Popular Bible Verses from 1 Corintios 13

Share

Kuyakuq karqa ima kaptinpis pacienciakuntsikmi y pïmëtapis allim rikantsik. Tsënöllam waqapukuntsiktsu, alabakuntsiktsu, pitapis manakaqpaq churantsiktsu, manakaqkunata parlantsiktsu, munashqantsikta rurayänanpaq obligantsiktsu, piñakuntsiktsu y pitapis chikintsiktsu.

Kuyakuq karqa ima kaptinpis perdonantsikmi. Imëpis creyintsikmi, imëpis shuyarantsikmi y llapantapis awantakuntsikmi.

Mana allikunata ruraptin kushikunantsikpa rantinmi allikunata ruraptin kushikuntsik.

Kananqa markäkur, shuyakur y kuyanakurmi kawëkantsik. Tsënö kaptinpis llapanpita mas alli këkan kuyanakushqantsikmi.

Profëtakuna willakuyashqanpis ushakanqam. Mana yachashqan idiömachö parlayashqankunapis ushakanqam. Yachëyuq këpis ushakanqam. Kuyanakïqa imëpis manam ushakanqatsu.

Kë patsachö llapan idiömakunata parlarpis y angelkunapa idiömanta parlarpis kuyakïnï mana kaptinqa platïlluta llutalla tocashqan chinchinyaqnöllam parlashqäkuna këkan.

Profëta karpis, Teyta Dios yarpashqanta musyarpis y pïmë nunapita mas yacharpis kuyakïnï mana kaptinqa manam imapaqpis sirwïtsu. Teyta Diosman markäkur jirka witikunanpaq niptï witikuptinpis kuyakïnï mana kaptinqa manam imapaqpis sirwïtsu.

Waktsakunata llapan imëkäkunata rakiparpis y Diosman markäkushqäpita kayayämaptinpis kuyakïnï mana kaptinqa manam imapaqpis sirwïtsu.

Noqapis wamra karqa wamranöllam parlarqä, wamranöllam yarparqä y wamranöllam käyirqä. Awkinyarnam wamranönatsu parlä ni yarpä.