1 Timoteo 4

Llutan yachatsikuqkuna yuriyämunanpaq ninqan

1Espíritu Santum käyitsimantsik watakuna ushakaptin wakin nunakuna Jesucristuman markäkïkäyashqanta jaqirir supëkuna munayashqannö llutanta yachatsikuyänanpaq kashqanta. 2Pëkunaqa ulikuyanqam, alli tukuqmi kayanqa y penqakïninkunapis manam kanqatsu.

3Tsë llutan yachatsikuqkunaqa casakuyänantam michäyanqa. Tsënöllam wakin kaq mikïkunata mikukuyänantapis michäyanqa. Michäyaptinpis Teyta Diosqa llapan mikïtapis kamarqan Jesucristuman markäkuqkuna payllä nikur mikukuyänanpaqmi. 4Teyta Dios kamashqankunaqa llapanpis allim.#Gén. 1.31. Warmiyuq y qowayuq këpis Teyta Diospitam. Tsënö këkaptinqa pëta payllä nikur mikïtapis y warmiyuq y qowayuq këtapis manakaqman ama churashuntsu. 5Teyta Diospa palabranta käyikur y pëta mañakur payllä nikushqaqa mikïkunapis#Gén. 9.3; Mar. 7.18-20. y warmiyuq y qowayuq këpis#Gén. 2.18. alläpa allim.

Jesucristupa alli sirwiqnin kananpaq yachatsikunqan

6Kë cartachö qellqashqäkunata wawqikunata y panikunata shumaq yachatsirqa Jesucristupa alli sirwiqninmi kanki. Teyta Diospa willakïninta yachakurqa y pë munashqannö kawarqa pachata alli mikushqanömi kanki.

7Nunakuna llutanta yachatsikushqankunata ama chaskitsu. Pukllaqkuna fïsicata rurayashqannö qampis Teyta Dios munashqannö kawanëkipaq yachakï. 8Ejerciciu rurëqa kë patsachö kawashqantsikyaqllam alli. Teyta Dios munashqannö kawëqa kë patsachöpis y gloriachöpis alli kawanantsikpaqmi këkan.

9Tsë nishqäqa rasun kaqmi y llapan nunakunapis chaskikuyänanpaq allim. 10Tsëta käyirmi wiñëpa kawaq Teyta Diosman markäkur imata jiparpis willakïninta willakïkantsik. Pëmi Jesucristuta chaskikuq kaqtaqa pïmëtapis salvan.

11Kë cartachö qellqamushqäkunata cäsukuyänanpaq yachatsi. 12<<¿Imanöpam juk jövin yachatsimäshun?>> niyäshuptikipis ama cäsïtsu. Tsëpa rantinqa wawqikuna y panikuna rikar yachakuyänanpaq alli shimikipa pïmëtapis parlapë, jutsata mana rurashpa kawë, nuna mayikita ankupë, Teyta Diosman imëpis markäkï y pë munashqannö kawakï.

13Chämushqäyaq Teyta Diospa palabranta wawqikunata y panikunata leyipanki, yachatsinki y kallpatsanki.

14Jesucristuta sirwinëkipaq Espíritu Santu churëkäshuptikiqa llapan shonqïkiwan imëpis sirwi. Tsënö churashurqunki profëtakuna qampaq willakuyaptinmi y anciänukuna peqëkiman makinta churëkur Teyta Diosta mañakuyaptinmi.

15Kë käyitsishqaqkunata mana qonqëta imëpis rurë. Shumaq kawashqëkita rikäyäshurnikim nunakuna käyiyanqa Teyta Dios munashqannö kawëkashqëkita. 16Paqtam jutsata rurankiman. Jina paqtam mana allikunata yachatsinkiman. Rasun kaqllata yachatsir Teyta Dios munashqannö imëpis kawë. Tsënö kawarmi kikikipis salvakunki y yachatsishqëkikunata chaskikuqkunapis salvakuyanqa.

Currently Selected:

1 Timoteo 4: qwhB

Highlight

Copy

Compare