Filemoon Rai 1

Acaauru coaaucane biha Faborone

1Canune Faboroneein Jesocurisito coreniha caresero cuhane neein cana nejera Timoteeo aina, ii canacaanu amihaneeo que canacaanu coroatajaneraneein neeine rai, caa quiricha laenaain letoaacaanura Filemoon. 2Chaaen Jesocurisito ranojoineein iclesianeein nenacaauru ii loreri asaae ii aina netaojianacaauru, chaaen canacaanu amihaneeo que canacaanu coroatajaneraneein nenacaauru cana nejera ene neein nenaa Apia aina Arquipo, naaonjoainuri rai netonaine caa laenaain letoacaanu. 3Cana Inaca Cana Coaunera, rai Calaohi Jesocurisito, naaonjoainuri jeelai amuritoeriin inara coroatajanecurumiinte raotojoeein neeiche.

Coichana aina cutaain belaina inaain esenetaain niha Filemoonne

4Cana Coaunera bajaanune naineeine, itolere bana ii coacuhin Cana Coaunera coroajeein, 5Cana Curuaanaa Jesocurisito belaain jataain esenetaaine rijijieein satiin Cana Coaunera cachaneein nenacaauru belaaine beeuruhane jaun. 6Nii jaunne ii canacaanu rijijieein acaacha esenetaain neeine jaun, jataain canacaanu rai caohacha icharaneein, canacaanu coroatajaneraneein niha Jesocurisitone coitucuhin neeine coina, Cana Coaunera bajaaun ii rai. 7Jataain jeelai amuritoheriin corajeein rachoojoeeun casuujua cuhane. Jataainte caohacha ichaai canejera, Jesocurisito esenetaeraneein nenacaauru belaain, acaauru suujua nunaaine jaun.

Atiin canu coreniha ii letono Onesimo raau.

8Canu Jesocurisito rai afosoto nichaaunne jaunte niqui ne canu rai rauhi, iicha chanenu ichaaine coina ii letohanune coina. 9Nena raujiaain nii canaacha belaaineein canaacha esenetai coreniha ichei aitoreeunni. Canune Faboroneein- inae biinaaneein- Jesocurisito coreniha caresero cuhane netiin ichei aitoon, 10cau cajiniichaain caresero cuhane neein, Jesocurisito coreniha cacalabi rijijieein nenaa Onesimo belaaine coina.

11Jauriaalute niqui ichei chaque nelatelanaala, ii letononeein nelu Onesimo. Nete laen inae ena jiniiquiin cana rai jataain nelateineein ne. 12Inae nacoauneein jelaiha ii rene cauhane coina letoaanu. Atiin canu coaraaine rijijieein nii coaraain neeu. 13Cana Coaunera ere beebejihanune coreniha, cau caresero cuhane nihanune jaunne, ineein nenaa rijijieein canuhacha latei icharaneein nihane coina, cau canu aina nihane jereeun niqui. 14Nena jereneeine coataa aihane jereneeun. Nabana canu ii caje bajaanune jaauncha jereeine coataa, ii suujua caje coaauneein jereeine jerichaaunne jaun. 15Jerihane ena chabana satonoelanaala ii aina nihane coinate, ii caje amuhin nelu nii ii letono Onesimo. Nete inae naineneei ii letono siriine rijijieein siriine. 16Raujiaain ii letono siriine amuritoheriin, ii nejeraneein teein belaain coaraau. Jataain belaain coaraaun canu. Nete nii amuritoheriin joaenreein cacha rijijieein coaraelanaala, Cana Curuaanaa Jesocurisito coreniha, ii nejeraneein teein coaraaine caohachae.

17Aihane jaun canaacha esenetai coreniha ii nejeraneein canu coaraain neeine, nii canu coaraain neeine rijijieein acaaentonai coaraain raau. 18Ichei chatohaneein baaso ichaain, ichei rebequiin, naaonjoaain nihalune canu cobaraau coreniha. 19Canune Faboroneein ichei aitiin caraajenihane caa laenaaun. Nii ichei aitocoaaunne rijijieeina, canu ichei coretereeuni. Nainichaaun niqui canu que ijiabereeo coreniha rebeeoquine coaaucaaune. 20Aihara canejera. Cojurihu Jesocurisito cachaneein nenaa tocohaneein caa ichei bajaanune rijijieein atiin ichaain, Jesocurisito coreniha canejeraneeine jaun canu suujua nunaau. 21Canuhacha bajai amuritoheriin ichariquiin quere tonoraaine esenetaanune jaunne caa ichei aitiin laenaaun. 22Nii choae tacaainechu turuhanune jaanu rucuhequine jereeun, caresero cuhane nihanune jaun, cacoreniha bajaaebajaaequichene tonoraain, inara coaraa uhanune jererichaain Cana Coaunerane cohajihanune jaun.

Ii coaaucuruha raotojoeein neeu.

23Jesocurisito coreniha caresero cuhane canu aina nenaa Efaforasite ii coacue. 24Chaaen Maroco, Arisitaroco, Demasi, Locasi, naaonjoainuri canu coroatajaneraneein nenacaaurute ii coaaucure.

25Cana Curuaanaa Jesocurisito jeelai amuritoheriin inara coroatajanemiin.

Currently Selected:

Filemoon Rai 1: URA

Highlight

Compare

Copy