1 Timoteo 3
3
Anciänukuna imanö kayänanpaq ninqan
1 Anciänu këta munaqkunaqa alläpa allitam yarpëkäyan. Tsë nishqäqa rasun kaqmi këkan. 2Anciänukunaqa kayänan pipiqpis mana penqapashqam, juk warmiyuqllam, shumaq käyikuqmi, shumaq yarpakachärir imatapis ruraqmi, pïmëpitapis respetashqam, posadatsikuqmi y shumaq yachatsikuqmi. 3Jina kayänan mana machakuq, pitapis mana qallapaq, pitapis ankupaq, qellëllapaq mana ërayaq 4y warminta y tsurinkunata shumaq rikaq. Tsënöllam tsurinkunatapis yachatsiyänan cäsukuq y respetakuq kayänanpaq. 5Wayinchö täraqkunata shumaq mana yachëkätsirqa ¿imanöparaq Teyta Diosman markäkuqkunatapis yachatsinman?
6Jesucristuman tsëllaraq markäkïkaqkunaqa ama anciänu kayätsuntsu. Tsëllaraq markäkïkaqta churëkuptikiqa yachaq tukur diablu castigashqa kashqannömi castigashqa kayanqa.
7Jesucristuta mana chaskikuq nunakunapis rikäkuyänanpaq anciänukuna shumaq kawakuyätsun. Tsënöpam pipis pëkunata penqapäyanqatsu y diablupis toqllaman manam ishkitsinqatsu.#Tito 1.6-9.
Diäcunukuna imanö kayänanpaq kanqan
8Tsënölla diäcunukunapis kayätsun alli respetashqa, imatapis änikushqanta cumpliq, mana machakuq y qellëpaq ërayar mana sakyapakuq. 9Jesucristupa willakïninta yachakuyashqannöllam jutsata mana rurashpa kawayänan. 10Diäcunu kananpaq manaraq churar imanö kayashqantapis shumaqraq rikapäyätsun. Sitsun alli portakunqa tsëran diäcunu kayänanpaq churayänan.
11Tsënöllam diäcunupa warminpis#3.11 O diacunïsapis. alli respetashqa kanan, pitapis mana tumpaq, shumaq käyikuq y änikushqanta cumpliq.
12Diäcunukunaqa juk warmiyuqllam kayänan, warminta y tsurinkunata shumaq rikaq.
13Diäcunu këninta shumaq cumpliqkunaqa pïmëpitapis respetashqam tikrayanqa. Jesucristuman markäkuyashqantam mana mantsakushpa willakuyanqa.
Pablo imapaq cartakunqan
14Timoteo, shamïta yarparpis kananqa cartakëkämüllaran. 15Juklla mana shamurmi kë cartachö nikäyaq wawqikunata y panikunata imanö rikänëkipaqpis. Noqantsikqa wiñëpa kawaq Diospa iglesian karmi rasunpa kaqta willapäkuntsik y llutanta yachatsikuyaptinpis willapar käyitsintsik.
16Teyta Dios musyatsimanqantsik willakïninqa alläpa shumaqmi. Tsë willakïninmi kënö nikan:
Jesucristum#3.16 Wakin qepa kaq griego copiakunachömi Diosqa nin. nunanölla yurikurqan.
Wanushqanpitam Espíritu Santu kawaritsimurqan.
Angelkunam pëta rikäyarqan.
Mana Israel nunakunatam willakïninta willakuqkuna willayarqan.
Jinantinchömi pëman markäkïkäyan.
Gloriaman kutïkurmi Teyta Diospa nöpanchö këkan.
Currently Selected:
1 Timoteo 3: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
