1 Corintios 11

1Jesucristo kawashqannö kawashqäta rikäyämar qamkunapis noqanö kawakuyë.#1Cor. 4.16; Fil. 3.17.

Iglesiachö warmikuna shukupakuyänanpaq käyitsinqan

2[Wawqikuna y panikuna,] qamkuna imëpis yarparäyämaptiki y yachatsiyashqaqta mana qonqayaptikim kushikü.#2Tes. 2.15. 3Kënö niyashqaqta käyikuyë: Jesucristum ollqupa peqan këkan. Ollqunam warminpa peqan këkan. Teyta Diosnam Jesucristupa peqan këkan.#11.3 Kë versïculuchö nishqanqa kënö ninanmi: Ollqu kaqmi Jesucristupa munëninchö këkan. Warmi kaqmi qowanpa munëninchö këkan. Jesucristunam Teyta Diospa munëninchö këkan.

4Wawqikuna y panikuna ëllukäyashqanchö mëqan ollqupis Teyta Diosta mañakur o willakïninta willakur manam shukupakunmantsu. Shukupakurqa Jesucristutam manakaqpaq churëkan. 5Tsënö kaptinpis warmiqa Teyta Diosta mañakur o willakïninta willakur shukupakunmanmi. Mana shukupakurqa qowantam manakaqpaq churëkan. Tsënö rurarqa aqtsanta rututsir warmi penqakïpaq kashqannömi këkan. 6Shukupakïta mana munaq warmiqa mejor aqtsanta qala putu rutukutsun. Aqtsanta rutukïta penqakurqa peqanta shukupakutsun.

7Nunata kamar Teyta Dios kikin niraqtam kamarqan. Tsëmi ëllukäyashqanchö Teyta Dios respetashqa kananpaq ollqukunaqa shukupakuyanmantsu. Tsënö kaptinpis warmikunaqa qowan alli rikashqa kananpaqmi peqankunata shukupakuyanman.#Gén. 1.26-27. 8Manam warmipitatsu ollquta Teyta Dios kamarqan, sinöqa ollqupitam warmita kamarqan. 9Tsënöllam warmi japallan kaptintsu nunata kamarqan, sinöqa ollqu japallan kaptinmi warmita kamarqan.#Gén. 2.18-23. 10Tsëmi warmikunaqa qowantapis y angelkunatapis respetar peqanta shukupakuyanman.

11Tsënö kaptinpis warmi mana kaptinqa ollqu manam yurinmantsu. Ollqu mana kaptinqa manam warmipis kamashqatsu kanman karqan. Tsënö kananpaqmi Teyta Dios permitirqan. 12Musyantsikmi ollqupita warmita Teyta Dios kamashqanta. Tsënöllam musyantsik warmipita ollqupis yurikushqanta. Warmipis ollqupis Teyta Diospitam këkäyan.

13Mä, qamkuna yarpakachäyë. ¿Allitsuraq kanman warmikuna peqanta mana shukupakïllapa Teyta Diosta mañakuyaptin? 14¿Manatsuraq mëtsëchöpis penqakïpaq këkan ollqu aqtsanta winatsiptin? 15Tsënö kaptinpis warmikunaqa jatun aqtsayuq kar kuyëllapaqmi këkäyan. Warmikunapa aqtsanqa peqanta shukuparaqnömi këkan.

16Tsëkunapaq itsa wakinnikiqa masta parlëta munëkäyanki. Tsënö kaptinpis noqakuna kaqchöqa y mëtsëchöpis wawqikuna y panikuna ëllukäyashqanchömi panikuna peqanta imëpis shukupakuyan.

Santa Cënachö piñatsinakuyanqan

17Qamkuna ëllukäyashqëkichö allita rurayänëkipa rantinmi mana allita rurëkäyanki. 18Ëllukäyashqëkichö piñatsinakïkäyashqëkitam willayämashqa. Qamkuna itsa rasunpapis tsënö këkäyanki. 19¡Achyä! Tsënö piñatsinakur kawar Teyta Dios munashqannöchi kawëkäyanki ¿aw?

