Timoteeo Rai Leinjiin 1

Jauriaa nejeein Timoteeo rai Faborohacha letoai quiricha

1Canune Jesocurisito letono Faboro neeun. Cana Coaunera corenihate jianacoon nihacache. Aihana jaun, Jesocurisitohachate cohajihacache coaiteen nacoauneein cau turuhane chabana satonoelanaala rai Cojoanonaa que nihacachene coina. Cana Coaunera, Calaohi Jesocurisito, naaonjoaainte canu cocoainaain caletoae.

2Ii raine caa quiricha laenaaunra cacalabi Timoteeo. Cacoreniha Cana Coaunera Calaohi Jesocurisito coitucuhine jaunte, cacalabi neeincha. Raotojoein neeine coina rai raotonoque ii rausiajeein ii coroatajaneeine Cana Inaca Cana Coaunera, Cana Curuaanaa Jesocurisito, naaonjoain.

Baasoneein cacha relaaurera que necoeraain niha Timoteeone coina suujuatiha Faborone

3Masedonia cuhanulune ajiniha ichei aitocoaaunlune tocohaneein nii Efesohacha neeu. Coa baaso que nii quiicha relaauri relaeranihane, coa ninauhene coarajiha. 4Coa nereretanaa inoaesi baasoque nereretanacaauru aina inara suujua cuaain nihache. Coatiha Cana Coaunera Aitoonjoan ichaain tonoraacachene coina cana letoaera nihei. Rauhijiriin relanajaau Cana Coaunera esenetaain tonoraauruha caohatiin saaine coina.

5Baaso coacuelanaala caohatiin inara suujua coaraain, esinaaen rauhijiriin Cana Coaunera esenetaain, ita belaaichene coinana caa caritiin inara rai laenaaun. 6Baaso erenaa que ita rai ereerejeein, Cana Coaunera Ere esine tonorana jianeein raaje nitajeeuruha tabaaurune jaunna aitoon. 7Nitorijihanei cachaaurute, cacha relaeraneein nenaa jerecurureein nechu jataain joaenreein.

Jeriha Acane rijijieein ichaoha cachane coinate, aitiin Naitoonjoan laenaeratelu inoaenlu Cana Coaunera

8Acaihanejein Cana Coauneraachate, rauhijiriin caohacha ichae. Baasoneein ichaoha cachane coataate niicha jerei tocohaneein aitiin laenaeratelu inoaenlu Cana Coaunera, Moisesa que. Aihana jaun, caohachaain rauhijiriin Cana Coaunera Aitoonjoan tonoraacachenete caohachae. 9Coatiha caohacha cachaauru suujuateraanu que aitiin Naitoonjoan laenaeratiheilu Cana Coaunera. Erenaa tonoraauruhi, itolere cacha amuritoheriin suujua coaraain niha nocoetocuri suujuateraanu quete aitiin Naitoonjoan laenaeratelu Cana Coaunera. Nechu aansai osaaonaauru, Cana Coaunera Ere tonoraauruhi suujuateraanu quete nitohaneein laenaeratelu Cana Coaunera. Fojiara que suujua acatieichuru, sonajaain jaorera, 10chaenchu sinijeranelanaala nenaa ene aina ichaojeracoori, ene rijijieein namute quicha aina ichaojeracoori, quicha rijijieein namute ene aina ichaojeraqui, cacha basijiauhin necoretenacaauru, casajeeuru, chaenchu “Cana Coaunera te coaraje”, naain nohanenacaauru, naaonjoainuri suujuateraanu quete niicha jerei tocohaneein aitiin Naitoonjoan laenaeratelu Cana Coaunera. Caohati cacha relanaanajaa caohateraneein nenacaauru suujuateraanu quete, niicha jerei tocohaneein aitiin Naitoonjoan laenaeratelu Cana Coaunera.

11Caa inara relaanune jaan caletoaera Cana Coaunera Ere rijijieeinte aite caa Cana Coaunera Aitoonjoan Inoaensi.

Faboro letoaa Cana Coaunerane

12Jataainna coroajeein, laraajiin cacha relaanune coina caletoaa Cana Curuaanaa Jesocurisitone jaun. Caohachaain rauhijiriin icharichaaunnine coitucuhane jaunte caletoae niicha jerenohin ichacaaunne coina.

13Baasoneeinna Jesocurisito que erein nere tonoraaurera cairichaerichaetoonlu. Nii atiinte atiin cacoelaain carae Cana Coaunera. Nii bana esenetaain coitucuenihanuluna jaunna nitohaneein nerejetoonlu. 14Jataain cacoelaiha Cana Curuaanaane jaunna, nii ucuaetoha caa esenetaain jereein neeun.

15-16Esinaete rauhijiriin turuha uhe caa chauratane que Jesocurisito, jianacoon osaonaauru mitaane coina. Jana canune osaonaauru nujuaneein neeunlu niqui. Nete atiin cacoelai Cana Coaunera, osaonaauru nujua belaiha Cana Coaunerane coitucuuruha satiin cachaaurune coina. “Charijieeinteeinti Faboro belai Cana Coaunera. Nii rijijieeintechu canu belaicheein”, naain Cana Coaunera esenetaerate nitajenaa charaneein nenaa ichaonaa raa cureein.

17Nii coreniha coanete caohatiin chabana onaa charaneein nenaa Cana Curuaanaa que raotojoeein ereerejeein nihacache. Coanete acaihanejein chabana coaarai Cana Coaunera ere tonoraain, caohatiin que ereerejeein nihacache inoaenlu netojoeein.

Timoteeo suujuatiha Faborone

18Nere beracuru que eletoaeratiha Cana Coaunerane rijijieein, laraajiin, neeunaain nere tonoraain ichaaura cacalabi Timoteeo. 19Tabaaurune Cana Coaunera sacunaa jerecuruhane nihanatiin, suujua coaraelanaala neein, rauhijiriin ichacurenihane necairichanaa coaracure. 20Nitohaneeinte situurelu Imeneeo, Alejaandoro, naaonjoaunri. Nii caaijiena Moconajaaera que casetecaeratenajaaunlu, coaiteen nacoauneein Cana Coaunera que baasoneein ereeuruhane coataa. Nijiaonriha iitonai nitohaneein situhine.

Currently Selected:

Timoteeo Rai Leinjiin 1: URA

Highlight

Compare

Copy