Éxodo 1
1
Egiptonmaya apu aina israelita ainan waitkasmau
1Israelita aina chiki chikichik nita nuwe ainajai Egipto nugkanam nita apari Jacobjaimak jeawaru aina nuka ju ainawai: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad tura Aser. 5Jacob weantu ainaka ashi irumramka setenta shuar ajakaruiti. Antsu Joséka Egipto nugkanam pujujakuiti. 6José jaka ai nina yachi aina, tura José pujai akiinkaru ainaka ashi jinaawaru ainawai. 7Turasha israelita ainaka nukap pampagkar nepetmainchau jasaruiti. Tura nukap pampagkaru asar nita pujuinamunka enetkaruiti. 8Tumawaru ai Josén wainu jakchau tura egiptonmaya ainan yayájakua nuna nekaachu, apu chikich yamaram pujusuiti. Tuma nu chichaak:
9Israelita ainaka ina nagkatamsau nukap pampagkarai, tumawaru asar ina nagkatamsau nita ima senchirtin jasarai. 10Ii pachitsuk inaiyamka nu nukap pampagkar maaniamu akaisha ina shuari ainajai iruuntrar, ijai maaniak ina nepettamkar shimumain ainawai. 11Tumamain asarmatai nu nukap pampagkarai tusar senchi takamtiksarmi, tusa tinaiti.
Tusa israelita ainan senchi takamtikainak waitkasartin ainan apun anaituruiti. Turawaram yutai ainan irumratnun, faraónnaun jimar yaaktan Pitónkan, tura Ramasésan najanawaruiti. 12Turasha senchi takamtikku waitkainamsha nu nukap pampaina. Tumaina asarmatai egiptonmaya aina senchi ashamaina. 13Tumaina asar egiptonmaya aina, israelita ainan nu nukap takamtikainak senchi waitkaina. 14Turuinak nuwe jukirum ladrillo najankarum inarkatarma tusar inaina. Tura ajanmasha takamtik amajainak shir senchi waitkaina. 15Nuiyasha israelita nuwan Sifran, tura Fúajai nuwan ujerin asarmatai, Egiptonmaya apu nitan chicharuk: 16“Israelita nuwa uchin jurenakaigka atum iistarma, turakrum uchi aishmag akinkaigka maatarma. Antsu uchi nuwa akinkaigka maawairpa”, tusa tinaiti.
17Turasha nuwan ujerin aina Yuusan umiraina asar, Egiptonmaya apu timaunka umirtsuk uchi aishmag akinainakaisha maacharu ainawai. 18Turuina asarmatai Egiptonmaya apu, nuwan ujerin aina utitarma, tusa shuaran akuptukuiti. Turam nuwa ujerin ainan itarmatai apu chicharuk: ¿Wii timajrum nusha urukamtai uchi aishmag aina akinainakaisha maatskesha inaiyarme? tusa tinaiti.
19Tama nita chichainak: Israelita nuwa ainaka kakaram asar, egiptonmaya nuwa ainajai metekchau ainawai, tumau asar, ika jeatsrinig uchinka jurenawai, tusar tiaruiti. 20-21Turamu asar israelita ainaka nu nukap pampagkar pegkesha nepetmainchau jasaruiti. Tura nuwan ujerin ainanka uchin maacharu asarmatai, Yuus pegkernum yaigkuiti. 22Tumaina asarmatai faraón ni shuar ainan ashi chicharuk: Israelita uchi aishmag akinkaigka entsanam ajapatarma, antsu nuwa akinkaigka maawairpa, tusa tinaiti.
Currently Selected:
Éxodo 1: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
