1 Samuel 3
3
Yuus Samueljai chichasmau
1Elí jintinmau asa, Samuel Yuusan metek umirujakuiti. Nu tsawantinka Yuus shuar ainan tuke tsawantaika wantintujakchauwaiti.
2Elí wainmamainchau nekapuk nina kanutairinig kanak tepejakuiti. 3Yuus ememattasa iruuntai jeanam káshi lámpara eke kajintsaig, Yuusa arcari amaunam kanú tepau. 4Tumattamaun Yuus untsuak: ¡Samuel! ¡Samuel! tutai ni ayak: Jui pujajai, tusa tinaiti. 5Tusa nantaki tsekegki Elín jeari, ¿amek untsuram? tusa tinaiti. Tama Elí chicharuk: Atsaa wika untsuatsjame, ataksha waketkim kanúta, tusa tinaiti. Tama waketki tepesuiti. 6Tumattamaun Yuus ataksha untsuak: ¡Samuel, Samuel! tusa untsuam, nantaki Elín jeari chicharuk: Amek untsuram, tusa tinaiti. Tama Elí ayak: Atsaa, wika untsuatsjame, ataksha waketkim kanúta, tusa tinaiti. Tama ataksha waketki tepesuiti. 7Samuelka Yuus chichamun chikichkiaksha antukchau asa, yáki untsura tu enentaimu. 8Tumattamaun tresa juisha ataksha untsukuiti. Turam Elín jeari chicharuk: ¿Amek untsuram? tusa tinaiti.
Tutai Elí Yuus untsuam tatsuash tu enentaimrauwaiti. 9Tuma asa Samuelan chicharuk: Ataksha waketkim tepesta. Yamai untsurmakaigka: Yuusa, wika amina umirin asan jui pujajai, wari ujatkattsam wakeram nuka ujatkata tusam titá, tusa tinaiti. Tutai ataksha Samuel waketki tepesuiti. 10Tumattamaun ataksha yaunchuk untsujakua turusag untsuak: ¡Samuel! ¡Samuel! tutai ayak: Yuusru wika amina umirin asan jui pujajai, wari ujatkattsam wakeram nuka ujatkata, tusa tinaiti.
11Tutai Yuus Samuelan chicharuk: Israel shuar ainan ashammainan iwaintuktatjai. Nuna shuar aina antukar ashamainak kurainiartatui. 12Tura wii Elí uchiri ainan waittan susartinaitjai tusan tinaitaj nunaka metek umiktatjai. 13-14Tura Elísha uchiri aina tunaun takainan nekayat jintintachuiti. Turamu asar tunaun shir pegkerchau takainak wina akajtukaru ainawai. Turutawaru asarmatai Elí uchiri ainanka nekas ijinatnaitjai tusa tinu asan, nita tunauri tsagkurnartinan tagku ainan maa epenakaisha tura ninu atii tusa anajmatruawar suruinakaisha pegkesha tsagkurtsuk, ni weantu ainajaimak waitat tuke atinan susartatjai, tusa Yuus Samuelan ujakuiti.
15Samuel kashin tsawak káshikmas nantaki, Yuus ememattasa iruuntai jean waitiri ainan uraruiti. Turasha Yuus timauwa nuna, Elín ujatan ashama. 16Tumakai untsuk chicharuk: ¡Wina uchir Samuel! tusa tinaiti. Takai ni ayak: ¡Jui pujajai! tusa tinaiti. 17Tura Elí iniak: ¿Yuuscha warina ujatmakma? ¡Wait aneasam uutsuk ujatkata!. Yuus amina turammauwa nu ashi ujatchakminka ni waittan amastatui, tusa tinaiti. 18Tusa tama ni antukmaunka pegkesha uurtsuk Elín ashi ujakuiti. Turam nuna antuk chichaak: Yuuska Tuke Pujuwaiti, tumau asa ni wakeramurinka turusag umikti, tusa tinaiti.
Samuel uchichik Yuusan umirkamu
19Yuus yayámu asa, Samuel ninak umi umiriakua tsakaruiti. Tura Yuus ni timaunka turusag umikuiti. 20Tura Yuus Samuelan chichaman etserturkati tusa etegkayi tamaun, Israel shuar aina Dan weantu aina nugkeen nagkama yaakat Beerseba tutaiya imanaisha ashi nekawaruiti. 21Tura Samuelan Yuus tuke aujin asa, yaakat Silonam ni ememattasa iruuntai jeanam Yuus ataksha wantintuk chichaman ujakuiti.
Currently Selected:
1 Samuel 3: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
