Saantiaaocha Letoai 1

Jesocurisito esenetaerauru rai Saantiaao letono quiricha

1Canune Saantiaao neeun Cana Coaunera ere tonoraera neein, calaohi Jesocurisito naaojoain ere tonoraeraneeinne neeun. Nii Cana Coaunera Calaohi Jesocurisito ere esenetaain nenacaauru, caa cana rai chauratane sacutaain riaaneein nenacaauru raina, caa quiricha letoaaun.

2Aonacuche satiin Cana Coaunera Calaohi coreniha canejeraauru. Chatohaneein nihanatiin inara tera nihane chaque tonajelanaala raotojoeein rachoojoeein neeuche. 3-4Cana Coaunera esenetaaichene coreniha itolereque coujunojoinequichene coitucuhin, nelararajiaain itolere necairichanaa abaantaain neeuche. Nitohanihane banate itolere necairichanaa nihanatiin abaantana naineriquicheein aina iiquichene. Nii banate esinae rauhijiriin Cana Coaunera jerenohi ichana naineriquicheein. Aihute coujuriu Jesocurisito ere tonoraera neein nenaa tocohaneein neeiche rauhijiriin.

5Inaraacha chanenu coitucuheneeichene, Cana Coaunera caje bajaauchete inara coroatajanemiin. Acate inara rai coitucuhichene jaanu tereein, Cana Coaunerate canaacha latei tera ne chaque tonajelanaala. 6Cana Coaunera bajaaichene, esinae rauhijiriin esenetaain necoatoelanaala bajaauche. Necoatiin Cana Coaunera bajaerate, esinae rauhijiriin Jesocurisito ere tonorana nainene, cajihaneein suujua letono sacuhane. 7Nitohaneein neeichene, inara coroatajanena nainerihei Cana Coaunera esenetaeneeichene, 8leinjiincha que suujua cuaain nenaa naine niha nitohaneein nenacaauru cachaaurune jaun.

9Cairicheineein neeichene jana, inara raa Cana Coaunerana jaun, raotojoeein rachoojoeein neeuche. 10-11Cana Coaunera coitucuhin esenetaera coriquihona neein nihane, coriqui que naanejiaane niha natiin raotojoeein rachoojoeein neeine, Cana Coauneraacha tenojoin amuritoheriin jataain nelatena naineniha coriquine coitucuhin. Cana rai Cana Coauneraacha tei ichaonaa laen, chaaelai janonaa bana nitajenaa nainihei. Nii coitucuhin raotojoeein rachoojoeein neeine.

Chabana nitajenaachara ichaonaa terichaain Cana Coaunerane

12Nerausiaaequiche esinae necairichanaa abaantaain Cana Coaunera coitucuhin, esenetaain, jereein, nere tonoraain neeichenete, chabana nitajenaa charaneein nenaa ichaonaa caohacha esine tereein inara rai Cana Coaunera, belaain nere tonoraeraauru rai nitohaneein tihane coina aitiin nihalune jaun.

13Chunei chatohanei baaso ichana coacuhin nihane, coa “Cana Coaunerate jere caa baaso coaucaaunne coina”, naain iriha. Coatiha joaereein cacha rijijieein chabaaso coacuhin nihei Cana Coaunera. 14Nii cana raajenihane canaacha coacuite, ecocoe cana suujua caje baasoneein. Aihana jaun baasoneein sacuichene coataa, caohachaain coaracuche. 15Baasohacha coacuhin nenaate, nechu jataain caohacha nainejeein nitajiha cureein. Coatiha Cana Coaunera jerihane jaun, nii baaso neein ichaoheeiche. Niheichu nii nitajiha chuneine jerihei Cana Coaunera.

16Coa inara raajenihane nohanihache canejeraauru. 17Coatiha Cana Coaunera caje uhi chabaaso. Coatiha chaaelai janonaa bana suujua lonaain Cana Coaunera. Leinjiin acaachate aca neein ne. Itolere neeincha caohacha nejesinaachate uhe Cana Coaunera caje. Acate itolere rai cono neein ne. Aca techu enoto, atene, arasijie, naaojoaihunri coaaunaelu dedeeu. Chabana coreenrai Cana Coaunera. 18Nii jaunte nere berate cana rai, aonaain, coitucuhin, esenetaain tonoraacachene coina. Nii jaunte, nere esenetaain tonoraacachene jaun, ichaonaa esine te cana rai, raotojoeein Cana Coaunera nihane coroajeeun niicha jerei ichacaachene coina.

19Nii coreniha canejeraauru, caohachaain rauhijiriin esinae Cana Coaunera ere aonaain, Cana Coaunera ere tonoraauche, chaenchu erenacaaotelanaala, chaenchu joaereein coreniha obaje lanaala, naaonjoaain. 20Joaereein coreniha obajei cacha, nihei Cana Coauneraacha jerenohi ichaai. 21Aihana jaun itolere baaso nejesina inaraacha sacui jianecuche. Nii Cana Coaunera ere, inara suujua cuhane inaraacha rucujuei Cana Coaunera ere tonoraauche, caohachaain inara suujua coaraain. Acate osa caje jianacoon inara suujue mitareein.

22Cana Coaunera ere coitucuhin neeichene jaun, tonoraain Cana Coaunera jerenohicha sacuuche. Aineeichene nelatihei raujiaain aonaquichene. Niite nechu jataain inara raajenihane necoritariquicheein. 23Cha teeinti Cana Coaunera ere beebejiha beebejerane aonaa natiin tonoraene. 24Niite enaacha Cana Coaunera ere baitereein. 25Cha teeinti aitoha Cana Coaunera erene baitelanaala rauhijiriin tonoraain ne, niite raotojoeein nereein. Cana Coaunera ere tonoraacachenete nainichaache caohachaain ichaohacachene. Niicha jerenohicha ichacaachenete caohachae. Nii jaun Cana Coaunera ere tonoraain naitoonjoan ichajeein sacuhacachenete caohachae, cana aina niha caohachaain Cana Coaunerane raotojoeein ichaohacachene coina.

26“Aitoha Cana Coaunerane rijijieeine caohachaain rauhijiriin neeun”, naa natiin joaenreein baaso neein leeocha cacha que irihanete raajenihane necoritae. 27Cha lateein neeuruha ujuatejeeurune coroatajaneein, cha lateein niha autanaaurune coroatajaneein nihacanete, esinae rauhijiriin aitoha Cana Coaunerane rijijieein nerichaacheein. Nainihei Cana Coaunera Calaohi Jesocurisito coitucuuruhi rijijieein nihacachene.

Currently Selected:

Saantiaaocha Letoai 1: URA

Highlight

Copy

Compare