Éxodo 32
32
Israelita aina vaca numamtinan najanawar emematmau
1Sinaí naintrin Moisés waka nukap tsawan pujusuiti. Tuma asamtai israelita aina Aarónkan chicharainak: Moisés Egipto nugkanam pujarin ina jiirmar imajai itarmamaj nuka megkaakayi. Tuma asamtai ina jintan inakturmastin chikichik yuus najanata, tusar Aarónkan tiaruiti. 2Tuinakai Aarón nitan chicharuk: Nu najanatnun oron atsumajai. Tuma asamtai arete orojai najanamun atumi nuwe aina, atumi uchiri aishmag aina tura atumi nawantri aina nunau jukirum ikaankatarma, tusa tinaiti. 3Takai areten orojai najankamu ainan ikaankar Aarónkan susaruiti. 4Turam Aarón arete ainan jinum utsawaiti. Turam entsamnamtai nuna juki, vaca aishmagkun najanawaiti. Tumamtai nuna yuusrimawar chichainak: Egipto nugkanam pujarin jiirmarmaj nuka juwaiti tusar ememataina. 5Tumainakai Aarón nuna wainak, vaca aishmag najanamu amaunam ayanas tagku aina maa patasa epetain najanawaiti. Tura nitan chicharuk: Kashin ina Yuusri emematkur jiistamattaji, tusa tinaiti.
6Timau asar kashin tsawainak, káshikmas nantakiar, nita tunauri tsagkurnartinan tagku ainan maa epeawaru ainawai. Nuiyasha yutain yuinak, tura umutaincha umuinak namperar nuwan takainak jantsemawaru ainawai.#Hch 7.40-41; 1Co 10.7 7Tumaina asamtai Yuus Moisésan chicharuk: Israelita aina Egipto nugkanam pujuina jiirmam nu tunaun shir pegkerchaun takainawai. Tumaina asamtai wári waketkita. 8Wina chichamrunka umirtutsuk orojai vaca aishmagkun najanawar ina yuusri Egiptonam pujarin jiirmarmaj nuka juwaiti, tusar tagku ainan maa epenak emematainawai. 9Nuiyasha Yuus Moisésan chicharuk:
Ju shuar pegkerchau enentaimkau aina nuna nekajai. 10Nitan kajerkau asan ashi ijinattajai. Nuna turakaisha ijinawaipa tusamka turutipa. Turasha amee weantu ainanka shir nukap napamkartinaitjai, tusa tinaiti. 11Tusa tama Moisés Yuusan atsagkrattsa chicharuk: Yuusru, ¿ame etegkamu ainasha urukamtai kajekmesha ashi ijinattsamsha wakerame? Israelita ainatin Egiptonam pujarin amina senchirmijai jiikratkimiame. 12Turawaitkum kajerkam ashi ijinawakminka egiptonmaya aina amina pachitmasar pegkerchau chichainak: Yuuska ni etegkamu ainanka aya nugkanmag ewekamas ijinatjai tu enentaimas Egiptonam pujuinan jiiruiti, tusar turamiartatui. Turammain asarmatai nita kajerkau akumsha tsagkurarta, tusa tinaiti.
13Amina umirtamin Abraham, Isaac tura Jacob nu aina chicharkum: ¿Amee weantu ainan ya nekapmamainchauwa iman amajsartinaitjai, tura nita pujusartinnasha nugkan susartinaitjai tusam tichaukaitam? tusa tinaiti. 14Tama Yuus Moisésan chicharuk: Takuminka ijinashtatjai, tusa tinaiti. 15-16Tusa timatai chicham umiktinan kaya jimarnum tablaya numamtinnum Yuus najanamunam mai yantamnum aarmaun juki, israelita aina pujuinamunam waketkinaiti. 17Tuma naintia akajkama Josué shuar aina senchi pampainamun antukuiti. Tuma Moisésan chicharuk: Maaninak pampaina numamtinan antajai, tusa tinaiti.
