Génesis 47

Jacob Egipto nugkanam jeaa pujusmau

1José faraónkan ujaktasa wuwaiti. Tuma jeari chicharuk: Wina apar, tura yatsur aina Canaánnumia Gosénnum tawar, oveja ainan, vaca ainan, tura nitanu ainanka ashi ikaankar matsammayi, tusa tinaiti. 2Tusa nina yachi ainan cinco juki faraónkan iwaintukuiti. 3Turam faraón José yachi ainan iniak: ¿Atumsha wari takau ainarum? tusa tinaiti. Tama nita aimainak: Ina uuntri ainasha ovejan kuitamajakaru asarmatai, isha turusrik oveja kuitamin ainaji. 4Tsuka tepea asamtai ii yumain, tura tagku yumaincha atsakai, jui pujustasar taaji. Tuma asaakrin apu wait aneasam Gosén nugkanam pujustarma tusam tukartita tuina. 5-6Tuinakai faraón Josén chicharuk: Egipto nugka juka ame iiya asam amina apa, tura yatsum aina amijai pujusartasa kaunkaru asarmatai, Gosén nugka pegkera ai apujsarta. Turakum tagkun kuitamattsa wakeruina akaigka wina tagkur ainan kuitamnun apuri amajsam apujsarta, tusa tinaiti. 7José nina aparin juki faraón pujamunam ejénaiti. Turam Jacob faraónkan wainak pegkernum chicharkauwaiti. 8Turam faraón Jacobon iniak: ¿Ame akinamusha urutma uwíyaita? tusa tinaiti. 9Tama Jacob ayak: Aya wekataik ciento treinta uwí ejéjai. Tura uchichik nagkamsan iturchat ainanka igkugkuitjai. Wina uuntur aina nukap uwí matsamsau aina imannaka ejéyatsjai, 10tusa aujas ikuknaiti. 11Turamtai faraón timaunka turusag José nina aparin, tura yachi ainan Ramsés nugkanam matsasuiti. 12Tura nita yuatnuncha nigki sujakuiti.

13-14Ashi nugkanam tsuka tepea asamtai, Egipto nugkanmaya, tura Canaánnumia ainasha tsukai senchi waitaina asar, trigon José irumrau asamtai, kuitjai sumaina. Turuinakai José kuitan irumar faraókan jeen ikusuiti. 15Egipto nugkanmaya aina, tura Canaánnumia ainasha kuitan ashimkaruiti. Tumawaru asar Josén jeariar chicharainak: Yamaika ina kuitrigka ashimkaji, tuma asar tsukai jinaattaji, wait aneasam yutai sukartusta, tusar tiaruiti. 16Tuinakai José nitan chicharuk: Kuitrum atsurtamainakaigka, atumin tagkuri itaatarma yutaijai yapajiawarmi, tusa tinaiti.

17Takai shuar ainasha caballo ainajai, oveja ainajai, vaca ainajai, tura burro ainajai, yutain yapajiawar yuina asar, tagkuri ainan ashi ashimkaruiti. 18Turawar Josén ataksha jeariar chicharainak: Yamaika kuitcha, tura ina tagkuri ainasha ashi ashimkaji, nuiyagka yutai yapajiar yumainka pegke atsurtamji. 19Tuma asaakrin yamaika ina nugkejaimak sumakratkata. Turukratawakminka tsukai jinaar nugka agkan ikutsuk, ame arakan jigkai sukartakmin nu arakmar yuakur, iwáku pujusar faraón takarsattaji tusar tiaruiti. 20-21Tuinakai ashi egiptonmaya ainanka faraónnau atii tusa nita nugkejaimak José sumakuiti. Turawaram shuar ainaka faraónkan inatairi jasaruiti. 22Antsu sacerdote ainaka faraón suam nuna yusar pujuina asar, nita nugkenka surukcharu ainawai. 23Shuar ainan José chicharuk: Faraónkan takarin arti tusan atumnaka wii sumakjarme. Tura asan arakmawarti tusan arakan jigkain amajrume. 24Ju arakmarum cinco saco juwakrumka faraón chikichik akankarum suakrum atumin uchiri ainajai yuatnusha jukitarma, tusa tinaiti.

25Takai nita aimainak: Yamaika ame wait anenkarturu asaakmin, ii ainatika faraónkan inatairi artatji, tusar tiaruiti. 26Tuinakai ashi egiptonmaya ainatirmeka árak arakmarum juwakrum faraón akaantukrum tuke sutatrume. Tusa chicham umiktinan egiptonmaya ainan najatawaiti. Nu chicham umiktinka yamaiya juisha Egiptonmagka awai. Antsu sacerdote ainaka nugken surukcharu asar, arakan arakmawar juwainaksha, faraónnaka sujakcharu ainawai. 27Israelita aina Gosén nugkanam matsamsar, shir nukap pampagkaruiti. 28Jacob Egipto nugkanmagka diecisiete uwí pujusuiti. Tura ashika ciento cuarenta y siete uwí ejénaiti. 29Tuma shir untach jas ni jakatnuri jeu asamtai, Josén untsuk chicharuk: Jakaakmincha Egiptonmagka ikuschattajme turutkum amina uwejem wina makuru wakenmarin weakta. 30Wii jakamtaigka wina uuntur ikusmau aina nuig ikursata, tusa tinaiti. Tama José ayak: Ame turutam nunaka metek umiktatjai, tusa tinaiti. 31Takai Jacob uchirin ataksha chicharuk: “Ame turutam nunaka metek umiktatjai, tusam Yuusa naari pachisam turutta, tusa tinaiti. Takai Josésha Yuusa naarin pachis ame tame nunaka metek umiktatjai”, tusa tinaiti. Timatai Jacob peakrin tsuntsumawaiti.

Currently Selected:

Génesis 47: hubDBL

Highlight

Copy

Compare