Ebereeocuru Rai 2

Cana ichoterateraneein nenaa que jaoleconaa nainihaacache.

1Nitohanihane jaun, nere beracuru que Cana Coauneraacha beratei aonaain tonoraain esenetaain nihacachenete caohachae. Jana nii cana rai niicha beratenojoi aonaain caohatiin coitucunaa saijieein tonoraenihacachenete, aihuruha coitucuelanaala nenacaaurune rijijieein nitajerichaacheein. 2Coaracuche nachuhinti, nii rai letonocuru anjeraauru que niicha teratei niha nii rai jauriaanejeein nenaa rauhine saijieein tonoraelanaala naosatenacaauru cachaauru- esinae rauhijiriin baaso ichacuruhane coreniha caseteco coaracuruhalune. 3Nitohanihane jaun, caseteco caje nichotenaa nainerichaacheein, nii jauriaanejeein nenaa amuritoheriin, cana ichoteraneein nenaa esenetaenihacachene. Esenetaain nihacachene coinate, jauriaanejeein raaje nihane cana rai beein nelu Cana Curuaanaa Jesocurisito. Nii baihate cana rai beeurelu aina amuhemujueein nota que coaaraauru. 4Nii ichoae tacaain techu, cana que coitucuerate Cana Coaunera itolere cojoelanaacojoaihuru ichaain. Chaaen techu Aca jerihane rijijieein, le cacha nichaachene rai niicha tei Suujue aina cuaain cana que coitucuerate.

Cana nejera rijijieein niha Jesocurisitone

5Coatiha rai letonocuru anjeraauru, nii cabaiha neenihu rai Cojoanonaa caa ereereecaachene jaan coaaraneein neeuruhane coina aitohi Cana Coaunera. 6Nitohanenihane quete:

“Chaneein ne cacha.

Chatohanaineeina nenaane cacha.

Chanuna acaacha coacuhin,

jataain queecha coaauqui.

7Jauriaanejeeinte niqui

ii letonocuru anjeraauru

cocoainaain fautaain cocoainaailu.

Nete nii baiha laen,

jataain leeochaauru amurijiriin cocoainaain,

que itolere Curuaanaa nihane comai lauriaain,

8satiin nere tonoraain

neeuruhane coina ichaain,

tijia asaae que nejeratenacaauru

teeilu”,

naain ne laenanohineein Cana Coaunera Quiricha cuhane. Nitohaneein satiin nere tonoraain nihacachene coina, cocoainaain rai tijia asaae que nejeratenacaauru tihane coina, aitohane saijieein jaiti nitohaneein ichaa Cana Coaunerane coarahaacache. 9Nete laen, inae anjeraauru fautaain nelatihei rijijieein turuhin nihalu carajaaojoaain Jesocurisitone coaracaache. Nitohaneein turuhinte, rai chaneein nenihacachene saijieein, jataain cana belaitohane jaun, cana coreniha ohane coina ichaelu Cana Coaunera. Nii cana coreniha cairichanojoineein ohalune corenihate, itolere curuaanaacuru Curuaanaa neein nihane coujunacaneein necaohachaa Cana Coaunerane que comaitenojoineein ne.

10Satiin itolerete Cana Coaunera raineein ne, niicha coaaunanojoineein niha itolerene jaun. Nii jaunte niicha coaaunanojoineein rai calaohi neein nihacachene jaun, rai Cojoanonaa caa baiha neeni que nihacachene jere Cana Coaunera. Nii jaunte cana coreniha necairichaa Jesocurisitone aina cuaain, nii aansijiiniji osa colane teelu, satiin niicha coaaunanojoinunru ichoteraneein nihane coina. 11Nitohanihane jaunte, ita Inaca que Inacaain nihacache, nii cana osa caje cana ichoteratera aina jiniiquiin. Nii jaunte, rai nejera neein inae nihacachene jaun coejelanaala: “Canejeraauru”, nae cana rai Cana Coaunera Calaohi. 12Niritorichaaine quete:

“Canejeraauru raine

Ineein neeine beebejeein,

netaojiaain

Ii coroaeraauru cataaun

nenatereeunni”,

naalune, laenananohineein nelu Cana Coaunera Quiricha cuhane.

13Chaaen techu:

“Leinjiin Acaachane

niicha ichai ichaane coina

cohajereeunni”,

naain.

“Cauna neeun,

canu rai Cana Coaunera

tenojoihunru cacalabihuru

ainara”,

naain ne laenanohineein.

14Charijieein teeinti, ita araaineein niha cachane, ita iniho que inihoquiin, ita coichana que coichanaain, naaonjoain cacha, nii rijijieeinte cacha iniho que inihoquiin cacha coichana que coichanaain naaonjoaelu Jesocurisito, caa chauratane que ohin, nii cacha itajeraneein nenaa moconajaaera amuritohane coina. 15Nitohaneein moconajaaera amuritiinte, ohin nitajeeururichaaine que satiin casiiriin ichaonacaauru- cachaauru ichoteratelu. 16Aihane jaun, coatiha anjeraauru coroatajanihane coina turuhin niheilu, Abaraaun nefoerateneein nenacaauru coroatajanihane coinate turuhin nelu. 17Nitohanihane coinate, jerichanejeein cana nejeraneein, nihacachene rijijieein tenojoineein nelu, Cana Coaunera notaracaae coujuriu cana rai saseredotecuru curuaanaacuru Curuaanaaneein, cairichaaojoaain cana coaraain, cana coreniha cairichei coaraain ohane, satiin cachaauru osa que suujua acatena nainiha Cana Coaunerane coina. 18Nitohaneein raajenihane necairichanaa coaraain, cojunojoineein nihalune jaunte, rijijieein necairichanaa coaraain, cojunojoineein niha cachane coaraane, coroatajaneein naaonjoain.

Currently Selected:

Ebereeocuru Rai 2: URA

Highlight

Copy

Compare