18Tusa takai Moisés chichaak: Kantamainan antajai, turasha maanika nepetmaka kantamtain kantamenatsui. 19Tura nita pujuinamunam Moisés jeajkama, vacan orojai najanamun tenteawar emematainan wainkauwaiti. Tumainakai kajek, chicham umiktinan kaya jimar tablaya numamtinnum Yuus aarmaun juki weamun nain taritkamunam nagkima kupiruiti. 20Nuiyasha vaca orojai najanamuncha Moisés juki jinum epeawaiti. Tura shir tsaik entsanam utsaa israelita ainan umartarma, tusa tinaiti. 21Nuna tura inaiyak Aarónkan chicharuk: ¿Ju shuar aina seatmainakai najatamsha tunau shir pegkerchausha takamtiksaume? tusa tinaiti.
22Tama Aarón Moisésan chicharuk: Yatsuru, kajertukaipa. Ju shuar aina pegkerchaun takasartasa wakerin aina nuka ameka shir nekame. 23Nita wina chichartuinak: Ina jintan inakturmastin chikichik yuus najanata, Egipto nugkanam pujarin ina jiirmarua nusha urukakug megkaka nuka nekatsji, tusa turutiarmayi. 24Tusa turutainakai oro aina itatarma tusan tiarmajai. Tama oron itarmatai jinum utsaamjai. Turam vaca numamtin najanarmayi, tusa tinaiti.
25Nuna tusa timatai Aarón israelita ainan jintintashmau asa, pegkerchau takatan inaitsuk takaina asamtai, nita shuari aina wishikainawai tusa Moisés nekawaiti. 26Moisés israelita aina pujutainam waitirin wayaa chichaak: Yuusan, umirkattsa wakeruinaka wii wajaj junini iruuntrarti, tusa tinaiti. Tusa takai Leví weantu aina Moisés wajamunmani iruuntraruiti. 27Tumawarmatai Moisés nitan chicharuk: Israelan Yuusri chichaak: Kuchiin jukiar shuar aina chichaman umitan nakitaina nuna chiki chikichik jeanam wayawar nita yachi ainan, nita amikri ainan tura nitajai irutkau pujuinancha ashi maawarti, tusa tawai tinaiti. 28Takai Yuusan umirtan nakitainan Leví weantu aina nu tsawantinig tres mil shuaran tumainan maawaruiti. 29Nuna turawarmatai Moisés chichaak:
Yuus timau metek umiakrum atumi yachi aina, tura atumi uchiri ainasha tunaun takaina asarmatai maa asaakrumin, Yuus pegkernum yainmaktatrume. 30Tura kashin tsawak Moisés nitan ashi chicharuk: Najanamu atumsha emematin asarum tunau shir pegkerchau takasurme, turasha atumi tunaurin Yuus tsagkurtamrachaintash tusan atumin pachisan Yuusan aujsattsan nainnum ataksha wetatjai, tusa tinaiti.
31Tusa Moisés Yuus pujamunam, Sinaí naintrin wuwaiti. Tuma jeaa Yuusan chicharuk: Israelita aina tunaun shir pegkerchaun takainak, orojai nitak najanawar yuusrimawar emematiarai. 32Nuna tumawarmataisha nita tunauri tsagkurarta tusan seajme. Antsu nita tunauri tsagkurat nakitakmeka, shuar pujut nagkanchaun jukiartin ainan naari aattainam nita naari aatkauwaitam nu asakattsuk wina naar aaruitam nu asakatrurta, turakum nita tunaurigka tsagkurarta, tusa tinaiti.#Ap 3.5; 20.12, 15
33Tama Yuus chicharuk: Atsaa amina naarminka asakarchattajai, antsu wina umirtukcharu aina nuna naarin asakatrartatjai. 34Yamaika waketkita tumam israelita aina yaruakam wii nugkan susattsan anajmatawaitjarme nui wetá. Nui weakmin jintan inakmastinan, nayaimpinmaya shuaran ame weamunam emtikan akupkattajai. Wina umirtukcharu ainan tsawan jeamtai waittan susartinaitjai, tusa Yuus Moisésan tinaiti. 35Aarón orojai vaca numamtinan najanamtai israelita aina emematiaru asarmatai, Yuus waittan susauwaiti.
Currently Selected:
Éxodo 32: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
