Afocarifisi 11

Niicha icharatei coaaranuuru letoaa coroatajaain Cana Coaunerane

1Nii baihate, carai jiarana tocohaneein leinjiin bara teein: “Chajaain nimichuhin cuhin Jerosaleeun nenaa Cana Coaunera bajaauruhane jaan coloheri, Cana Coaunera belaihuruhane jaan rori, naaonjoainuri cojunacateeu. Chaaen ecu janiichu, inaaojoaaincha Cana Coaunera coraaeca neeurureein. 2Coa Cana Coaunera bajaauruhane jaan coloheri rohan nenaa airiniha cojunacatiha. Niite teeure Jorioniheichuru rai. Acaaurute Cana Coaunera nese cocoaichacuru amiharateeurureein, jataain cairichanajaain, jena choonca coroata ateineein. 3Canune coroatajai canu ere beeurera letoareeunni, uhin le oaraanca coroata fasha saota choonca janoneein canu ere beeuruhane coina”, naain canu letoaaure.

4Nii coroatajai Cana Coaunera ere beracurute coroatajai olibo nujuan aina coroatajai usi temura neein neeure, cana rai chauratane coauneraneein nenaa Cana Coaunera acatiha. 5Chunocoha chatohaneein acaauru tenaa jerera nihanete, acaauru ujuae caje usi mitaaurureein jitariin acaauru que nejeratenacaauru mocohane nitajeeuruhane coina. Nitohaneeinte oorureein nii acaauru rerohecaeraauru. 6Nii coroatajaihurite nelate que nelateein, cana dede funaa nainecurureein Cana Coaunera ere beebejeeuruhane jana uha elo ne coataa. Chaaen techu, ichana neein acau corenaa naainecurureein. Nii rijijieein techu, araai laurii necairichanaa turuanaa nainecurureein caa cana rai chauratane que, acaauru jerecuruhane tocohaneein.

7Inae acaauru que Cana Coauneraacha beratenojoi benaa nainaauruhane janate, mitureein cana asajai caje leinjiin neecha aansai ataebinae tabai, acaauru sohin acaauru jaohane coina. 8Nitohaneein acaauru sohin acaauru jaohane janate, Cana Coaunera Calaohi cairichaauruha coroso quene jaan nese coero cuhane nereein acaauru jaberoco. Jerosaleen nihane saijieein Sodoma, Egipto, naaonjoaineein acaauruacha curuhateihu. 9Nichata janohin cataaun uujue banate acaauru jaberoco coaraa cuurureein araai laurii nenacaauru, coriaae caje unacaauru, lauriu nichao que ichaohin nere que ereein nenacaauru cachaauru, naaonjoainuri. Nete, acaauru jaberoco conautecuruhane caohatereein. 10Nii nainihate jataain rachoojoeeurureein caa chauratane que nenacaauru cachaauru, ooruha nii coroatajai Cana Coaunera ere beebejeeurerana jaun. Nitohaneeinte rachoojoeein beseta ichaain ita belaiha cuurureein itolere nijihanai que, jataain acaauru cairichaeranuneein aihuruha nii coroatajai Cana Coaunera ere beebejeeurera rautaaurenihane jana, inae atinanohineeuruhane jaun.

11Nete coaiteen nichata janohin cataaun uujue bana acaauru ichatiha Cana Coaunerana jaaun ichanaain nimichucuruhane coaraain jataain casihure satiin nii acaauru coaaraauru cachaauru. 12Nii catiaaeriinte, dedeeu mijiaaineein toniha erenaa jana, “Chajaauchete ini”, naain toniha nii erenaane aonacure nii coroatajai Cana Coaunera ere beebejeeurera. Niritoha nii erenaane aonaainte nii acaauru que nejeratenacaauru notaracaae dede sacari aina cuhin dedeeu iniha cuure. 13Nii rijieeoritiinte uha carora tabaine jaun comoe nii nese neleru lechooncani nenacaauru lorerichurune jana, oorureein caainsi oaraancani cachaauru. Nii jana acaauru caute- ecu nedanacaauru cachaaurute nesoone caaun Cana Coaunera coroaecurureein.

14Nitohaneeinte situe nii necairichanaa tabai coroataja. Nete nii baiha coaiteen ureein necairichanaa nichatajanu.

Toroonfeta totiha anjera necaainsinene

15Nii baiha, toroonfeta totiha nii anjeraauru caainsinene janate, mijiaaineein dede que toniin:

“Caa chauratanete

Cana Coaunera aina rai Calaohi Jesocurisito raineein nihane jaun,

acaauruacha satonoreein tiaain caa chauratane Curuaanaaneein neroranereein”,

naaure. 16Nii jana, nii coroata choonca jenaain rai rori ichoae Cana Coaunera acatiha neein laurujualaurujuanacaauru ichauhenaaurute neseeonriaain atane que tiaain nenoracaain:

17“Ii, nunuhe caje coaauneein satono que tiaain

itolere Coauneraneein

itolere ichana naineraneein neeine

coroaecaanura Cana Coaunera.

Iite ichaohin itolere janonaa bana neein

itolere que laraajiin chabana satonoelanaala

Curuaanaaneein neeine

nunuheteein inae.

18Ii ainate niqui obaaecure

caa chauratane que nenacaauru ii coitucuhichuru.

Nete inae turue acaauru cairichaaine jaan cojoanonaa.

Inae turuha onacaauru rucuhequine jaan cojoanonaa.

Ii letonocuru ii ere beebejeein amuhemuhenacaauru profetacurete

coroatajaniha curiquiin;

acaauru ii cachaneein ii jereeine rijijieein neeuruhane jaun.

Inae ii sacuurera coroatajaniha curiquiin,

itolere canaanaihuru, ichauhenaauru, naaonjoaain.

Nitohaneeite

itolere caa chauratane que nenacaauru itajeraneein nenaa itajeriquiin”,

naain Cana Coaunera coasitaaure.

19Nii janate, nejoracae dedeeu Cana Coaunera coroaecuruhane jaan coloheri Teenforone jana ecu inanacaain ne Cana Coaunera rai rauhi curu camela. Nii janate dede caje ecocoe jiacanocuru, tonijiainunri, araracuru, caroracuru, jelajinaa jaberocooru, naaonjoainuri.

Currently Selected:

Afocarifisi 11: URA

Highlight

Copy

Compare