Coriinto Nenacaauru Rai Leinjiin 1

Chatohaneein neeiche Coriinto neiniquichene.

1Canune Faboro neeun. Cana Coaunera jerenohi neeine, Jesocurisito cocoainanohi afosoto neein neeun. Cana nejera Sosetenesi aina jiniiquiin neeina 2caa quiricha laenacaanu. Satiin Coriinto neseu Cana Coaunera que banijiaaineein rai iclesianeein nenacaauru cana nejeraauru raina, caa laenaain letoacaanu.

Satiin inarate Cana Curuaanaa Jesocurisito aina cuaain araai laurii caje ranojoineein neeichene saijieein, Cana Coaunera que banijiaaineein le laurii caje nenaa rijijieein neeiche, itolere sacutaain Jesocurisito coroajeeun nenacaauru aina jiniiquiin.

3Cana Coaunera, Cana Curuaanaa Jesocurisito, naaonjoainuri inara coroatajanemiin raotojoeein neeichene coina.

Jesocurisito aina cuaainte rausiaenojoinichaache.

4Jesocurisito aina cuaain inara rausiaeca Cana Coaunerane corenihane, itolere bana coroajeein. 5Nii rai Calaohi Jesocurisito ere tonoraain esenetaaichene aina cuaainte, jataain inara coroatajane Cana Coaunera, niicha jerenohin coitucuhin que ita rai raotojoeein ereeiche coina. 6Nitohanihane ainate, esinae rauhijiriin erenaa niha Curisito quene coitucuhin esenetaain rijijieein neeiche. 7Nitohanihane jaun, inara rai lanarinaain caohacha ichaquichene coina inara rai Cana Coaunera tenojoin, ecooca uha Cana Curuaanaa Jesocurisitone coaraquichene que tiaojoaain. 8Inara berairichaain Cana Coaunera satono que tiaain, inara suujua letono ichaelanaala neeichene coina, nabana turuha Cana Curuaanaa Jesocurisitone bana niha inara que tonaain ereeine coataa. 9Itolere banate, satiin naitoonjoa ichae Cana Coaunera. Acate inara cotijiae, jiniiquiin rai Calaohi Jesocurisito aina ichaohichene coina.

Ita caje nelerucuruha Jesocurisito ranojoihunrune

10Canejeraauru, Cana Curuaanaa Jesocurisito corenihane inara rai aitoon, atiin ita suujua rijitojoeein nii leeochaneein inara suujua cuaelanaala jiniiquiin raotojoeein ichaohichene coina. Rachoojoeein ichaaoche ita rijijieein coacuhin, ita rijitojoeein abaantaain. 11Nejesinajeein ita cotaairiin neeichene coitucuhanu Clohe laurichuru cajene jaunna, caa inara rai aitoon. 12Chaaen techu, inara aina nenacaauru tabaauru, “Canune Faboro lauri caje neeun”, jana leochaaurute, “Canune Aforo lauri caje neeun”, jana leochaaurute, “Canune laen Fedoro lauri caje neeun”, jana leochaaurute, “Canune laen Curisito lauri caje neeun”, naaure. 13Chasiina araai lauriin neleruhin niha Curisitone coalanaala niritiin ereriquiche. Coatihachu canu Faboro nichaaunne inara coreniha coroso que ohanulune coaalanaala. Niheichu, Faboro nichaaunne coreniha baotisanojohi niheeiche. 14Cana Coaunera coroaaejihanu, Curisifo, Caiho, naaojoaihunri baotisaanune baiha leeochaauru cachaauru baotisaa nihanulune jaun. 15Nitohanihane jaun nii chuni, Faboro nichaaunne laurinihane coreniha baotisanojohiniha nocoetiin erenaa nainihei. 16Chaaen nechu Esetefana lauri baotisaaunlu. Coatiha nii baiha chuni baotisaanune coitucuhaaun. 17Coatiha cacha baotisaanune coina caletoaailu Curisito. Raujiaaincha jianacoon nenaa nainecururinaain cachaaurune bihanune coinate caletoaelu. Coatiha amurijiriin cha coitucueraneein nihanune coina caletoaailu. Nitohanihane saijieein cha coitucueraneein nenaa rijijieein nere bihanune, cha que nelaterihei cana ichoteraneein nihane coina coroso que ohalu Curisitone.

Curisitote, niicha ichana naine aina niicha coitucuhi ichaa Cana Coaunerane jaan ne.

