Ichanohichuru 27

Romau, Faboro letoaauruhane

1Inae Italiau canacaanu letoanaa jerecuruhana jaunte, casetecocuru coaraain raeraanu que le laurii soondarooru Enferadoro raineein curuajaihuru rai cafitaan Jorioo neein curuajai rai, leeochaauru caseteconeein nenacaauru teeuruhane jiniichaain, rai Faboro netonai teeure. 2Nii jaunna, Andaramitio cofauhanau caje cucuana cuhane cuhin coriae nenaa Asia batane que nenacaauru neseeuru cofauhanau tiaain cunaa bote cuhane fauhin, nesaru rai nihana jaun, cuhane fauhin cuhacaanu. Nii janate, ecu neein, canacaanu corihaniha uhe Masedonia batane que nenaa Tesaloneca cocoaicha Arisitaroco. 3Nii cojoanoo, Sidoon cofauhanau turuhin, cuu najaurihacaanune janate, jataain Faboro belai, nii soondarooru curuaanaa Jorioo. Caseteconeein cuha Faboro natiinte, bote caje iniin, belaichaauru rene bedaeniha Faborone coarajeein, cuu rai niicha latei teeuruhane coaraje, belaiha cafitaan Jorioo. 4Nii Sidoon caje nesaruhine, canacaanu que tacaain uha cujuanane jaun, nii cujuana que acateraain, Chifere cobene jeloon cuujihacaanu. 5Nitohaneein cuhine, cucuana jera jaoha cuhacaanu, Silisia batane auha jeloon. Inae cucuana jera jaohine, Silisia, Paanfilia, naaonjoainuri batane auhaniha situhin cuhin, Lisia batane que nenaa neseu Mira turuhacaanu.

6Cuute, Alejaandiria caje unaa leinjiin bote Italiau cuujenaa erue, nii soondarooru curuaanaa cafitaan. Nii cuhanete, canacaanu fauherate, cuhane cuhacaanune coina. 7Nitohaneeine, araai janohin, jataain jeraaen cuujihacaanu. Nii jaunna, necairichajeein turuhacaanu Nidoneein niicha curuaateeuri jeraniha. Nii jana, jaiti canacaanu que tacaain uha cujuanane jaunna, Cureta cobena nichaae nitionohin, Salomoonneein acaauruacha curuaatei cobene jeraniha situha cuhacaanu. 8Nitohaneeina, necairichajeein cuhin, Cureta auhanihacha rauhijiriin cuujueein, Laseaneein curuajai nese rohan nenaa Caohatiin Cofauhanaineein curuajaihu turuhacaanu.

9Inae carajaa cuhacaanune jaunte, nii tonohana inae cujuana aina jelarona que turuelalajihane jaun, luhante cucuana cuhane amunaa, banejeniha cujuanane jaun. Nii jaunte, acaauru rai:

10“Aonacuchena caa que erete, aonaquiche. Jataain banejelanaala, cana rai elunaa curichaain, caa amunaane coitucuun. Bana cauhacha nelanaalate, aihacache. Saainte, nii iicha amai rucuhele aina jiniiquiin nitajiha cureein, caa botera. Cana niha natiinte, onaa nainichaachera”, naain niqui suujuatenajae Faboro.

11Nete, nii bote erora, nii bote curuaanaa cafitaan, naaonjoainunru, ereecha tonorae, nii soondarooru curuaanaa cafitaan, Faboro ere tonoraelanaala. 12Nii jaunte, caohachaojoaeniha saneein, nii neeuruhane jaan cofauhanane jaun, cuu neein cujuana aina jelarona bitoanaa jerecurene. Nii jaunte, satiin lalajeein, leeocha fauhane nii jeelai Cureta cobena que nenaa Fenisiau cunaa jerecure, cuu cujuana aina jelarona bitoaauruhane coina. Jelaite, enoto soo jeloon neein, cana raoto nichajai que, cana ajaabiji nichajai que naaonjoaain inanacae.

