Ichanohichuru 28

Malata cobena neraa Faborone

1Satiin, obene que neraaine, Malataneein curuaaca nii obenene coitucuhacaanu. 2Jelai cocoaichacuru cachaaurute, jataain caohacha nejeeuruhana jaun, saain canacaanu belaihure. Nii janate, uheuheca elone jaun, jelarotohane jaun, enuha codoriaain mocohin, iihane jana, canacaanu cotihacure, nichaatihacaanune coina. 3Nii janate, enuha cohi taojiaain raane jaun, usi jana tihajiha Faborone jana, iihaniha usine jaun, najaano caaun sorohalaain, Faboro biji que tijileneein calae acano. 4Nii Faboro biji que tijileneein calaa acanone coaraainte: “Jerihanete, soserena necaiha caa cachara. Cucuana cuhane naluhin, onaa caje nichotihane jaunte, ichaohane jerene, dedeeu nenaa nii rucuherara”, naaure Faboro coarajeein, nii cuu nenacaauru cachaauru.

5Nii janate, nii usi iihani cataaun, nii acano chatachataain siheitiin, cuu tonajelanaala nee Faboro. 6Nii jaunte, satiin, “Laraarichaain jecha”, naain cuu, laraacane coarajeeure. Nii janate, laracaene. “Luhecotariin jecha cora aonaain, tocojoaain tacaain oreein”, naainte niqui, cuu, carajaain coarajeeuruhane jana, tonajeerinihane jaun, suujua elonaain:

“Leeinjiin chosi necaihara”, naaure Faboro que.

7Nii nihacaanune jaan rohante ne nii obene que nenacaauru coaara Fobirio neein curuajai cacha rai atane. Nii Fobiriote, canacaanu belaain, canacaanu rae, rai loreri asaae. Nii jaunne, cuu aina nihacaanu nichata janohin. 8Nii janate, ajaa que jeraain ujuee caaun cunaitein ecu niha nii Fobirio inacane jaun, rene turuha cue Faboro. Rene turuhinte, coaraain nichoae Cana Coaunera bajaane baiha, nichoae biji merecaain, dadaain aonaane rijieeoritiin inae nerautae. 9Nii coitucuhinte, satiin uure nii obene que nenacaauru leeochaauru cunaitenacaauru. Nii jaunte, rautanaaca Faborone jaun, nerautaacoaain caaure. 10Nii jaunte, satiin canacaanu belaihuruhane jaun, jelai caje amuhacaanune coina, bote cuhane fauhacaanune rai, cuujueein canacaanuhacha quiinenu que canacaanu achanojoaaure, itolere amunaa rai nelatecuri teein.

Romau turuha Faborone

11Nitohaneein, cuu nichata ateein nii obeneu nihacaanune baihane, leinjiin bote Alejaandiria caje unaa cuu cujuana aina jelaronaa bitoaa nenaa bote cuhane fauhin, cuhacaanu. Nii botete, coujunacanu que nihane coina, fafione neein, acaauru chosichurune que Curiecocuruhacha tei Castaro, Polosi, naain curuajaihuru ecaantooru coujunaca amaerane, bote macohiniha teein. 12Nitohaneein cuhine, turuha cuhacaanu, Siracosa cofauhanau. Cuuna nihacaanu nichata janohin. 13Nii cajena, nesaruhin cuujihacaanu, cucuana auhaniha, rauhijiriin Rejioo turuhacaanune coina. Nii cojoanoote, cuujihacaanune jana, canacaanu cunaja bote roe caje uhe, raujiaain jouhaquiin cujuana. Nii cojoanoo cojoanoonne, turuhacaanu Poteeolihu. 14Cuuna, Jesocurisito coreniha cana nejeraauru tabaauru ruhacuhacaanu. Acaaurute, canacaanu cotijiaain, cuu canacaanu chunaaure, le semanaain acaauru aina nihacaanune coina. Nirijieein inacuhe inacujueein cuujueeine, tabiicha turuujihacaanu Romau. 15Nitohaneein cuhin, atane ichoae inacuhe inacujueein cuujihacaanune coitucuuruha nii Romau nenacaauru Jesocurisito coreniha cana nejeraaurune jaunte, canacaanu que tacaa uure, Apio rai Foro neseu tiaain. Nii jana, leochaaurute, Nichatajai Taberenaneein acaauruacha curuaatei neseu canacaanu cohacure. Nii cuu neeuruhane coaraainte, coroajeein, Cana Coaunera bajae Faboro. Nii ainate, raotojoeein suujua aonae Faboro. 16Nii jana, Romau turuhacaanune janate, jelai loreri asae teein, nirijieein caseteconeein, jianacoon teein, leinjiin soondaro que beraichaain, Faboro sirichuruhane coina jerecure.

