Roma Nenacaauru Rai 16

Arajiin cachaauru coaauca Faboro.

1Jesocurisito rai iclesia neein nenacaauruhacha latei que acaauru coroatajaneraneein Cencrea nenaalu cana nejeraneein ene neein nenaa Febe quene inara rai aitoreeunni, 2coujuriu Jesocurisito esenetaeraneein nenaa tocohaneein, inara rene turuhane raotojoeein Jesocurisito coreniha raain, satiin niicha latei que coroatajanequichene coina. Acate leeochaauru coroatajaneein canune maajeein coroatajanelu.

3Canu rai Jesocurisito tenojoi amihanenaa que canu coroatajanera neein nenacaaurulu- Aquila, Firisila, naaonjoainuri coaucaaunne beeuche acaauru rai.

4Acaaurute canu coreniha nichao itajerateeuruhane rai neeurelu, canu sohin canu jaonaa jerecuruhane bana. Nii jaun coatiha canuhacha acaauru coaaunaain, satiin Jesocurisito rai iclesianeein nenacaauru Jorioniheichurute acaauru coreniha Cana Coaunera bajanajaaocure.

5Jerichanetojoeeinchu Aquila, Firisila, naaonjoainuri loreri asaae netaojianacaauru canejeraauru coaaucaaune beeuche acaauru rai. Jataain canuhacha belaai- Efeneto coaaucaaune beeuche. Acate jauriaanejeein Asia batane que Jesocurisito esenetaera neein nelu.

6Taolu carajaain inara jana neein, inara coroatajaneraneein nenaa Mariha netonai coaaucaaune beeuche.

7Chaaen canu araaichuru canu aina jiniiquiin caresero cuhane nenacaaurulu- Andronico, Joniasi, naaonjoainuri rai acaauru coaaucaaune beeuche. Acaaurute afosotooru que caohacha cachanecuruhane coaarateein, canu ajiniha Jesocurisito esenetaeraneein neeurelu.

8Jesocurisito coreniha jataain canuhacha belaineein nenaa Ampliato rai coaaucaaune beeuche.

9Chaaen canu rai Jesocurisito tenojoi amihanenaa que canu coroatajaneraneein nenaa Orobano, canuhacha belaai Estaquis, naaonjainunri coaaucaaune beeuche acaauru rai.

10Jesocurisito esenetaeraneein nihane jaun, mainajeein cojunojoineein nenaalu Apeles netonai coacuhin, Aristobolo aina rai naraaichuru coaaucaaune beeuche acaauru rai.

11Chaaen canu araai Erodion, nii baiha Narsiso aina nejeraauru Jesocurisito esenetaeraneein nenacaauru, naaonjoainuri coaaucaaune beeuche acaauru rai.

12Jerichanejeeinchu Jesocurisito icharatenohi icharaneein nenacaauru Tirifena, chaaen Tirifosa, naaonjoainuri rai acaauru coaaucaaune beeuche.

Chaaen cana nejera, Jesocurisito coreniha cana baineein nenaa Persida- nii mainajeein Jesocurisito tenojoi amihanenaa icharaneein nenaalu rai netonai coaaucaaune beeuche.

13Rofo rai netonai coaaucaaune beeuche. Acate leeochaauru amuritoheriin Jesocurisito esenetaeraneein nihane coaarate.

Chaaen rai nebate canu neba rijijieein cacoelaichaneein nelu.

14Chaaen Asiincrito, Fleconte, Eremesi, Patrobas, Eremasi naaonjoainuri, chaaen acaauru aina nenacaauru canejeraauru netonai rai acaauru coaaucaaune beeuche.

15Chaaen Filologo, Jolia, Nereo aina rai bai Olimpias, naaonjoanunri rai acaauru coaaucaaune beein, canaacha esenetai coreniha canejeraauru rai netonai acaauru coaaucaaune beeuche.

16Jiniiquiin raotojoeein ita rai ereein neeuche, ita nejeraneein nenaa rijijieein. Satiin Jesocurisito esenetaain rai cachaneein nenacaauru netonaite inara coaaucuruhane berateeure inara rai.

17Inara canejera neeichene raine aitoreeunni, atiin nii jelai leeochaauru lerueraneein- inara amihaneeo lacuroaeraneein nenacaauru coaraain, acaauru que nainaain ichaohichene coina. Nitohanei icharate relanojoineein neeichelune jaan ichaquichene caohateraneein aicheein. Aihane jaun jiaonriha acaauru rohan neeichene. 18Jesocurisitohacha jerei ichana coacuelanaalate nechu acaauru jerecuruhane rijijieein rainuhacha que chachaain neeure. Chaentechu enaacha cacha coritana inatiin aihuruhane jaun, acaauru coitucuelanaala nenaa cacha coritacure enaacha.

19Satiinte Jesocurisitohacha jerei tonoraain ichaohichene coitucuure. Nii jaunne jataain rachoojoeeun inara coreniha. Aihane jaun baaso ichana coacuelanaala, itolere coitucueraneein neeichene coaarateein caohacha nejesina ichacuche. 20Aihate inara tijia asaae jaoleneein niha nii baaso icharatera moconajaerane coina ichamiin raotojoeein nihacachene teraneein nenaa Cana Coaunera. Inara coroatajanemiin Cana Curuaanaa Jesocurisito.

21Canu amihaneeo que cacorataaneraneein nenaa Timoteeo netonaite inara coacue. Chaaen canu araaichuru Locio, Jasoon, Sosipater, naaonjoaihunri.

22Canu caa Faborohacha laenaeratei quiricha laenara- Tersio nichaaunnena canuhetonai cana Curuaanaa coreniha inara coacuun.

23Chaaen caa nihanune jaan loreri erora Caiho netonaite inara coacue. Acate rai loreri te, satiin iclesianeein nenacaauru turunacaauru nasaae netaojiaauruhane coina. Chaaen caa nihacaanune jaan nese cocoaichacuru rai coriqui beraichaneein nenaa Erasto netonaite inara coacue. Chaaen cana nejera Coarto netonaite inara coacue.

24Cana Curuaanaa Jesocurisito, satiin inara coroatajanemiin. Nitohaneeine.

Raotojoeein rachoojoeein Cana Coaunera coroaaecuche.

25Cana ichoterateraneein niha Jesocurisitone que inara relanaanune rijijieein, leeinjiin Acaacha jerihane rijijieein neeichene coina icharaneein nenaa Cana Coaunera coroaaecuche. Nii inara relaanune jaante, chuni que coitucueratelanaala sirihane caje, cana que coitucuerate Cana Coaunera. Acate asinojoineein sirilu, jaiti cana rai chauratane coaunaenihane ajiniha caje coaauneein Cana Coaunera. 26Nete laen, inae enene cana que coitucuerate nere bera inoaensihuru profetacuru que, aca jerihane rijijieein beein laenaeratihalu Cana Coaunera chabana satonoelanaala nenaane rijijieein. Nii niicha ichaneni asinojoineein nenaate, satiin lauri lauri nenacaauru cachaauru que coitucuerate Cana Coaunera, esenetaain tonoraain neeuruhane coina.

27Leinjiin itolere coitucuhin nenaa Cana Coaunera necaohacha coitucuhin coaracurumiin chabana satonoelanaala rai Calaohi Jesocurisito aina cuaain satiin cachaauru. Nitohanemiin.

Currently Selected:

Roma Nenacaauru Rai 16: URA

Highlight

Compare

Copy