Afocarifisi 2

Caaunsi laurinei iclesiacuru rai beratenojoi. Caate nii caainsi beratenojoi caje Efesoo Cana Coaunera ranojoineein nenacaauru iclesia beraicha- anjera rai beratenojoine

1“Caritiin Efesoo Cana Coaunera ranojoinuri- iclesia beraichaneein nenaa anjera rai laenaau.

‘Aonacuche, caritiinte inara rai laenarate nii biji raotono nichajai que caainsineei arasijie siichaain- cainsinei oro caje ichanohi usi nujua cataaun amunaa: 2Canune, itolere iicha ichai coitucuhin, caaintatohane niha natiin jianelanaala neeine coitucuun. Chaaen nechu, nii necha ansaineein ichaonacaauru abaantasineeine coitucuun. Chaaen techu, afosotooru niha nocoetonacaauru niha natiin coujuhin coaraaine jana aca necurene. Nitohaneeinte casajenetooruhane coitucuhi. 3Itolere banate coiinteein jianelanaala jataain canu coreniha necairichanaa abaantaain.

4Nete jauriaanejeein aihalune tocohaneein corajeein quiicha jerei icharaneein neneei. 5Aihane jaun, jauriaa aichejetohilune que coacuhin, nii nunuheneein corajeein icharejetohilune rijijieein nacoauneein corajeein quiicha jerei icharaneein neeun, jeriha Cana Coaunerane rijijieein. Ainihanena, nii nihane jaa jelai caje, nii cono nujuaneein nenaa rulureeuni ii caje, nacoaauneein Cana Coauneraacha jerei icharaneein ichoaeneeine. 6Nete caohacha ichaai, nii Nicolasa sacuureraauru ichanohichuru rautaain coaraeneeine jaun. Canuhetonaichu acaauru ichanohichuru rautaain coarahaaun.

7Aohana jereraauru, caa ereretaain Cana Coaunera ranojoinuru- iclesiacuru rai Cana Coaunera Suujue beratenojoi aonacurumiin. Itolere necairichanaa abaantaain satono que tiaain sacuerate, nii chariji bana sanaachara ichaonaa tera enuha inaa Cana Coaunera nenajaun nenaa que lenonereein’, naain laenaau Efeso beraicha- anjera rai”,

nae nii canu notaara.

Esmirnau Cana Coaunera ranojoineein nenacaauru iclesia beraicha- anjera rai beratenojoi

8“Caritiin Esmirnau Cana Coaunera ranojoinuri- iclesia beraichaneein nenaa anjera rai laenaau:

‘Aonacuche, caritiinte inara rai laenaerate nii nunuhe caje coaauneein satono que tiaain acaneein nenaa ohalune caje ichanaain nenaa: 9Canune jataain necairichanaa abaantaain, cairicheinejeein neeichene coaraaun. Nete chaque lanaeneriquicheein dedeeu. Chaaen nechu jataain baasoneein ichei ereeuruha Joriooniha nocoetonacaaurune coitucuun. Acaaurute esinae rauhijiriin moconajaaera letono laurineein neeure. 10Jiaonriha necairichanaa coaariquiine que casiin neeine. Moconajaerate caresero cuhane inara tabaauru enoaeratereein, nii aina cuaain satiin inara cojunojoineein coaanojoinequichene coina. Jataainte necairichariquicheein lechoonca janohin. Nete ohichene que tiaaojoaain nirijieein jianelanaala abaantaain sacuhichene, canu nii cainaraanuque chariji bana nitajenaacharanejeein nenaa ichaonaa tereeunni inara rai.

11Aohana jereraauru caa Cana Coaunera ranojoihunru iclesiacuru rai Cana Coaunera Suujue beratenojoi aonacurumiin. Laraajiin itolere necairichanaa amuritiin nenacaauru coatiha ooru baiha nacoaauneein ohin nitajerinaain acaauru suujue’, naain laenaau Esmirnau Cana Coaunera ranojoinuri iclesia beraichaneein nenaa anjera rai”,

nae nii canu nae nii canu notaara.

Pergamoo Cana Coaunera ranojoineein nenacaauru iclesia beraicha- anjera rai beratenojoi

12“Caritiin Pergamoo Cana Coaunera ranojoineein nenacaauru iclesia beraicha- anjera rai laenaaun:

‘Caate aitiin laenaerate nii nujuae cuhane jerane jataain ajinaain sabere siricha: 13Raotojoeeine moconajaaera rori rohan ichaohichene coitucuun. Nete atiin caitoonjoan esenetaain canuhacha icharatei ichaquichene jianelanaala neeiche. Niheichu nii canu ere bera Antipas sohin jaaoruhalu, nii moconajaaera neseu natiin, canu esenetaain neeichene jianeein niheeiche.

