Génesis 48

Jacob José uchiri ainan pegkernum chicharkamu

1Chikich tsawantin shuar aina Josén taruawar ujainak: Amina apa yamaika jawai, tusar tiaruiti. Tama Josésha nina uchiri Manasésan, tura Efraínkan juki wuwaiti. 2Tuma jeaamtai shuar aina Jacobon chicharainak: Amina uchiram José iirmastasa taayi, tusa tuina. Tama jak tepayat nantaki ekeemsauwaiti. 3Nunik Josén chicharuk: Yuus ashi senchirtina nu, Canaán nugkanam yaakat Tsaaptin tutainam wantinturak pegkernum chichartak: 4Wii aminka nukap uchirtin amajsattajme, amee weantu ainaka nukap pampagkartinaiti. Tura nukap yaaktamkartin ainawai, tumawarmatai ju nugkanka nitanuk atii tusan susartinaitjai, tusa turutnaiti.

5Turutin asamtai Egipto nugkanam wii taatsaig uchi jimar akiawaitam nunaka, wina uchir Rubén, tura Simeón aina numamtuk amajsarjai. 6Antsu chikich akigtatam nu aminuka artatui. Nu aina nita yachi aina jumainnaka jukiartatui. 7Padán-aramnumia waketkin Canaánnum taattsan winai amina nuku Raquel jakamtai, Efrata jintanam ikusuitjai. Tura nu yaaktanka yamaika Belén anaikaruiti. 8Jacob José uchiri ainan wainak: ¿Jusha yana uchiri ainawa? tusa tinaiti.

9Takai José aparin ayak: Juka wina uchir ainawai. Egipto nugkanam pujai, Yuus surusmau ainawai, tusa tinaiti. Tama apari chichaak: Wait aneasam uchi imajai itantarta pegkernum chicharkartajai, tusa tinaiti. 10Jacobka shir untach jasu asa jiisha kusuru asamtai, José nina uchiri ainan juki aparin ejéntauwaiti. Turamtai tiragke ainan pagkuk kugkuasuiti. 11Tura chichaak: Josén wainkatnapitja tuka enentaimchamiajai. Turasha Yuus amina uchirmincha wainmamtikrukai, tusa tinaiti.

12Timatai José nina uchiri ainan emenan aparin tsuntsumruawaiti. 13Tuma uchiri ainan mai achik, Efraínkan untsurnumani, tura Manasésan menanmani achik juki apari menarini apujeak, Manasésan apari untsuruini apujsauwaiti. 14Turasha Jacob untsur uwejejai Efraínkan achiak iwairin Manasésan menarijai muuknum achikuiti. 15Tura Josén pegkernum chicharuk: Wina apachur Abrahaman, tura wina apar Isaackan Yuusriya nu, wii akinawaitaj nui nagkamas yamaiya juisha kuitamra nu, 16tura nayaimpinmaya shuar, pegkerchau ainanmasha ashi agkanmamtikartina nusha ju uchi ainanka pegkernum chicharkati. Turamu asar winasha, wina apachur Abrahamnasha, tura wina apar Isaacnasha pachis tuke chichau arti. Nukap uchirinawarti, tumainak nukap pampagkartin arti, tusa tinaiti.

17Turasha Joséka Efraínkan untsur uwejejai muuknum achikun wainak, shir aneaschauwaiti. Tumak apari uwejen achirak juki uchiri iwairin Manasésan muukeen achimtikak 18aparin chicharuk: Apaachi iwairigka juwaiti. Untsur uwejmijaigka ju achikta, tusa tinaiti.

19Tama Josén chicharuk: Jusha nukap pampagtina nunaka uchiru nekajai. Turasha yachi ekeuwa ju nina nagkas shir nukap pampagtinaiti. 20Tusa Jacob Efraínkan Manasésjai pegkernum chicharuk: Israel shuar ainaka atum pegkernum chicharnakmaun pachisar chichainak: Yuusa, Ame Efraín, Manasésjai pegkernum yaigkuitam turusmek yaigkratkata tiartin ainawai. Jacob Efraínkan Manasésan nagkasau amajsauwaiti. 21Tusa Josén chicharuk: Wika jakattajai, turasha atumjaigka Yuus pujuttawai. Tuma asa atumi uuntri matsama jakmaunmag awagtamkitnaittrume. 22Amorreo ainan nepetkan, Siquem nugkan yatsum ainanun inagkasan amajai, tusa tinaiti.

Currently Selected:

Génesis 48: hubDBL

Highlight

Copy

Compare