20Tsënö piñatsinakushqa këkar Santa Cënata mikuyashqëkipis manakaqllapaqmi këkan. 21Santa Cënata mikuyänëkipaq ëllukarshi wakinnikiqa alli mikïta apëkur mikïkäyanki. Wakinnikiqa mallaqëkäyankish. Wakinnikinaqa machayashqëkiyaqshi upukïkäyanki. 22Tsënö rurarqa Teyta Dios salvashqan kaqkunatam manakaqpaq churëkäyanki y waktsa kaqkunatam penqakïman churëkäyanki. ¿Imanirtaq wayikikunachö mikuyankitsu y upukuyankitsu? Tsënö rurar mana allitam rurëkäyanki.

Santa Cënapaq yachatsinqan

Mateo 26.26-29; Marcos 14.22-25; Lucas 22.14-20

23Señor Jesucristo Santa Cënapaq yachatsishqanllatam noqapis yachëkätsiyaq. Wanutsishqa kananpaq qoykuyänan paqasmi Señor Jesucristo tantata tsarirkur 24Teyta Diosta payllä nikurqan. Tsëpitanam tantata pakirir nirqan: <<[Mikuyë.] Kë tantaqa cuerpümi. Qamkuna rëkur wanunäpaqmi cuerpüta Teyta Diosta qoykushaq. Kë tantata mikur imëpis yarpäyämanki>>.

25Tsënöllam mikïta usharir vïnuyuq cöpata tsarirkur nirqan: <<Kë vïnuqa Teyta Dios mushuq pactuta rurananpaq ramashqa yawarnïmi.#Éxo. 24.6-8; Jer. 31.31-34. Kë vïnuta upur imëpis yarpäyämanki>>.

26Jesucristo tsënö nishqa kaptinmi imëpis Santa Cënachö tantata mikur y vïnuta upur yarpantsik noqantsik rëkur Jesucristo wanushqanta. Tsënölla imëpis rurëkäshun Jesucristo kutimushqanyaq.

Imanö kawayanqanta yarpakachärirraq Santa Cënata mikuyänanpaq käyitsinqan

27Tsënö këkaptinqa pipis piñatsinakushqa o jutsata rurashqa këkar Santa Cënachö tantata mikur o vïnuta upurqa Jesucristo wanushqanta y yawarninta ramashqantam manakaqpaq churëkan. 28Tsënö këkaptinqa imanö kawëkäyashqëkitapis shumaq yarpakachärirraq tantata mikuyanki y vïnuta upuyanki. 29Señor Jesucristupa cuerpunta mana respetar tantata mikuqta y vïnuta upuq kaqtaqa Teyta Diosmi castiganqa. 30Tsënö upuyashqëkipitash wakinniki mana kachakëpa qeshyëkäyanki y wakinkunaqa wanushqanash këkäyan.

31Tsënö këkaptinqa imanö kawëkäyashqëkitapis shumaqraq yarpakachäyë. Teyta Dios munashqannö kawayaptikiqa manam castigayäshunkitsu. 32Castigamarnintsikpis jutsa rurëta jaqirinantsikpaqmi willapämantsik.#Deut. 8.5; Heb. 12.5-11. Tsënöpam jutsa ruraqkunata infiernuman jitëkurpis noqantsiktaqa jitamäshuntsu.

33Wawqikuna y panikuna, tsënö këkaptinqa Santa Cënata mikuyänëkipaq ëllukar jukniki juknikipis shuyänakuyanki. 34Mëqëkipis mallaqarqa wayikikunachö imallatapis puntata mikuyanki. Tsënöpam Santa Cënachö llutanta mana rurayaptiki Teyta Dios castigayäshunkinatsu.

Shamurnam wakin arreglëpaq kaqtaqa arreglayashqëki.

Currently Selected:

1 Corintios 11: qwhB

Highlight

Copy

Compare