Afocarifisi 1

“Naaonjoanrichaain”, naain coaaratiha Jesocurisitone

1Caate, inae nichuuntaa nitohanerichaain jaun rai cachaneein nenacaauru que coaaratiha rai Calaohi Jesocurisito aina cuaain Cana Coaunerane jaa ne. Nii jaunte rai nere beraneein nenaa Joaan nichaaunne rene, rai nere bera anjera letoae Jesocurisito, canu que niicha coaaratei coaaratiha nii anjerane coina. 2Nii jaunna, canu que coaaratiha Jesocurisito aina cuaain Cana Coaunerane rijijieein, esinae rauhijiriin nii coaaraneein coaracaaunne rijijieein laenaaun.

3Nerausiaecururichaain caa Cana Coaunera beratenojoi reretaera aina aonaain caa laenanohineein nihane rijijieein tonoraain nenacaauru, inae ichuunejeeoriha nitohanerichaain jaun.

Caaunsi laurineein Jesocurisito ranojoineein nenacaauru iclesiacuru rai laenaa Joaane

4Asia batane que caainsi laurineein Jesocurisito ranojoineein nenacaauru iclesiacuru raine canu Joaanneein caa laenaaun. Raotojoeein neeichene jaanu teein neeuruhine nii nunuhe caje coaauneein neein ena acaneein neein turuha uheneni neein nenaa Cana Coaunera, rai nelaurianajaan- trono acatiha caainsineein suujueneein nenacaauru aina, 5chaaen esinae rauhijiriin, aca jerihane rijijieein neein nere beraneein nenaa Jesocurisitone maajeein. Acate jauriaanejeein ohane caje ichanaelu. Nii jaunte, satiin chauratane sacuritaain nenacaauru curuaanaacuru curuaanaaneein ne Jesocurisito. Nii Curisitote jataain cana belaitohane jaun, rai coichana aina cuaain osa caje cana rocoelu. 6Nitohaneein cana teeinte, jelai teein rai cachaneein aihuruhalu saseredotecurune rijijieein rai Inaca Cana Coaunera rai caohacha icharaneein niicha jerenohin ichacaachene coina cana teein nelu. Aihana jaun Cana Coaunera necaohacha aina, itolere niicha ichana nainei itolere bana Jesocurisito raineein neeine. Nitohanemiin.

7Inae nacoaauneein dede sacari jana uhin fauha uha Curisitone janate,

satiin coaanojoinereein.

Nii sohin jaaoreraluniha natiinte coaraa cuurureein.

Nii jana caa chauratane que lauri ichaonacaauru cachaaurute,

chanaa cuurureein coreniha.

Aiha nitohanerichaain.

8“Canune nunuhe caje coaauneein itolere coauneraneein satono que tiaain acaneein neeun”, naa Cana Curuaanaa Cana Coaunera- itolere curuaanaaneein turu rai nenaa.

Jataain caohacha que necaohachaain necoaaratiha Jesocurisitone

9Canune satiin inara nejera Joaanneeun. Jesocurisito corenihate, canu nejeraneein neeiche. Nii rijijieein techu, jiniiquiin cojunojoineein necairichanaa abaantaacache, laraajiin cana coroatajaniha Cana Coaunerane jaun. Nitohanihane jaunne, Cana Coauneraacha jerei Jesocurisitohacha coitucueratei beebejihanune coreniha caseteconeein Patmo cobenau neeun. 10Ecute tomiho cojoanonaa bana, caniha neeoritoha Cana Coaunera Suujuane jana, canu janori nichaae toniin: 11“Leinjiin quiricha cuhane iicha coarai laenaain, caainsi laurineein Asia batane que nenacaauru Efeso, Esmirna, Pergamoo, Tiatira, Sardisi, Filadelfia, Laodisea, naaonjoainu Jesocurisito cachaneein nenacaauru rene letoaau”, naain mijiaaineein toniha carai jaiha rijijieein nenaa toroonfeta rijitiin erenaane jana aonaaun. 12Nii carai erenaa coaracaaunne coina nauriterichaaunne janate, tirichotiin jiquihaquiin ne ecu caainsineein cono nujua oro caje ichanohin. 13Nii caainsineein cono nujua oro caje ichanohin cataaunne cacha tocohaneein tijia que uujoai cajionequin, somajaain cajione que cajionequiin nelarijia que uujoaain oro caje ichanohin sintoroon que ichoraane coaraaun. 14Nii jana rai couturi ujuite dede sacari tocohaneein somajae. Jana, rai notate tirichotiin usi lanaro tocohane. 15Nii jana rai tijiaaurute, orono cuhane tucuhacaain ichanohin bronce tocohaneein jiquihaque. Nii jana rai nerete, jataain mijiaaineein caraturi toni rijitiin tonihane jana, 16rai raotono nichajai que caainsineein arasijie siri biji cuhane. Nii jana rai nujuae cajete mitue jerane jataain ajinaain sabere. Nii jana rai merite, jataain conotiin conoha enotone tocohaneein jiquihaque.

17-18Nii jaunne coaariin tijia asae comoon onaa rijijieein. Nete biji raotono nichajai que canu mucuhin: “Jiaonriha casiine. Canune ichaohin itolere coaaunaain satono que tiaain Coauneraneeun. Canune niqui oonlu, nene ichanaaun. Inae charijibana orinaaunni. Canune cana asaae nitajenacaauru rai chabi sirihun. 19Caa ena nenaa iicha coarai laenaain, caa baiha neeninu iicha coarai laenaaun. 20Caa canu biji raotono nichajai que caainsiinei arasijie, chaaen caainsiinei cono nujuaneein nenaa oro, naaonjoainuri iicha coaraite, charijibana coitucueraelanaala asinojoineein nenaa ne. Nii caainsiinei arasijiete Cana Coaunera ranojoineein nenacaauru iclesiacuru beraihurera anjeraauru ne. Jana nii caainsiinei cono nujua oro caje ichanohinte, caainsi laurineein Cana Coaunera ranojoineein nenacaauru iclesiacuru ne”.

Currently Selected:

Afocarifisi 1: URA

Highlight

Copy

Compare