Éxodo 33
33
Yuus israelita ainan atum pujustinnum wetaarma timau
1-6Yuus Moisésan Sinaí nugkanam pujuinan chicharuk: Israelita aina Egipto nugkanam pujuina jiiruitam nu, yaruakam atumi uuntri Abrahaman, Isaacan tura Jacob nu ainan chicharkun: Atum weantu ainan nugkan susartinaitjai tusan anajmatawaruitaj nui wetá. Nu nugkaka shir pegkeraiti, árak aramsha shir tsapainiar neren ainawai, entsa ainasha nukap iruunin ainawai tura tagku ainasha nukap pampain ainawai. Atum wetinan jintan inakturmastinan, tura shuar wina umirtichu cananeo ainan, amorreo aina, hitita aina, ferezeo aina, hebeo aina tura jebuseo aina jiirtinan nayaimpinmaya shuaran akuptuktatjame. Israelita aina enentaimkachu asar jinta wesar tunaun takainakai kajerkan ijinawaraij tusan uyuntsachartatjai, tusa Yuus tawai titá tinaiti. Timau asa Moisés shuar ainan nugkutai orojai najanamu aina nuka utsagtarma, tusa tinaiti. Nuna antukar shuar aina senchi wake mesekaruiti. Timau asar shuar aina nui nagkamagka nugkutai orojai najanamunka nugkurcharuiti.
Wayar Yuusjai chichatai jea nuapjai jeamkamu
7Moisés Yuus turata timau asa, israelita aina pujuinamun ikuki nuapjai jeamkauwaiti. Nuna tura umik, Yuusjai chichastasa waitai tu anaikauwaiti. Shuar Yuusjai chichastasa wakeraka nita pujuinamunmaya jiinkiar jeawar nuap jeanam wejakaruiti. 8Moisés nu jeanam wayaattsa weakaigka ashi shuar ainaka nita jeenia aa jiintrar wajasar iiyai iiyainakua nuap jeanam awaya jakaruiti. 9-10Nu jeanam Moisés wayamtaigka wárimas yuragkim utsanu. Tumakai israelita ainaka Yuus Moisésjai chicha asamtai, nita pujuinamunmag tikishmajakaruiti. 11Moisés nuap jeanam wayakka chikichik shuar amikrijai chichauwa numamtuk Yuusjai igkunia tuke chichajakuiti. Nuna tuma israelita aina pujuinamunam waketu jakuiti, turasha Josué Moisésan yayájakua nuka nuap jeanmag pujujakuiti.
Yuus Moisésan senchirin iwaintukmau
12Moisés Yuusan chicharuk: Ame israelita aina jintintawarta tusam turutnaitme. Turasha wina yainkatin pachismeka turutchauwaitme. Tura nuiyasha aneajme, tura wii aminka etegkawaitjame tusam turutnaitme. 13Ame nekas wina etegtua akumka, israelita ainatijai wari turattsamea wakekauwaitam nu pachisam ujatkata. Nu pachisam ujatkakmin, nekaspapi Yuus yainkattawa tusan titatjame. Ame winau arti tusam etegkartua asam, inka kajinmatkartukipa, tusa tinaiti. 14Nuna tusa takai Yuus chicharuk: Iturchat atsamunam weti tusan, ame wetatam nuigka ima wiki uyuntsattajme, tusa tinaiti. 15Tusa takai Moisés Yuusan chicharuk: Ame uyunkartuschatin akumka jiintrarum wetaarma, tusamka tichattame. 16Antsu ame uyunkartakminka chikich shuar aina nugka ii pujustinnum pujuina nu ina chichartamainak Yuus etegkamuapi ainawa tusar nekarmawartatji, tusa tinaiti.
17Tusa takai Yuus chichaak: Nuka nekas tame, wika aminka nekas aneajme, tura wii aminka etegkawaitjame, tusa tinaiti. 18Tusa takai Moisés Yuusan chicharuk: Amina wainkattsan wakerajme, tusa tinaiti. 19Tusa takai Yuus Moisésan chicharuk: Wika Yuus asan, shuar ainan wii wakeramunka wait anentratnaitjai. Tumau asan wii ashi senchirtinaitaj nuna iwaintuktatjame, tura wina naarnasha nekamtikattajme.#Ro 9.15 20-21Turasha wina iyashruka wainkashtatme, antsu wina iyashrun wainuka jamainaiti. Wii pujamu yantamnum muchig puja nui juakta. 22Ame wajamunam wii nagkamaktasan muchig wa amaunam awajsattajme, turan uwejrujai jiimin epenkan nagkamaktatjai. 23Tura uwejrun jusamtai wina tuntupur wainkattame. Turasha wina yapirka wainkashtatme, tusa Yuus Moisésan tinaiti.
Currently Selected:
Éxodo 33: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
