mandakuqnin Aspenazta Nabucodonosor nirqan prësu apayashqan wakin Israel jövinkunata palaciuman pushananpaq. Wakin jövinkunaqa Israel reypa castanmi kayarqan y wakinnam Israelchö rïcu nunakunapa castan kayarqan.#2Rey. 20.18; 24.10-16; Isa. 39.7. 4Tsë akrayashqan jövinkunam kayarqan sänu, kuyëllapaq, shumaq yachëyuq, yachatsiyaptin juklla yachakuq y alli käyikuq. Tsëmi pëkuna alli kayarqan reypa palaciunchö sirwiyänanpaq, Babilonia#1.4 Hebreo idiömachöqa Caldea ninmi. Caldeaqa Babiloniapa juk kaq shutinmi këkan. nunakuna qellqayashqankunata estudiayänanpaq y parlayashqan idiömata yachakuyänanpaq.

5Rey Nabucodonosormi mandarqan palaciuchö aruyashqan mikïkunata tsë jövinkuna waran waran mikuyänanpaq y vïnuta upuyänanpaq. Tsënöllam mandarqan kima wata shumaq yachakurir palaciuchö pëta sirwiyänanpaq.

6Tsë akrashqan jövinkunachömi këkäyarqan Daniel, Ananías, Misael y Azarías. Pëkunaqa Judápitam kayarqan. 7Pëkunapa shutintam Aspenaz trocapurqan. Tsëmi Danielpa shutinta trocarqan Beltsasar kananpaq, Ananíaspatanam Sadrac kananpaq, Misaelpatanam Mesac kananpaq y Azaríaspatanam Abed-nego kananpaq.

8Danielmi impüru këta mana munar yarpakurkurqan reypa mikïninta mana mikunanpaq y vïnuntapis mana upunanpaq. Tsëmi Aspenazta rowakurqan tsë mikïkunata mana qarananpaq. 9Teyta Dios yanapaptinmi Danielqa Aspenazwan yachanänakuyarqan. 10Tsënö rowakuptinmi Aspenaz kënö nirqan: <<Imanö kaptinpis reynïtam mantsakü. Pëmi nimashqa qamkunata alli mikïkunata y alli vïnuta qarayänaqpaq. Wakin jövinkuna wirë wirë këkaqta rikarnin y qamkunatana uyuta rikëkuyäshurnikiqa wanuratsimanqachi>>.

11Tsënö niptinmi cuidaqnin nunatana Daniel rowakurqan. Tsë nunatam mandakuq Aspenaz churarqan Danielta, Ananíasta, Misaelta y Azaríasta cuidananpaq. Rowakurmi Daniel kënö nirqan: 12<<Rowakullashqëki, tëtë, verdürallata y yakullata chunka junaq qarëkayämänëkipaq. 13Tsë chunka junaq pasariptin reypa mikïninta mikuq jövinkunatawan iwalatsiyämë imanö këkäyashqätapis rikäyämänëkipaq. Pëkunapita mas alli kayaptïqa mañakushqaqnölla qarayämanki>>.

14Tsëmi cuidaqnin nuna änirir mañakuyashqannölla chunka junaq qararqan. 15Chunka junaq cumpliriptinnam rey churashqan mikïta mikuqkunapitapis mas jövin jövin këkäyarqan. 16Tsëmi jövinkunata cuidaq nunaqa reypa mikïninta y vïnunta tsë jövinkunata qararqantsu, sinöqa verdürallatam qararqan.

17Tsë chuskun jövinkunata Teyta Dios yachëninkuna qormi yanaparqan Babilonia nunakuna qellqayashqan röllukunata leyiyänanpaq y yachatsikushqankunata shumaq yachakuyänanpaq. Tsënöllam Danielta yanaparqan pipis revelación chaskishqanta käyirinanpaq y nunakuna imapaq suëñuyashqantapis musyananpaq.

18Rey Nabucodonosor nishqannö kima wata yacharatsirnam rey kaqman tsë jövinkunata Aspenaz pusharqan. 19Danielwan, Ananíaswan, Misaelwan y Azaríaswan parlarirnam reyqa käyirirqan llapan jövinkunapitapis alli yachaq kayashqanta. Tsëmi pëkunata churarqan yanapaqnin kayänanpaq. 20Alläpa sasa kaqkunata rey tapuptinmi mëtsëchö brüjukunapita y suerti qatiqkunapitapis chunka kuti mas käyiyarqan. 21Tsënöpam Danielqa Babiloniachö tärarqan rey Ciro punta kaq wata mandakushqan witsanyaq.

Currently Selected:

Daniel 1: qwhB

Highlight

Copy

Compare