14Nete neeje ichei baaso, iniha nenacaauru que ichei aitocoaaunne jaanu coitucuhine coina. Nii iniha nenacaauru tabaaurune, Isaraele inoaensihuru relaain nihalu Balaamne jaacha tonoraain jianena jerecurene. Nii Balaamte baaso que Balac suujuatihane jaun, ecaantooru que banijiaain nenaa lenone que Isaraelitaauru coroaateein, itolere osa que sarueratenajaaine maajeein naaonjoaenlu. 15Chaaen techu, tabaauru iniha nenacaauru acaauru relaain nihalu Nicolasa sacuurerane jaan jianena jerecurene.

16Aihana jaun, chajaain ena esinae Cana Coaunera esenetaeraneein jeriha Cana Coaunerane rijijieein quiicha jerei icharaneein neeuche. Ainihanena ena inara rene uhin, nii canu ujuae cuhane jerane ajinaai nenaa sabere que acaauru soreeunni.

17Aohana jereraauru Cana Coaunera ranojoinuru iclesia rai Cana Coaunera Suujue beratenojoi aonacurumiin. Itolere necairichanaa abaantaain satono que tiaain sacuurera raine chariji bana coaraelanaala asinojoineein nenaa manaa que acaauru coroaatereeunni. Chaaen nechu, nii chariji bana coitucueraelanaala nenaa cacha curuaa siriin laenanohineein leinjiin ajeri somajaain nenaa tereeuni acaauru rai. Nete laen nii ajeri raera, nii curuaa erora coitucureein’, naain laenaau Pergamoo Cana Coaunera ranojoinuri iclesia beraichaneein nenaa anjera rai”,

nae nii canu notaara.

Tiatirau Cana Coaunera ranojoinuri beraicha- anjera rai beratenojoi

18“Jerichanejeeichu, Tiatirau janijiin Cana Coaunera ranojoineein nenacaauru iclesia beraicha- anjera rai laenaau:

‘Caritiinte aitiin laenaerate nii usi lanaro tocohaneei notaain coata lanajai jicharoanohi tocohaneei tijiaain nenaa Cana Coaunera Calaohi: 19Canune jitariin iicha ichai coitucuun, jataain cachaauru belaain, iicha esenetai esenetaain, itolere necairichanaa abaantaain itolere ichaaine coitucuhanu. Chaaen nechu, jataain jauriaalu amuritoheriin ena caohachaain ichaaine coitucuun.

20Nete neejen ichei aitocoaaunne jaanu, Canu cachaneein nenacaauru coritaa, nechu Cana Coaunera coitucueraniha nocoetiin, ecaantooru que banijiaain nenaa lenone que acaauru coroaateein, chabana nitohanai osa que nesaruna naineniha cachane saijieein itolere osa que acaauru reroecaa nii ene Jesabeline abaantaaine jaun. 21Canune niqui Cana Coaunera coitucueraneein nihane cojoaaun. Nete ainaa jerelanaala, niheichu osa tabai que nesaruhane jianena jerene.

22-23Nii jauna, nii ene cunaitaain bereecurune maajeein ateinareeunni. Chaaen nechu, nii ene aina ichaojeraquiin neeuruhane jianelanaala nenacaauru ateinaain, jataain necairichanaa tabai que cairichanajareeunni. Nitohaneein ichacaaunne banate, suujua cuhane cachaauruhacha coacuhi coitucuhanune que nainaa cuurureein satiin Cana Coaunera ranojoineein nenacaauru iclesiacuru. Jana inara raine, le cacha cachanequichene rai, inaraacha ichanohin rijijieein inara rai tereeunni. 24Nete laen inara Tiatirau neinequichene, nii relanajaain neeuruhane jaan moconajaaera suujua asinojoineein nenaa coitucuhin tonoraain neneeichene, nihei nii que tonaain inara rai irihanune jaanu. 25Aihana jaun, turuhanune reentiaain jerichanejeein sacuuche jianelanaala.

26Itolere necairichanaa abaantaain satono reentiaain canuhacha jerei ichajeein sacuureraaurune cocoainareeunni, lauri nenacaauru cachaauru curuaanaaneein neeuruhane coina. 27-28Charijieein teeinti canu cocoainaain nelu Ofa Cana Coaunera, nii rijijieeine inara cocoainareeunni, lauri nenacaauru cachaauru curuaanaaneein neeichene coina. Nii banate coata caje nenaa otiha que erenaa tonoraelanaala lauri nenacaauru tuteneriquicheein, darohe tutenecuruhane rijijieein. Chaaen nechu nii choae tacaain janonaarai mitunaa arasijie tereeuni acaauru rai.

29Aohana jereraauru, caa Cana Coaunera ranojoinuri iclesiacuru rai, Cana Coaunera Suujue beratenojoi aonacurumiin’ ”,

naain laenarate nii canu notaara.

Currently Selected:

Afocarifisi 2: URA

Highlight

Copy

Compare