1 Corintios 4

Wawqikunata y panikunata yachatsinanpaq apóstol Pablo puëdiq kanqan

1Wawqikuna y panikuna, Teyta Diospa willakïninta willakur Jesucristupa sirwiqninlla kayashqäta käyikuyë. 2Alli sirwikuqqa markäkïpaqmi kanman. 3Tsëmi Jesucristuta mana sirwishqäta yarpäyaptikipis o wakin nunakuna tsënö yarpäyaptinpis llakikütsu. 4Noqapa käyikïnïpitaqa Jesucristuta allim sirwikä. Tsënö kaptinpis manam alli sirwishqäta yarpashqäpitatsu Teyta Dios <<allim sirwimarqunki>> nimanqa, sinöqa alli sirwishqäta kikin käyirmi tsënö nimanqa.

5Tsënö këkaptinqa manaraqpis höranchö pitapis ama juzgayëtsu. Señor Jesucristo kutimurnam pakëllapa rurashqantsikkunata y shonquntsikllachö yarpashqantsiktapis juzgamäshun. Juzgamashqantsik höraran alli o mana alli sirwiqnin kashqantsiktapis nimäshun.

6Wawqikuna y panikuna, Teyta Diospa palabranchö qellqarëkaqta cäsukuyänëkipaqmi Apoluspaq y kikïpaq kë cartachö nikämü. Cäsukurqa manam juk kaq yachatsishuqnikiman qaqar juk kaqpa contran shäriyankimantsu.#4.6 Tsënö nirqa kikinta y Apolusta iwallla chaskiyänanpaq kashqantam nirqan. Tsënö rurarqa yachaq tukïkäyankim. 7Yachatsiyäshuqnikikunata tsënö juzgayänëkipaqqa ¿pitaq kayanki? Käyikuq kayashqëkipis ¿manaku Teyta Diospita këkan? Teyta Diospitaran llapantapis chaskiyarqunki. Tsënö këkaptinqa ¿imanirtaq kikikikunallapita käyikuq kayashqëkita yarpar alabakïkäyanki?

8Qamkunaqa llapan munayashqëkita chaskiyarqunkinam ¿aw? Rïcunam këkäyanki ¿aw? Noqakuna manaraq chäyämuptïpis Jesucristuwan mandakïkäyashqëkitam yarpäyanki ¿aw? Rasunpa mandakuyaptikiqa ¡allim kanman noqakunapis yanapayänaqpaq!

9Yarpënïpitaqa llapanpitapis jipayänäpaqmi apóstol këman Teyta Dios churayämashqa. Imëka llutan ruraq nunatanöpis noqakunata wanuratsiyämëtam munayan. Tsënö jipayashqätaqa llapan nunakunapis angelkunapis rikëkäyämanmi. 10Qamkunaqa Jesucristuta sirwir alläpa yachëyuq y käyikuq kayashqëkitam nikäyanki. Noqakunataqa Jesucristuta sirwiyaptï upatanömi rikäyäman. Qamkunaqa puëdiq kayashqëkitam nikäyanki. Noqakunataqa imallatapis rurëta mana puëdiqtanömi rikäyäman. Qamkunataqa allim rikäyäshunki. Noqakunataqa mana sirwiq nunakunatanömi rikäyäman.

11Kananyaqmi noqakunaqa mallaqar, yakunar, alalätsikur y maqar ushashqa purikäyä. Wayilläkunapis kikïkunapaqa manam kantsu. 12Pishipakurpis kikïkunam utiyanqäyaq uryayä.#Hech. 18.3. Nunakuna ashayämaptinpis Teyta Diostam mañakuyä bendicionninta qoykunanpaq. Chikiyämaptinpis manam sientikuyätsu. 13Wasäkuna rimayaptinpis alli shimïkunapam parlapäyä. Kananyaqpis alläpa mana sirwiqtanö y manakaqtanömi rikäyäman. 14Manam qamkunata penqakïman churayänaqpaqtsu tsënö nir qellqëkämü, sinöqa kuyë tsurïtanö käyitsiyarnikim qellqëkämü.

15Chunka waranqa (10,000) yachatsishuqnikikuna kayaptinpis Jesucristuta chaskikuyänëkipaq jukllëllam puntata willapäyäshurqunki. Tsë willapäyäshuqnikiqa noqam këkä. Tsënöpam qamkunapa tëtëkikunanö këkä. 16Tsëmi qamkunata rowayaq noqa kawakushqänö qamkunapis kawayänëkipaq.#1Cor. 11.1; Fil. 3.17. 17Qamkuna kaqchö imanö kawashqätapis yarpätsiyäshunëkipaqmi Timoteuta kachamurqü. Pëqa imëka kuyë tsurïnömi këkan. Tsënöllam pëqa Teyta Dios munashqannö kawan. Llapan iglesiakunachöpis yachatsikushqänömi shumaq yachatsiyäshunki.

18Wakinnikiqa mana kutimunäpaq kaqta yarparshi alläpa yachaq tukur këkäyanki. 19Tsënö yarpäyaptikipis Teyta Dios munaptinqa watukayaqniki shamushaqmi. Tsëchönam tsë yachaq tukuqkunata sitiunman churashaq. Pëkunaqa mä rasunpakush Teyta Diospa poderninwan rurëkäyan o kikinkunapa yarpëninllapitakush parlëkäyan. 20Teyta Diospa mandakïninchö kawëqa manam yachaq tukur parlashqantsiktsu, sinöqa pë munashqanta rurar kawashqantsikmi. 21¿Imanö chämunätataq munayanki? ¿Piñashqa chämunätaku o kushishqa chämunätaku?

Currently Selected:

1 Corintios 4: qwhB

Highlight

Copy

Compare