Timoteeo Rai Leinjiin 2
2
Bajaebajaecuchete satiin cachaauru coroatajanemiin Cana Coaunera
1Jauriaanejein Cana Coaunera bajaebajaecuchete satiin cachaauru coroatajanemiin. 2Bajaichenete, satiin curuaanaacuru, cocoainanacaihuri, naaonjoaunri suujuatiha Cana Coaunerane, raotojoeein Cana Coaunera ere tonoraain ichaaorureein cachaauru. 3Nitohaneeinte jere nii jianacoon cana mitaera Cana Coaunera. 4Acate satiin jianacoon neein, nere esine coitucuhin neein nihacachene jere. 5Jana, Jesocurisitote laen, Cana Coaunera aina caohachaain nihacachene coina, nii rucuheraanu que nenaa ne. Cana rijijieein cachaneein nihana jaunte naine. 6Inae nitohaneein letoaa Cana Coaunerana jaunte, raajenihane cana coreniha coroso que ohe Jesocurisito, coreniha osa caje jianacoon nihacachene coina.
7Nii jaunna Jorioo niheichuru relaeraannu que Cana Coauneraacha letoanojoineein neeun, rauhijiriin Jesocurisito coitucuuruhane coina. Curisito esenetaera nihanune jaunna, rauhijiriin aitoon noanenaanelanaala.
Caohachaain suujua coaraain neeuruha quichaauru aina enecurune
8Nii jaunna itolere sacutaain, Cana Coaunera bajaauruha satiin cachaaurune jereeun canu. Ita baijiaelanaala, raotiin suujua aina neein, biji michuin Cana Coaunera bajaa satiin nere tonoraeraaurune jereeun.
9Coa cajione jataain coreti que necoreteeuruha enecuru. 10Coujuriu Jesocurisito esenetaeraneein nenaa tocohaneein cacha belaihuruhine enecuru. 11Cacha relaa relaerane, inauheneeicha aonajeein nerelaauruhine enecuru. 12Coatihachu chaaen quichaauru relaauruha enecurune jerinaaun. Jiaonria quichaauru amuritiin letoaauruha enecurune, 13necoaaunaa Ebane ajiniha, Adaan coaaunaain niha Cana Coaunerana jaun. 14Cachaauru coaaunaa Cana Coaunerane bana, coatiha nii Adaan coritae Moconajaaera. Acaihanejein nii Ebaachate laen coritae. Nii jaunte osa que nesaruelu nii ene. 15Nii jaunte canaanai sirihane, inae janohane rai cuna caaun necairichanaa coaareein ene. Nete atiin jianacoon niha cuurureein ichoteratenajarichaain Cana Coaunerane esenetaain nere tonoraaurera enecuru.
Currently Selected:
Timoteeo Rai Leinjiin 2: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
