Salmos 86
86
1Hneˉ DSAˉJØ̱Ø̱Hˈ kya̱a̱nꜙ,
hiiꜘ toˉgwahˊ hiꜙ nʉʉˉ heˉ ngɨɨnˊ kyahˈ,
jëëhꜘ tiˉmeehˉ dsënꜙ heˉ dsaˉngëënꜘ wɨɨꜘ.
2Hä̱ä̱ˋ jnäꜘ, jëëhꜘ høøꜙ baˊ jnäꜘ juuˈ kyahꜗ.
Lä̱ä̱ˋ jnäꜘ Dio kya̱a̱nꜙ, jëëhꜘ jmeeꜙ baˊ jnäꜘ taˊ kyahˈ,
hiꜙ chaˉ baˊ oˉjø̱hꜙ dsëˉ kinꜙ kya̱a̱hˊ hneˉ.
3Hneˉ Dio kya̱a̱nꜙ, waˊ läˉñihꜘ hohꜘ jnäꜘ,
jëëhꜘ läꜙta̱a̱ˈ jmɨɨˊ baˊ chu̱u̱nꜘ kya̱a̱hˊ hneˉ.
4Jmeeˊ jë̱ë̱ˉ dsëꜗ hi̱ˉ jmeeꜙ taˊ kyahˈ.
Ja̱a̱ˉ hneˉ baˊ la̱a̱hˈ Dsaˉjø̱ø̱hˈ kya̱a̱nꜙ hi̱ˉ hnaahnꜙ.
5Jëëhꜘ hneˉ Dsaˉjø̱ø̱hˈ kya̱a̱nꜙ,
lluꜗ hohꜘ hiꜙ jø̱hˉ hohꜘ kya̱a̱hˊ jnäähꜗ,
hiꜙ chaˉmiihˉ läˉñihꜘ hohꜘ kya̱a̱hˊ läꜙjë̱ë̱ꜙ hi̱ˉ ngɨɨꜙ kyahꜗ.
6Nʉʉˉ kihꜗ läꜙjëꜙ heˉ ngɨɨnˊ kyahˈ hneˉ DSAˉJØ̱Ø̱Hˈ kya̱a̱nꜙ,
jmeeˊ heꜗ läꜙjëꜙ juuˈ heˉ hlë̱ë̱hnˊ hneˉ.
7Läꜙ maˊ cha̱a̱nˉ dsooˊ jmɨˊwɨɨꜘ chu̱u̱nꜘ kya̱a̱hˊ hneˉ,
jëëhꜘ jmeehˉ baˊ hneˉ heˈ kinꜙ.
8Hneˉ Dio kya̱a̱nꜙ,
saꜙ cha̱a̱ˉ gaˊ jñahꜘ dio hi̱ˉ la̱a̱ꜗ läꜙko̱hꜘ hneˉ.
Saꜙ cha̱a̱ˉ niꜙ ja̱a̱ˉ hi̱ˉ jmeeꜙ läꜙko̱hꜘ jmeehˉ hneˉ.
9Läꜙjë̱ë̱ꜙ dsaˉ hi̱ˉ gaꜙlla̱a̱hˋ läꜙka̱a̱ˉ läꜙjʉhꜗ jmɨˉgyʉʉꜙ
yaˉnääꜘ ju̱yhꜗ jnëyˊ chaˊnëhˊ, hiꜙ jmeeyꜗ jʉʉhˉ kyahꜗ.
10Jëëhꜘ ja̱a̱ˉ hneˉ baˊ la̱a̱hꜗ jø̱ø̱hˈ hi̱ˉ lihꜙ jmeeꜗ heˉ jʉhˉga̱a̱ˉ.
Ja̱a̱ˉ hñaahꜗ baˊ hneˉ la̱a̱hꜗ Dio, saꜙ cha̱a̱ˉ gaˊ jñahꜘ.
11Hneˉ DSAˉJØ̱Ø̱Hˈ kya̱a̱nꜙ, miˊtë̱ë̱ˈ jnäꜘ juuˈ kyahꜗ
mahꜗ ngënꜙ läꜙ lleˋ juˈdsooꜘ kyahꜗ.
Waˊ jä̱ꜘ ko̱o̱ˉ hwehˉ nehꜙ tuhˉdsënꜙ juuˈ kyahꜗ
mahꜗ läꜙja̱ˉ läꜙga̱hnꜙ hneˉ.
12Hänˋ kyahˈ hneˉ Dsaˉjø̱ø̱hˈ kya̱a̱nꜙ, läꜙka̱a̱ˉ tuhˉdsënꜙ.
Hiꜙ jmeenˋ jʉʉhˉ kyahꜗ gaꜙläꜙjëꜙ johꜘ jmɨɨˊ chaˉ.
13Jëëhꜘ chaˉmiihˉ maˉläˉñihꜘ hohꜘ kiꜙ jnäꜘ.
Hiꜙ maˉlä̱ä̱hˋ jnäꜘ heˉ maˊ tä̱hnꜙ nehꜙ chaˊjeˉ ñiihˊ.
14Hneˉ Dio kya̱a̱nꜙ,
läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ maˉllaˉdsëëyˋ kinꜙ.
Ko̱o̱ˉ nääꜗ hi̱ˉ hñaaˉ dsëꜗ
hnooyhˉ haˉ läꜙ jeeˊ jngëëyhꜙ jnäꜘ.
Dsaˉ heꜘ saꜙ ga̱yhꜙ hneˉ niꜙ miihˉ.
15Chaˉmiihˉ läˉñihꜘ hohꜘ hiꜙ jø̱hˉ hohꜘ hneˉ Dsaˉjø̱ø̱hˈ kya̱a̱nꜙ.
Saꜙ dsaˉläˉlle̱e̱hꜘ cha̱hꜘ.
Peerꜙ dsaˉläˉñihꜘ hohꜘ chaˉmiihˉ
hiꜙ juˈdsooꜘ kyahꜗ jnaahˈ laꜗ.
16Hä̱ä̱ˋ jnäꜘ hiꜙ waˊ läˉñihꜘ hohꜘ kiꜙ jnäꜘ.
Kwaˊ beꜘ kihꜗ hi̱ˉ jmeeꜙ taˊheꜗ kyahˈ,
hiꜙ hä̱ä̱ˋ jo̱o̱ꜘ dsaˉmëꜘ hi̱ˉ jmeeꜙ taˊheꜗ kyahꜗ.
17Miˊjnääˈ kinꜙ heˉ lluꜗ hohꜘ kya̱a̱hˊ jnäꜘ.
Mahꜗ waˊraˉ gaꜙjëëꜗ hi̱ˉ naˉhøøhˊ kinꜙ jäꜙ läˉhiiyhˊ.
Jëëhꜘ ja̱a̱ˉ hneˉ baˊ DSAˉJØ̱Ø̱Hˈ kya̱a̱nꜙ kwahˉ beꜘ kinꜙ
hiꜙ jmeehˉ dsaˉnøhꜗ dsënꜙ.
Currently Selected:
Salmos 86: chz
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
