1 Samuel 4
4
Elí uchiri ainajai jakamu
1Turam Samuel Israel shuar ainan ashi ujakuiti.
Nu uwítin filisteo aina iruuntraruiti, israelita ainajai maaniawartasa. Tumawar nugka Afec tutainum aakmak matsamsaruiti. Tumawarmatai israelita ainasha nitajai maaniawartasa jiintrar nugka Eben-ezer tutainam jeastatuk matsamsaruiti. 2Tura filisteo aina, israelita ainan maaniamunam nepetkaruiti, turuinak cuatro mil israelita ainan maawaru ainawai. 3Turamu asar israelita aina nita jeen waketrar kaunkarmatai apu aina nitan ininak: ¿Urukamtai filisteo aina ijinawarti tusasha Yuuscha inaitamsaji? Yaakat Silonam wearmi. Tumar Yuus chicham umikmau egkeamua nu arca utiarmi. Turakrinka filisteo ainan nepetkarti tusa yainmaktatji tusar tiaruiti.
4Tusar apu aina yaakat Silonam ujumak shuaran Yuus chicham umikmau egkeamua nuna arcan utiarti tusa akuprauwaiti. Turam wear arcan itaawaruiti. Nu arca nukutairin Yuus ashi senchirtina nu pujutairi querubín tutai jimar nakumkamu ajakuiti, Yuus chicham umikmau nui egkeamu ajakuiti. Tura Elí uchiri ainasha nui takaina asar Ofni, Fineesjai wearuiti. 5Yuus chicham umikmau egkeamu ajakua nuna arcan jukiar nita matsatmaunam itarmatai israelita aina shir anenak senchi untsumaina. Nu imatmainakai nugka muchitkauwaiti. 6Tumainakai filisteo aina chichainak: ¿Israelita ainasha urukamtai imaniksha pampainawa? tusar tuina. Yuusa arcarin israelita aina nita matsatmaunam itamun nekaawaruiti. 7Tura ashamaina asar chichainak: Yamaika israelita ainan Yuus yaigtatui tusar tuina. Yaunchuksha wainkashmau israelita aina nugken Yuus taayi,
8¡Yuus ashi senchirtina nu ina waittan suramkai ayamturmamainka chikichka atsawai! ¡Niyaiti egiptonmaya ainan jata ashammainan waittan susa ijinujakua nuka! 9Tumaina asar apu chichainak: Israelita aina ina inatairi ajakaru aina tumasrumek atumsha nita inatairi jasaij takurmeka, atumsha senchi kakaarum maaniktarma tusar tunainiaruiti.
10Tura filisteo aina israelita ainan maaniak nepetkauwaiti. Tura aya nawejaig yujasar maanin aina nuna treinta mil suntar ainan maawaruiti. Tura iwáku juakaru aina nuka jea waketraruiti. 11Yuusa arcarin juinak, Elí uchiri Ofnin, Fineesjai mai maawaru ainawai. 12Turasha chikichik suntar Benjamín weantu maaniamunmaya jinki tsekegki, nu tsawantinik yaakat Silonam jeawaiti. Nu tumawa nuigka, wake mesemar nekapeamun jaanchin japiki jak nina muukencha nugkan yukug aya nugkak jas jeawaiti. 13Chicham umiktin aarmaun egketun jukiaru asamtai Elí waitinam ayaamas jintanmani iimas eketmaunam jeawaiti. Tuma jea yaaktanam wayaa shuar aina matsatun maaniamun pachis etserkauwaiti. Nuna antukar senchi útaina. 14Imatainakai Elí antuk inimuk: ¿Nunasha urukamtai imataina? tusa tinaiti. Takai suntar tsekegki jeawa nu Elín jeari chichaman ashi ujakuiti. 15Turasha Elíka noventa y ocho uwí arujakuiti. Iman uwí aramu asa wainmamainchau jas pujau. 16Tura jeari chicharuk: Maaniamunam wekan tsekegkin yamai tajai, tusa tinaiti. Tama Elí iniak: ¿Turasha chikich ainasha urukawarma? tusa tinaiti.
17Takai ni ayak: Filisteo suntar aina ina nepettamki chicham umiktin aarmaun atantramkiarmaji, tura suntar aina jinawarmayi, tura nuiyasha amina uchirmincha mai maawarmayi, tusa tinaiti. 18Takai Elí nuna antuk nina ekeemtairinia nina kijintrijaig iyar kuntujen kupik jakauwaiti. Elíka Israel shuar ainan apuri jas cuarenta uwí takasuiti.
19Elí uchiri Fineesa nuwe uchi juretnak jas pujau. Tuma pujau chicham umiktin aarmaun egketun arcan jukiarmayi, amina aishrumnasha maawarmayi, tura amina aishrumin aparisha jakamai tamaun antuk, senchi najautkam uchirmakuiti. 20Eke jatsu aig nuwan ujerin aina chicharainak: Ashamkaipa, aishmag uchirmakume, tusa tinaiti. Tutaisha chichatsuk jakauwaiti. 21-22Turasha jatsuk uchiri naarin Icabod anaikauwaiti. Nuna tu anaikauwa nunaka: Chicham umiktin atankimu aina nui, nina aishri jakauwa nui, tura aishri aparisha jakauwa nui, Israel shuar ainaka yamai nagkamas Yuusrinchau juakarai, tusa tu anaikauwaiti.
Currently Selected:
1 Samuel 4: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
