1 Corintios 13

Imanö kuyanakunantsikpaq käyitsinqan

1Kë patsachö llapan idiömakunata parlarpis y angelkunapa idiömanta parlarpis kuyakïnï mana kaptinqa platïlluta llutalla tocashqan chinchinyaqnöllam parlashqäkuna këkan. 2Profëta karpis, Teyta Dios yarpashqanta musyarpis y pïmë nunapita mas yacharpis kuyakïnï mana kaptinqa manam imapaqpis sirwïtsu. Teyta Diosman markäkur jirka witikunanpaq niptï witikuptinpis kuyakïnï mana kaptinqa manam imapaqpis sirwïtsu.#Mat. 17.20; 21.21; Mar. 11.23. 3Waktsakunata llapan imëkäkunata rakiparpis y Diosman markäkushqäpita kayayämaptinpis kuyakïnï mana kaptinqa manam imapaqpis sirwïtsu.

4Kuyakuq karqa ima kaptinpis pacienciakuntsikmi y pïmëtapis allim rikantsik. Tsënöllam waqapukuntsiktsu, alabakuntsiktsu, pitapis manakaqpaq churantsiktsu, 5manakaqkunata parlantsiktsu, munashqantsikta rurayänanpaq obligantsiktsu, piñakuntsiktsu y pitapis chikintsiktsu. 6Mana allikunata ruraptin kushikunantsikpa rantinmi allikunata ruraptin kushikuntsik. 7Kuyakuq karqa ima kaptinpis perdonantsikmi. Imëpis creyintsikmi, imëpis shuyarantsikmi y llapantapis awantakuntsikmi.

8Profëtakuna willakuyashqanpis ushakanqam. Mana yachashqan idiömachö parlayashqankunapis ushakanqam. Yachëyuq këpis ushakanqam. Kuyanakïqa imëpis manam ushakanqatsu. 9Manam llapantatsu musyantsik. Manam llapantatsu willakuntsik. 10Tsënö karpis Jesucristo kutimuptinqa kanan musyashqantsikkunata ni willakushqantsikkunatapis mananam wanashunnatsu.

11Noqapis wamra karqa wamranöllam parlarqä, wamranöllam yarparqä y wamranöllam käyirqä. Awkinyarnam wamranönatsu parlä ni yarpä. 12Tsënöllam kananqa makwa espëjuwan rikäkuqnöpis shumaqqa käyintsikraqtsu. Tsënö kaptinpis kë patsapita ewkurqa kikin Teyta Dioswanmi tinkushun. Tsëmi kanan ichikllata musyarpis tsë junaqqa pë reqimashqantsiknö noqantsikpis pëta reqishun.#1Juan 3.2.

13Kananqa markäkur, shuyakur y kuyanakurmi kawëkantsik. Tsënö kaptinpis llapanpita mas alli këkan kuyanakushqantsikmi.

Currently Selected:

1 Corintios 13: qwhB

Highlight

Copy

Compare