1 Corintios 3

Mana liryakushqa kawayänanpaq ninqan

1Wawqikuna y panikuna, tsënö kaptinpis Espíritu Santu munashqannö mana kawayaptikim Jesucristuta mana chaskikuq nunakunatanö qamkunata yachatsiyarquq. Qamkunaqa pishi wamranöllaran kayarqunki. 2Mikïta manaraq yachaq wamrata chichillawan maman wätashqannömi noqapis qamkunata qallëkunan kaq yachatsikïkunallataraq yachatsiyarquq. Kananyaqpis mana käyikuq karmi pishi wamranöllaraq këkäyanki.#Heb. 5.12-13. 3Chikinakur y liryakur kawar ¿manaku Jesucristuta mana chaskikuq nunakunanölla kawëkäyanki? 4Wakinnikish kënö nikäyanki: <<Noqakuna Pablutam qatiräyä>>. Y wakinnikinash nikäyanki: <<Noqakunaqa Apolustam qatiräyä>>. Tsënö nir ¿manaku Diosta mana cäsukuq nunakunanölla këkäyanki?#1Cor. 1.12.

5Tsënö niyänëkipaqqa ¿pitaq Apolos? Jina ¿pitaq noqa kä? Noqakunaqa Teyta Diosta sirwiq nunakunallam kayä. Teyta Dios churayämashqannö sirwiyaptïmi Jesucristuta chaskikuyarqunki. 6Muruta muruq nunanömi qamkunata willapäyarquq Jesucristuta chaskikuyänëkipaq.#Hech. 18.4-11. Apolusnam murushqata parquqnö#3.6 Wakin nunakunaqa qallpaqnö niyanmi. Jesucristupa willakïninta mas käyitsiyäshurqunki.#Hech. 18.24-28. Muruta winatsimuqnömi Teyta Dios qamkunata shumaq käyitsiyäshurqunki Jesucristuman markäkuyänëkipaq. 7Manam muruq kaqtsu ni parquq kaqtsu muruta winatsimun, sinöqa Teyta Diosmi.

8Muruq kaqpis parquq kaqpis chakra alli wayunanpaqmi uryayan. Teyta Diosnam muruq kaqtapis parquq kaqtapis según uryayashqanmannö paganqa. 9Noqapis Apoluspis Teyta Diospa uryaqninkunallam këkäyä. Qamkunanam Teyta Dios uryëkätsishqan chakranö këkäyanki.

Tsënöllam Teyta Dios shäritsishqan wayinö këkäyanki. 10Teyta Dios kuyamar churamashqa kaptinmi alli yachaq albañil churashqan cimientunö uryashqäkuna këkan. Tsë cimientu jananchö juk albañil perqata shäritsiqnömi wakin nunakunapis uryayan. Tsë nunakunaqa shumaq käyikuyätsun imanö uryayashqantapis. 11Manam pipis cimientu patsashqana këkaqta jitarïkur juk cimientuta churanmantsu. Jesucristum cimientuqa këkan.

12Wakin nunakunaqa Teyta Dios munashqannö kawar tsë cimientu jananman qoriwan, qellëwan o kuyëllapaq chipapëkaq rumikunawanpis wayita sharkatsiqnömi këkäyan. Wakin nunakunaqa Teyta Diosta mana cäsukur qeruwan, oqshawan o rämakunawanpis wayita sharkatsiqnömi këkäyan. 13Mëqanwan shäritsishqapis juiciu junaqchönam llapan uryashqantsikpita Teyta Dios juzgamäshun. Tsë junaq juzgamarnintsikmi llapan rurashqantsikkunata ninawan probanqa. 14Cimientu jananchö shäritsishqantsikkunata nina mana ushaptinqa premiutam chaskishun. 15Tsënö kaptinpis cimientu jananchö shäritsishqantsikkunata nina ushariptinqa ima premiutapis manam chaskishuntsu. Tsënö kaptinmi wayita nina rupaptin nuna ëqir salvakushqannö noqantsikpis salvakushun.

16¿Manaku musyayanki Teyta Diospa templun kayashqëkita? ¿Manaku musyayanki Espíritu Santu qamkunachö tëkashqanta?#1Cor. 6.19; 2Cor. 6.16. 17Teyta Diospa templunta ushakätsiq kaqtaqa#3.17 Pëman markäkuqkuna Diospa templun kayaptinmi pëman markäkuqkunata chikinakatsir, jutsata ruratsir o mana allikunata creyitsir templunta ushakätsintsik. Teyta Diosmi ushakätsinqa. Qamkunaqa Teyta Diospa templun karmi santu këkäyanki.

18Shumaq käyikuyë. Wakinnikim yarpäyanki Diosta mana chaskikuq nunakunanö yachëyuq kayashqëkita. Rasunpa yachëyuq këta munarqa pëkuna yarpäyashqannö ama yarpäyëtsu. 19Diosta mana chaskikuq nunakuna yachëyuq kayashqanqa Teyta Diospaq manakaqllam këkan. Palabranchöpis kënömi qellqarëkan:

<<Yachëyuq kashqanta nuna yarpaptinpis mana rasunpa yachaq kashqantam musyatsin>>.#Job 5.13.

20Tsënöllam jina kënö qellqarëkan:

<<Teyta Dios musyëkanmi yachëyuqkuna imata yarpäyashqantapis.

Pëqa musyëkanmi mana allikunallaman yarpëkäyashqanta>>.#Sal. 94.11.

21Tsënö nikaptinqa ama alabakuyëtsu <<noqaqa Apoluspa o Pablupa qatiraqninmi kä>> nir. Käyikuyë llapanpis qamkunapana kashqanta. 22Tsëmi noqapis, Apoluspis, Cefaspis, kë patsapis, kawëpis, wanïpis, kanan tiempupis y shamuq tiempupis qamkunapana llapan këkan. 23Qamkunanam Jesucristupa kayanki. Jesucristunam Teyta Diospa këkan.

Currently Selected:

1 Corintios 3: qwhB

Highlight

Copy

Compare