18Nii coroso que ohalu Jesocurisitone que erenaate aonacure nii cha que nelatihei rijijieein nii nitajeeuruhane coina nenacaauru coitucuhichuru. Nete laen cana rai jianacoon cacha mitaeraneein ne nii erenaa, jeelai Cana Coaunera ichanohineein. 19Rai Quiricha Inoaensi cuhane:

“Itolere coitucuureraauru coitucunojoi itajeeinne,

nainaain ichaaoruha nainanacaaurune jaan itajereeunni”,

naain bihalu Cana Coaunera.

20Inae cha que nelateein nedaauruhi itolere coitucuureraauru aina cacha relaaureraauru. Niheichu nelateein nedaauruhi, caa cana rai chauratane que nenacaauru itolere coitucuureraauru niha natiin. Satiin itolere coitucutoha nocoetonacaaurute, leinjiin aaso rijijieein ratiri Cana Coaunera. 21Cana Coaunerate niicha coitucuhi ichae, nabana nii niicha coitucuhi aina cuaain niicha tei ichaonaa coitucuhin nichotenaa nainecuruha nii coitucuhichurune coataa. Nitohanihane jaaunte, rai nere letoae, satiin esenetaain jeriha cachane jianacoon ichaonaa nainihane coina. Nete, nii nere esenetaaichuru, joaenreein nelatihei rijijieein aonacuruhane niha natiin, esinae rauhijiriin jianacoon cacha mitaeraneein ne.

22Nitohanihane jaunte, cojoelanaacojoai coaana jerecure Jorioocuru nichaaunne. Jana Curiecocuru, cha coitucuuruhane jaanu ariiriichure. 23Nena canacaanu, jianacoon cacha mitaeranu que Cana Coaunera letono coroso que onaalu beebejihacaanu. Niite Jorioocuru rai leinjiin nererojoecanaaneein acaauru te. Jana Jorione lanaala nenacaaurute, nechu joaenreein nelatihei rijijieein aonacure. 24Nete Cana Coaunera cotihanohichuru, Joriooneein, Curieconeein, naaonjoaain nihacachene niha natiin, nii letono Mesihasi Curisitote jeelai Cana Coaunera ichanohin ichaain, niicha coitucuhi coitucuhin nihane coitucuhacache. 25Cana Coaunera beratenojoi, joaereein nelatihei rijijieein coaraa cachane niha natiinte, satiin cachaacha coitucuhi amurijiriin nelate. Chaaen techu Cana Coaunera icharatenohi, nelatelanaala coaraa cachane niha natiin, jataain cachaacha ichai amurijiriin, laraajiin mijiaaineein nereein itolere bana. 26Canejeraauru, coroatajajeeincha inara tabaauru cha coitucuera rijijieein neeichene saijieein, jitariin inara cotijiaain niha Cana Coaunerane que nainaain ichaaoche. Nii ichoae tacaain techu coroatajajeeincha inara tabaauru nelateineein nenacaauru cachaauru lauri caje neein, cocoainanacaineein, naaonjoaineein neeichene saijieein jitariin inara rae Cana Coaunera. Nii que nainaain ichaaoche. 27Nitohaneein itolere que nainaa nocoetonacaauru nocoeje chanuna jerenacaaunte, jaolecooruha nii nainanacaaurune jaacuru cachaauru janijiin cotijiae Cana Coaunera. Chaaen techu nii leeochaauru amurijiriin nelatenacaauru raelanaala, nii nelatelanaala acaauruacha coaracuri cachaauru raain ne Cana Coaunera, acaauru nocoeje chanuna jerenacaaun. 28Nitohaneeinte jerenohinelanaala, coiintenojoineein, nelatelanaala, naaonjoaain cachaauruhacha coarai cotijiaain ranajaain ne Cana Coaunera, nechu nii acaauruacha itolere amurijiriin nelatiha nocoetonacaauru que jaoleconaa jerenacaaun. 29Nitohaneein Cana Coaunera acatiha nihacachene jaun, nainihaacache leeochaauru amurijiriin nihacachene coaaratihacachene. 30Cana Coaunerate raajenihane inara raain ne, rai Calaohi Jesocurisito aina neeichene coina. Chaaen techu nii rai Calaohi Curisito coreniha chabana canaacha coitucuhi coitucuhin, coreniha osa caje mituhin, cha ujuaihoneein nenaa caje ichoteratenojoineein, jelai teein que banijiaain raotojoeein nenaa coina ichae Cana Coaunera. 31Nitohanihane quete: “Caohachaai cana raajenihane canaacha ichai coreniha necohasitaacachene. Cana Curanaacha ichanojoiincha coroaecaachenete laen caohachae”, nae Cana Coaunera Quiricha Inoaensi cuhane.

Currently Selected:

Coriinto Nenacaauru Rai Leinjiin 1: URA

Highlight

Compare

Copy