1 Samuel 9
9
Saúl Samuel pujamunam wemau
1Benjamín weantu nuiya chikichik shuar Quis naartin Abielan uchiri, tura nuka Zerora tiragke ajakuiti. Nina apari apachrigka Afiah, uchirigka Becorat ajakuiti. Quiska shuar eme anentsa iitai ajakuiti. 2Nuna uchiri Saúl naartin natsa pegkeri pujujakuiti. Tura niya imau nayauka chikichkiksha nita aina nuiyagka atsujakuiti.
3Chikichik tsawantin Quisa burrori aina megkaaturuiti. Tumamtai nina uchiri Saúlan chicharuk: “Chikichik inatai jukim burro megkara nu eakta” tusa tinaiti. 4Timau asa Saúl inatain juki burron eak Efraínka nugken nagkaiki Salisá nugkanam jeawaiti. Turasha burronka wainkacharuiti. Tuma Saalim nugkanam Benjamín pujujakua nuisha jeawaruiti. Tura nuisha wainkacharu ainawai. 5Nunik wainkach ikuinak Suf nugkanam jea, Saúl inatain chicharuk: Burro megkarau aina nuna nagkas wina apar ina puyattrutmas pujatai waketkimi, tusa tinaiti.
6Takai inatai chichaak: Ju yaakat tiju a ai, Yuusa chichamen etserin eme anentsa iitai pujawai, tura ni timauka metek uminnaiti. Tagku megkaarau wainkachaj nu pachisar iniasmi ni ujatmakchainjiash, tusa tinaiti. 7Takai Saúl ayak: Wemi, ¿turasha ni iniakrisha warimpa susattajia? chikichik pankesha ni sumainka pegke atsurtamji. 8-9Takai inatai ayak: Winau kuit ishichik aruta ju Yuusa chichamen etserin susami, ni turam burrosha tuig matsata nuna ujatmaktaji, tusa tinaiti. 10Tutai Saúl wemi tusa tsaniasag yaaktanam Yuusa chichamen etserin pujamunam wearuiti. 11Tuma yaaktanam jeastatuk nuwa ainan entsa yumirmatain shikiktasa wininan igkug chicharainak: ¿Yuusa chichamen etsernusha juig puja? tusa tuina.
12Takai nita aimainak: Ee, jui pujawai, turasha yaaktan nagkaiki pujawai. Wári wetaarma, Yuus ememattasa iruuntai jea aarin Yuusan eme enentaimtus iiyak tagku maa epeattsa yamai yaaktanam taamayi. 13Nui jearum eke yurumkan yuattsa Yuus ememattasa iruuntai jeanam weachuk eaktarma. Yuusan eme anentas iiyak tagku maamua nuna ni taa Yuusan aujsamtai yuami tusar nakainawai. Tuma asamtai wári weakrumka wainkattarme, tusa tiaruiti.
14Tuinam yaaktanam wearuiti. Tura Samuelan Yuus ememattasa iruuntai jeanam weak, nita wenamunmani jinki winaun wainkaruiti.
15Kashinia nui Saúl jeatin ai, Yuus Samuelan chicharuk: 16Wii kashin, ju tsawantin amina jeemin Benjamín weantunam akinan Saúl naartinan wii etegkamu Israel shuar ainan apuri atinan akupkattajai. Turamtai ame aceitejai muuknum ukatrattame.#9.16 Yaunchukka apu atii tusa turujakaru ainawa. Ni wii etegkamu israelita ainan, filisteo aina waitkainam seatainan anturkajai. Tuma asamtai ayamruk agkanmamtikattawai, tusa tinaiti.
17Samuel Saúlan wainkauwaiti. Turamtai Yuus Samuelan chicharuk: Wii shuaran yau amina pachisan timajam nuka auwaiti. Wii etegkamu israelita ainan apuri atinka niyaiti, tusa tinaiti. 18Saúl Samuelan jeari chicharuk: Tuimpa Yuusa chichamen etsernusha puja, nu winasha wait aneasam ujatkata, tusa tinaiti.
19Takai wiyaitjai tusa, tagku aina maa epetainam weri ijai yurumak yuami. Ame wari inintsa nekattsam wakeram nunaka kashin káshikmasan ujaktajme. Turamtai nui waketkita, tusa tinaiti. 20Burro megkarau ainan wainkara nuka tres tsawan awai, tuma asamtai puyatrukaipa. Tura nuiyasha amina tura amina pataim ainajaimak Israel shuar ainan apuri atii, tusa Yuus wakerutma nu nekata, tusa tinaiti. 21Tutai Saúl ayak: ¡Turasha ika chikich Israel shuar nukap aina tumauchuwaitji, wika Benjamín weantu ishichik aina nuiyayaitjai! Nuiyasha Benjamín weantu aina nuiyatika imanchau ainaji. Tumau aisha ¿urukamtai winasha turutmea? tusa tinaiti.
22Tusa chichasar umikar Samuel Saúlan nina inatairijai juki yurumak yuaku iruuntainam Samuel emak wayawaiti. Tura treinta shuar eme anentsa iitai aina pekaramunam ekentsauwaiti. 23Tura yurumkan inarnun Samuel chicharuk: Wii yutain amakun juka akanka ikusta tusan timaj nu itaata, tusa tinaiti. 24Tutai yurumkan inarnusha kuntinan makuin juki Samuelan ekettsauwaiti. Turamtai Samuel Saúlan chicharuk: Shuar ainan ipaa asan ju namagken nitajai iruunar yuati tusan akankan ikursamjame nu yuata, tusa tinaiti. Tutai nu tsawanta nui Saúl Samueljai jimartuk yuawaiti.
25Tumawar Yuus ememattasa iruuntai jeanam matsatu jiintrar yaaktanam Samuela jeen Saúl kanartinan jea tuntupen paka asamtai nui umirkaruiti. 26Tura Saúl tepes kanaruiti. Kashin tsawaarmatai Samuel, Saúlan yaki pujaun untsuk chicharuk: Nantakim waketkita, tusa tinaiti. Tutai nantaki uminas, Samueljai aa jiinkiaruiti. 27Tuma yaaktan ikukiar wenak Samuel, Saúlan chicharuk: “Amina inatairam emak weti tusam akupkata. Turasha ameka ukunam juakta, tumawakmin Yuus turutmaun ujaktajme” tusa tinaiti.
Currently Selected:
1 Samuel 9: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