Cucuana cuhane niha cujuana tabaine

13Nitohaneeinte, “Tonaje lanaala jecha cuujuerichaanuhin”, naain nesaruhin cuhacaanu, enoto soo jeloon neein ajaabiji nichajai caje uha raujiaain aasaaeriin jouhaquiin cujuanane jaun. Nitohaneein cuhine, Cureta auhaniha cuujihacaanu niqui. 14Nete, nii baiha neeoriin, enoto soo nichaae cuujueein cana raotono nichajai que, enoto mitu dararo caje uhe jataain mijiaainetiin cujuana. Niite, bote que tacaain, richorocoae. 15Nitohaneeinte, richoracaain, cunaa jerichaanune jaan nedacai que, bote cuae nii cujuana, que tacaain macohi auriteein, acatena nainenihacaanune jaun. Nii jaunna, cuu canacaanu amanaa jerihane jaan jeloon, canacaanu amaane coarajihacaanu. 16Nitohaneein cuhine, leinjiin obena laaojoiri Caaodaneein curuajai rohan situha cuhacaanu. Ucuajai que saneein mijiaainetiin tacaeniha cujuanane jaunna, jataain necairichaaoriin, tijichaain canacaanuhacha amai naluha botene nichoteeuruhane jaan bote laaojoiri inacaanu. 17Nitohaneein mucuhin tararaain inaacaanune baihate, cuu, inori que, nii cuhacaanune jaan bote ichohacure, nunaane coina. Nitohaneeinte, carene araraca Sireteneein curuajai que tacanaa coasichuruhane jaun, cujuana aina amuuruhane jaan bela serichure, ocoai nichaae cuaain, cujuana ainaacha cuujueeuruhane coina. 18Nii cojoanoo, jaiti mijiaainetiin uha cujuanane jaunte, cucuana cuhane, nii bote coneracuru jaonaa nunuheteeure. 19Nitohaneeinte, nesarucuaanune nichata jano cuhane, bela nujuaauru tabaauru, chaaen itolere nii nichotihacaanune que nelatelanaala nenacaaurune maajeein jaaore. 20Nitohaneeine, araai janohin enoto coaarilanaala, nii arasijie nihanatiin coaarinihacaanu. Nechu jataain nirijieein nesurucorihei rijijieein, bote nalaaene amuneein sacuha fichafichanaane jaunne, “Inae jecha ecu ohacaanune nitajerichaanuhin”, naacaanu niqui.

21Nitohaneein, araai janohin lenonelanaala nihacaanune jaunte, satiin canacaanu cataaun nichaauraain:

“Coaracuche cachaaurute, quere tonoraelanaala, cuhacha nenaa nichae, Cureta caje cana uhaichelu. Colane chachu, cuu raotojoeein nihacache. Colane, catohanei baaso que siturihaacache. Nii colane, chaaelai que siturihaacache. 22Nijiaonriha joaereein, inara suujua cuaaichene. Coatiha leinjiinejeein orihaain chunei cacha. Caa botete laaen, nitajiha cureein. 23Enene cojoanotiinte, canu rene, rai cacha neein letononeein nihanune rai, letono anjera letoae Cana Coaunera. 24Canu acatiha ecocohinte: ‘Coa casihara, Faboro. Atiinte, Romanocuru curuaanaa enferadoro acatiha tururiquiincha. Ii corenihate, atiin onaa caje nichotiha cuurureein saain nii ii aina bote cuhane nenacaaurura’, nae carai Cana Coaunera letono anjera. 25Aihane jaun, cha que tonajelanaala, joaenreein inara suujua cuaelanaala, caa caitoonjoan esenetaachacuche. Nii aitoha Cana Coaunera letono anjerane tocohanihate cureein. Esinaete rauhijiriin aite. Canune, esinae rauhijirin aitohane coitucuhin esenetaaun. 26Nete laen, leinjiin obena que tacaain baulenetoha caa botene jana, cuu nerichaacheeincha”, naain bee Faboro.

