Amós 7
7
Revelacionchö pintiq kurukunata Amós rikanqan
1Reypa cosëchanta ëllur usharir kikinkunapa cosëchanta manaraq ëllur qallayaptinmi Teyta Dios revelacionchö rikätsimarqan mëtsika pintiq kurukunata kë patsaman kachamunanpaqna alistëkanqanta.#Joel 1.4; 2.2-11. 2Tsë pintiq kurukuna llapan qorakunata ushëkäyaqta rikätsimaptinmi rowakur nirqä: <<Teyta Dios, perdonëkalläyämë. Mana perdonayämaptikiqa Jacobpita miraqkuna ichiklla kaqpis llapächi ushakäyäshaq>>.
3Tsëmi Teyta Dios ankupämar nimarqan: <<Rowakëkämaptikiqa pintiq kurukunata manam kachamushaqtsu>>.
Revelacionchö ninata Amós rikanqan
4Tsëpitanam Teyta Dios revelacionchö rikëkatsimarqan Israel nacionta ninawan castigashqanta. Tsë ninaqa patsa rurinpita pashtamuq yakutam tsakiratsirqan y jinantin Israel naciontam usharirqan.#Joel 1.19-20.
5Tsëta rikëkurmi rowakur nirqä: <<Teyta Dios, ama tsënö ushakäratsillayämëtsu. Mana perdonayämaptikiqa Jacobpita miraqkuna ichiklla kaqpis llapächi ushakäyäshaq>>.
6Tsënam Teyta Dios ankupämar nimarqan: <<Rowakamanqëki rëkur manam tsëtapis rurashaqtsu>>.
Revelacionchö plomädata Amós rikanqan
7Tsëpitanam revelacionchö Teyta Diosta rikärirqä perqa nöpanchö plomädan tsarashqa shëkaqta. 8Tsënam tapumarqan: <<Amós, ¿imatataq rikëkanki?>> nir.
Tapumaptinnam nirqä: <<Teyta, albañilpa plomädanta tsarashqa shëkaqtam rikëkä>>.
Tsënam kënö nimarqan: <<Plomädawan perqa derëchu kanqanta o wiksu kanqanta musyayanqëkinömi Israel nunakuna imanö kawayanqantapis musyashaq. Jutsata rurar kawakuyanqanpita mananam perdonashaqnatsu.
9<<Isaacpita miraqkuna#7.9 Isaacpita miraqkunaqa Israel nunakunam këkäyan. ruratsiyashqan altarkunatam ushakätsishaq.
Israel nacionchö llapan capillakunatapis juchuratsishaqmi.
Espädäta aptarkurmi rey Jeroboampita miraqkunata ushakätsishaq>>.
Sacerdöti Amasías profëta Amóspa contran shärinqan
10Amós tsënö willakuptinmi Bet-elchö këkaq sacerdöti Amasías Israel nunakunapa reynin Jeroboamman willakatsir nirqan: <<Qampa contrëki parlarmi Amós purikan. Israel nunakuna pë ninqanta cäsuyaptinqa nacionnintsik ushakanqam. 11Pëqa purikan kënö nirmi: <Jeroboamqa espädawan wanutsishqam kanqa. Tsënöllam Israel nunakunata juk nacionman prësu apakuyanqa> >>.
12Amóstanam sacerdöti Amasías kënö nirqan: <<¡Profëta, këpita yarqï! Willakunqëkipita ganapakïta munarqa Judá nacionman kutïkur tsëchö willakï. 13Kë Bet-elchö Israel nacionpa templun kaptinmi reypis Diosta adorananpaq shamun. Tsëmi këchö amana willapäkïnatsu>>.
14Tsënö niptinnam Amós kënö nirqan: <<Noqaqa manam profëtatsu ni profëtapa tsurintsu kä, sinöqa üshakunata mitsipakur y montikunachö hïguskunata pallapakurllam kawakü. 15Üshakunata mitsikur purikaptïmi Teyta Dios nimarqan: <Ëwë Israel nunakunaman willakïnïta willapänëkipaq>. 16Tsëmi kanan shumaq wiyamë Teyta Dios qampaq ninqanta.
<<Qammi kënö nikanki: <Ama willakïtsu Israel nunakunapa contran.
Isaacpita miraqkunapaq imatapis ama parlakïtsu> nir.
17<<Tsëmi Teyta Dios kënö nin:
<Warmikim kë markachö prostitüta tikrakurinqa.
Warmi tsurikikunata y ollqu tsurikikunatam espädawan wanutsiyanqa.
Chakrëkikunatapis suertita jitarmi rakinakuyanqa.
Kikikinam wanunki Diosta mana cäsukuqkuna täräyanqan nacionchö.
Israel mayikikunatanam karu nacionman prësu apakuyanqa> >>.
Currently Selected:
Amós 7: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