Romau niha Faborone

17Nitohaneein, nichata janojoeein turu baiha neeoriinte, nii Romau nenacaauru naraaichuru Jorioocuru rai nelateein nenacaauru jitariin cotiharate Faboro, acaauru rai irihane coina. Inae satiin turuhacoaain, netaojiaauruhane janate, acaauru rai:

“Caraaichuru, chaelai janonaa bana cana Jorionichaachene que baasoneein irihaaunta. Niheichu, chaelai janonaa bana, cana inoaesihuru ichao coacuhin baaso neein irihaaunta. Nii atiinte, Jerosaleeun cacolurujueein, baaso ichara nihane rucuheraanu que Romanocuruhacha cocoainanohi rai canu teeure Joriocurura. 18Nii janate, jitariin caohachanainejeein, cacaje bajaauruhane baiha, caihanenaa jerecure, neniha casohin cajaaoruhane jaan leranune jaun niquicha. 19Nena, onaa caje nichotihanune jerecureniha nii cacoluruheraauru Jorioocurune jaun, canu rucuheca satiin curuaanaa neein nenaa eenferadorone coina bajaaun, nii neniha caraaichuru colurujihanune jaan lerane saijieeincha. 20Nitohanihane jaunna, inara jitariin cotiharateeun, inara coaraain, inara rai irihanune coitucuhichene coinara. Cana Isaraelita nichaachene, canaacha cohajei esenetaanune corenihane, cau caa cadena que coositenojoineein neeunra”, naa acaauru rai Faborone janate:

21“Coatiha chaelai quirichanejeein letoaauruhi Jodea caje canacaanu rai, ii que, ‘Acate, naaonjoaain que situhin nera’. Nii jaunna, ii benaa coitucuhenihacaanura. Niheichu, ucuajai caje turunacaauru cana araaichuru Jorioocuru nihanatiin, ‘Acate, baaso ichaaechajeein ne jetaora’, naain, ii que ereeuruhita. 22Nena laen, nii le laurijieein enanenaa Jorioocuru ichao beeine jerichaanura. Tonaain ii, nii queta. Itolere sacutaain, baasoneein nii que ereeuruhane coitucuhacaanune jaunna, ii, coitucuhine jaun, nii beeine aohana jerichaacaanura”, naaure Romau nenacaauru Jorioocuru, Faboro rai.

23Niritiinte, “Naaonjoaain cojoanonaa banana, turuha urichaanuhin, nii que ereei canacaanu raine, coitucuhacaanune coinara”, naaure. Nii jaunte, nii aitocuruhane cojoanonaa bana, netaojiaaure arajiin cachaauru, nii niha Faborone jaan loreri asae. Nii jaunte, janone caje coaauneein, acaauru rai ereereje Faboro, Cana Coaunera Cojoanonaa que, sonafaajeein. Nitohaneeinte, Moisesa aitoonjoa quene maajeein, chaaen Cana Coaunera ere bera inoaesihuru profetacuruaacha laenai, naaonjoainunru aina cuaain, acaauruacha cohajei Mesihasineein niha Jesosone esenetaauruhane coina, acaauru que jererateein, acaauru rai beebeje. 24Nii ainate, tabaauru, nii aitoha Faborone esenetaain tonoraaure. Jana, leochaaurute, esenetana jerecurene. 25Nitohaneeinte, ita suujua rijitojoenaa jerelanaala, mituhajeein caunaa nunuheteeuruhane jaunte, acaauru rai:

“Esinaete, rauhijiriin nitohaneeichene coitucuhin, inara foerateeurera rai biha nere bera inoaesi Isaihasine coina, berateein:

26‘Caritiin benihu,

taa cachaauru rai:

Aonaquichene nihanatiin,

caohachaain aonaain,

coitucunaa naineriheeicheeinta.

27Chaaen,

nii coaraquichene nihanatiin,

coarana jereriheeicheein’,

naain berateein:

‘Banejelanaala nauhacaa

acaauru suujuane jaunte,

raajenihane aohana jerecurene,

acaauru rai beraane nihanatiincha.

Niheichu,

acaauru notaracaae nihanatiin,

coaana jerecuruhita.

Nii jaunte,

coitucunaa nainecurenera,

nabana nesoone caaun,

canu rene necohaleeuruhane,

acaauru rautaain nihanune coataara’,

naain rai nere bera inoaesi Isaihasi que beratelu jetao, Cana Coaunera Suujuera.

28Aonacuche. Caa acaihanejein Cana Coaunera tenojoin jianacoon cana mitaeranu esenetana jerelanaala, aohana jereneeichene jaun, ena caje coaauneein, Jorioniheichuru rai beebejiha cureeunicha. Acaaurute laen, aonaain esenetaain, tonoraa cuurureeincha”, naa Faborone jaunte, 29nejesinajeein, mainajeein ita cotaain cauha cuure Jorioocuru.

30Nitohaneeinte, cuu itolereneein, coroata jaanacaain neelu Faboro, asae nihane coreniha coretejeein, niicha sirii loreri asae. Nii jaunte, rene turuha cunacaaurunihane, cuu ranajaque. 31Nitohaneeinte, cuu tonajelanaala, Cana Coaunera Cojoanonaa beebejeein, Cana Curuaanaa Jesocurisito quene maajeein ereerejenajaque, nii chunei rerohecaera colane.

Currently Selected:

Ichanohichuru 28: URA

Highlight

Compare

Copy