27Inae coroata semanaa nesarucuaanunena janate, Ariaticoneein curuajai cucuana cuhane cuujihacaanu, janotiin. Nii janate, dede catai rijiu, cuu cajihaneein bote amaa cujuanane jana, inae cucuana auhaniha nichuuntaacaanune que nainacure bote beraihurera marinerooru. 28Nitohaneeinte, inae coitucuuruhane jaun, nucuaano cojunacateein coaracuruhane jana, nichatachoonca saota metorone rai nucuaano. Nii caje cuujueein, coaiteen nucuaano cojunacateein coaracuruhane janate, coroatachooncai caaunsi metorone rai nucuaano. 29Nii jaunte, ajeri que tacanaa coasiha, bote roeniha jenaain anajiin nenaa coata aancla nalaaure, cuu bote acateein, cuu mucuhane coina. Nii nalaecuruhane nainihate, Cana Coaunera bajaaebajaaecure, chajaain janohane coina. 30Nii janate, bote macohiniha anajiin nenaa coata aanclaauru nalaera rijijieein, nii naluha botene nichoteeuruhane jaan bote laaojoiri faunaa nunuheteeure nii bote beraihurera marinerooru, nii bote caje sorooruhane coina. 31Nii janate, coaarinajaain, nii soondarooru curuaanaa cafitaan rai beein, nii soondarooru raine maajeein beein:

“Berainajaeneeichenete, caa bote ratiriin sorooruha acaauruhachane, nenereein nichoteeichene jaanura”, nae Faboro.

32Nii jaunte, acaauruacha amaemajei bote laaojoiri ichora saaujihure, nii soondarooru, acauhanau naluhane coina.

33Inae janonaa raite, satiin acaauru rai, lenonecuruhane coina:

“Inae coroata semanaa, nirijieein caohachaain lenonelanaala neein, situha cujuana aina fichafichanaane cohaquichenera. 34Aihana jaun, chajaain chaelainiji que lenonecuchete, nii aina abaantaain nichotenaa nainequichene, nichoteeiche. Coatiha nitajerihaain leinjiinejeein nihanatiin chunei coturijicha”, nae Faboro.

35Niritohane baihate, satiin acatiha teein, faan teberiaain, nichoae Cana Coaunera bajaane baiha, nii faan tatuhin, beeunebeeuneein que lenone Faboro. 36Nii jaunte, lenonena coaaujeeurenihane baiha, inae satiin lenonecure. 37Itolereneeinne, coroata fasha caaunsi choonca saotaneein, nii bote cuhane nihacaanu. 38Nitohaneeine jerenihacaanune jaun tiaaojoaain, nainaain lenonichaanune baiha, nii canacaanu lenone tirico caute jaohacaanu cucuana cuhane, nesaracaa nii botene coina.

Cucuana cuhane naluha botene

39Nii janate, inae janoe. Nete, “Caaelai caara”, naain, nii atane coitucuurene nii bote beraihurera marinerooru. Nete atiin, cuu cucuana auha leororo carene siricha coaraain, cuu nii bote jauriaanaa coaaucure niqui. 40Nitohaneein, cuu jauriaanaa coacuhinte, nii bote laracaauruha acau cataaunna jaan anajiin nenaa coata aanclaauru ichora saaujiin ratirihure. Nitohaneein teeinte, bote cocoihacuru, roeneraaunu que nelateein nenaa cosi lecoaracaaure. Nii baihate, bote macohiniha nenaa bela tocoore. Nii jaunte, nii aina inae erojoeein cucuana auhaniha nichuuntae nii bote. 41Nitohaneein cuhinte, nichuuntaain carene araraca rarohaqui choae, baulenetoha cue nii bote. Nii jaunte, caohatiin baulenetoha nii bote macohi nichajaine jaun, carene rarohaco choae liquiinetiin, rurujuanacaje lanaala nedae nii bote macohi. Nii jaunte, jataain mijiaaineein tacaa fichafichanaane jaun, fichafichanaa caaun, nefejeein, nichalunihaje bote roe nichajai. 42Nii jaunte, nii caseteconeein cunacaauru sohajeein jaonaa jerecure nii casetecocuru beraihureraauru soondarooru, nabana joichohin sorooruhane coataa. 43Nete, caohate nii soondarooru curaanaa cafitaan, Faboro coreniha, nabana Faboro netonai sohin jaooruhane coataa. Nitohaneein caohateeinte, joichona inaaurera letoae ichoachaniha, acauhana naluhin cuhin, atane que cohanaacuruhane coina. 44Jana, leeochaauru, acaauru caaijie cuuruha tabara choaaene jana, tabaauru leeochaauru netonoai cuuruha nii bote nichalunenaa jerooru choaaene coina, letoanajae nii cafitaan. Nitohaneeine, satiin, leeinjiin obene que neraain, onaa caje nichotihacaanu.

Currently Selected:

Ichanohichuru 27: URA

Highlight

Compare

Copy